ಗಣೇಶ ನಿಮಜ್ಜನಕ್ಕೆ ತೆರಳಿದಾಗ ಬೋಟ್ ದುರಂತ: 11 ಮಂದಿ ಜಲಸಮಾಧಿ

ಮಧ್ಯೆಪ್ರದೇಶದ ಭೋಪಾಲ್​ನಲ್ಲಿ ಭಾರಿ ದುರಂತ ಸಂಭವಿಸಿ 11 ಮಂದಿ ಜಲಸಮಾಧಿ ಆಗಿದ್ದಾರೆ. ಗಣೇಶ ನಿಮಜ್ಜನದ ವೇಳೆ ಬೋಟ್ ಮಗುಚಿ ಬಿದ್ದು ಈ ಅವಘಡ ಸಂಭವಿಸಿದೆ.

ಭೋಪಾಲ್:ಗಣಪತಿ ನಿಮಜ್ಜನದ ವೇಳೆ ಬೋಟ್ ಮಗುಚಿ ಭಾರಿ ದುರಂತ ಸಂಭವಿಸಿದ್ದು, 11 ಮಂದಿ ಜಲಸಮಾಧಿ ಆಗಿದ್ದಾರೆ. ಇಂದು ಬೆಳಗ್ಗೆ ಭೋಪಾಲ್​​ನ ಕತ್ಲಾಪುರ ಘಾಟ್​ನಲ್ಲಿ ಈ ಅವಘಡ ನಡೆದಿದೆ.

ಈಗಾಗಲೇ 11 ಮಂದಿಯ ಮೃತದೇಹಗಳನ್ನು ಹೊರತೆಗೆಯಲಾಗಿದ್ದು, ನೀರಿನಲ್ಲಿ ಮುಳುಗಿರುವ ಇನ್ನಿಬ್ಬರಿಗಾಗಿ ಶೋಧಕಾರ್ಯ ಮುಂದುವರಿದಿದೆ. ಇದೇ ವೇಳೆ ಬೋಟ್​ ಮುಳುಗುತ್ತಿದ್ದಂತೆ 6 ಮಂದಿಯನ್ನು ರಕ್ಷಿಸಲಾಗಿದೆ.

ಪರಿಹಾರ ಘೋಷಣೆ:

ಮೃತರ ಕುಟುಂಬಸ್ಥರಿಗೆ ತಲಾ ನಾಲ್ಕು ಲಕ್ಷ ರೂ.ವನ್ನು ಮುಖ್ಯಮಂತ್ರಿ ಕಮಲ್​ನಾಥ್​ ಘೋಷಣೆ ಮಾಡಿದ್ದಾರೆ. ಇದರ ಜೊತೆಗೆ ಘಟನೆಯ ಬಗ್ಗೆ ಸೂಕ್ತ ತನಿಖೆಗೆ ಆದೇಶಿಸಿದ್ದಾರೆ. ದುರಂತಕ್ಕೆ ಕಾರಣವಾದವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಸಿಎಂ ಹೇಳಿದ್ದಾರೆ.