ರಷ್ಯಾ - ಉಕ್ರೇನ್​ ಸಮರ: ಯುದ್ಧಪೀಡಿತ ಉಕ್ರೇನ್​​​ಗೆ ಸುಧಾರಿತ ರಾಕೆಟ್ ಕಳುಹಿಸಲು ಅಮೆರಿಕ ಸಜ್ಜು

ಯುದ್ಧಪೀಡಿತ ಉಕ್ರೇನ್​ಗೆ ಇದೀಗ ಮತ್ತಷ್ಟು ಸಹಾಯ ಮಾಡಲು ಮುಂದಾಗಿರುವ ಅಮೆರಿಕ ದೀರ್ಘ ಶ್ರೇಣಿಯ ರಾಕೆಟ್​ ಒದಗಿಸುವುದಾಗಿ ಘೋಷಣೆ ಮಾಡಿದೆ.

ವಾಷಿಂಗ್ಟನ್​:ಕಳೆದ ಮೂರು ತಿಂಗಳಿಂದಲೂ ಉಕ್ರೇನ್ ಮೇಲೆ ರಷ್ಯಾ ಸೇನಾ ಕಾರ್ಯಾಚರಣೆ ನಡೆಸುತ್ತಿದ್ದು, ಇಲ್ಲಿಯವರೆಗೆ ಯಶಸ್ಸು ಮಾತ್ರ ಲಭ್ಯವಾಗಿಲ್ಲ. ಯುದ್ಧ ಪೀಡಿತ ಉಕ್ರೇನ್​​​ಗೆ ಈಗಾಗಲೇ ಅನೇಕ ದೇಶಗಳು ಸಹಾಯಹಸ್ತ ಚಾಚಿದ್ದು, ಇದೀಗ ಅಮೆರಿಕದ ಅಧ್ಯಕ್ಷ ಜೋ ಬೈಡನ್ ಮತ್ತೊಂದು ಮಹತ್ವದ ನಿರ್ಧಾರ ಕೈಗೊಂಡಿದ್ದಾರೆ.

ಬರೋಬ್ಬರಿ $700 ಮಿಲಿಯನ್ ಡಾಲರ್​ ಮೌಲ್ಯದ ಶಸ್ತ್ರಾಸ್ತ್ರ ಉಕ್ರೇನ್​ಗೆ ರವಾನೆ ಮಾಡಲು ಅಮೆರಿಕ ಮುಂದಾಗಿದ್ದು, ಇದರಲ್ಲಿ ದೀರ್ಘ ಶ್ರೇಣಿಯ ರಾಕೆಟ್​ ಸಹ ಒಳಗೊಂಡಿವೆ. ರಷ್ಯಾ ಪಡೆಗಳ ಮೇಲೆ ನಿಖರವಾಗಿ ದಾಳಿ ಮಾಡುವ ಸುಧಾರಿತ ರಾಕೆಟ್​ ಇವಾಗಿದ್ದು, ಇವುಗಳನ್ನ ಉಕ್ರೇನ್​​ಗೆ ಒದಗಿಸಲು ಯುಎಸ್​ ಅಧ್ಯಕ್ಷ ಜೋ ಬೈಡನ್​ ಒಪ್ಪಿಕೊಂಡಿದ್ದಾರೆ.

ರಷ್ಯಾದ ಮೇಲೆ ದಾಳಿ ಮಾಡಲು ಈ ಕ್ಷಿಪಣಿ ಬಳಕೆ ಬಳಕೆ ಮಾಡಲ್ಲ ಎಂದು ಉಕ್ರೇನ್​ ಭರವಸೆ ನೀಡಿದ ಬಳಿಕ ಯುಎಸ್​ ಈ ರಾಕೆಟ್​ ಒದಗಿಸಲು ನಿರ್ಧಾರ ಕೈಗೊಂಡಿದೆ. ಎದುರಾಳಿ ಪಡೆಗಳು ಮೇಲೆ ನಿಖರವಾಗಿ ದಾಳಿ ಮಾಡುವ ಸಾಮರ್ಥ್ಯ ಹೊಂದಿರುವ ಈ ಕ್ಷೀಪಣಿ, ಸುಮಾರು 80 ಕಿಲೋ ಮೀಟರ್​ ದೂರದ ಗುರಿ ನಿಖರವಾಗಿ ಹೊಡೆಯಬಲ್ಲದು ಎಂದು ತಿಳಿದು ಬಂದಿದೆ.

ಉಳಿದಂತೆ ಮದ್ದುಗುಂಡುಗಳು, ಕೌಂಟರ್ ಫೈರ್ ರಾಡಾರ್​, ವಾಯು ಕಣ್ಗಾವಲು ರಾಡರ್​ ಮತ್ತು ಆಂಟಿ ಟ್ಯಾಂಕ್ ಕ್ಷಿಪಣಿಗಳು ಇದರಲ್ಲಿ ಒಳಗೊಂಡಿವೆ. ಕಳೆದ ಫೆಬ್ರವರಿ 24ರಿಂದಲೂ ಉಕ್ರೇನ್ ಮೇಲೆ ರಷ್ಯಾ ದಾಳಿ ನಡೆಸುತ್ತಿದ್ದು, ಇಲ್ಲಿಯವರೆಗೆ ಸಾವಿರಾರು ಜನರು ತಮ್ಮ ಪ್ರಾಣ ಕಳೆದುಕೊಂಡಿದ್ದಾರೆ. ಜೊತೆಗೆ ಲಕ್ಷಾಂತರ ಜನರು ಸ್ಥಳಾಂತರಗೊಂಡಿದ್ದಾರೆ.

ಉಕ್ರೇನ್​ಗೆ ಈಗಾಗಲೇ ಯುರೋಪ್​ ರಾಷ್ಟ್ರಗಳು ಬೆಂಬಲ ಘೋಷಣೆ ಮಾಡಿದ್ದು, ಫ್ರಾನ್ಸ್​, ಜಪಾನ್​, ಲಂಡನ್ ಸೇರಿದಂತೆ ಅನೇಕ ದೇಶಗಳು ಯುದ್ದ ಉಪಕರಣ ರವಾನೆ ಮಾಡಿವೆ. ಮಾನವೀಯ ದೃಷ್ಟಿಯಿಂದ ಭಾರತ ಕೂಡ ವೈದ್ಯಕೀಯ, ಆಹಾರ ಸೇರಿದಂತೆ ಅಗತ್ಯ ವಸ್ತು ಉಕ್ರೇನ್​ಗೆ ರವಾನೆ ಮಾಡಿದೆ.