ಲಂಡನ್:ಇತ್ತೀಚಿನ ದಿನಗಳಲ್ಲಿ ಬ್ರಿಟನ್ನ ರಾಜಕೀಯದಲ್ಲಿ ಬಿರುಗಾಳಿ ಎದ್ದಿದೆ. ಬ್ರಿಟಿಷ್ ಪ್ರಧಾನಿ ರಿಷಿ ಸುನಕ್ ಅವರು ಭಾರತೀಯ ಮೂಲದ ಗೃಹ ಸಚಿವೆ ಸುಯೆಲ್ಲಾ ಬ್ರಾವರ್‌ಮನ್ ಅವರನ್ನು ವಜಾಗೊಳಿಸಿದ್ದಾರೆ. ಈಗ ಪ್ರಧಾನಿ ಸುನಕ್ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಬ್ರಾವರ್‌ಮನ್ ಅವರನ್ನು ತೆಗೆದುಹಾಕುವ ಪ್ರಧಾನಿ ರಿಷಿ ಸುನಕ್ ಅವರ ನಿರ್ಧಾರವನ್ನು ಅವರ ಸ್ವಂತ ಪಕ್ಷದಲ್ಲೇ ವಿರೋಧಿಸಲಾಗುತ್ತಿದೆ. ರಿಷಿ ಸುನಕ್ ಅವರ ಕನ್ಸರ್ವೇಟಿವ್ ಪಕ್ಷದ ಸಂಸದೆ ಆಂಡ್ರಿಯಾ ಜೆಂಕಿನ್ಸ್ ಅವರು ಪ್ರಧಾನಿ ನಿರ್ಧಾರದ ವಿರುದ್ಧ ಅವಿಶ್ವಾಸ ನಿರ್ಣಯವನ್ನು ತರಲು ಯತ್ನಿಸುತ್ತಿದ್ದಾರೆ.
ಟೋರಿ ಸಂಸದೆ ಆಂಡ್ರಿಯಾ ಜೆಂಕಿನ್ಸ್ ಸೋಮವಾರ ರಿಷಿ ಸುನಕ್ ವಿರುದ್ಧ ಅವಿಶ್ವಾಸ ತಂತ್ರವನ್ನು ಪ್ರಯೋಗಿಸಿದ್ದಾರೆ. ಈ ಕುರಿತು ಟ್ವೀಟ್ ಮಾಡಿರುವ ಆಂಡ್ರಿಯಾ ಜೆಂಕಿನ್ಸ್, ನನ್ನ ಅವಿಶ್ವಾಸ ಪತ್ರವನ್ನು 1922 ಸಮಿತಿಯ ಅಧ್ಯಕ್ಷ ಗ್ರಹಾಂ ಬ್ರಾಡ್ಗೆ ಸಲ್ಲಿಸಿದ್ದೇನೆ. ರಿಷಿ ಸುನಕ್ ಅವರನ್ನು ಹುದ್ದೆಯಿಂದ ತೆಗೆದುಹಾಕುವ ಸಮಯ ಬಂದಿದೆ. ಪಿಎಂ ರಿಷಿ ಸುನಕ್ ಅವರ ಸ್ಥಾನಕ್ಕೆ 'ನಿಜವಾದ' ಕನ್ಸರ್ವೇಟಿವ್ ಪಕ್ಷದ ನಾಯಕನನ್ನು ನೇಮಿಸುವ ಸಮಯ ಬಂದಿದೆ. ಸುನಕ್ ಅವರನ್ನು ಮತ್ತಷ್ಟು ಟೀಕಿಸಿದ ಅವರು, ನಮ್ಮ ಪ್ರಜಾಸತ್ತಾತ್ಮಕವಾಗಿ ಚುನಾಯಿತ ನಾಯಕ ಬೋರಿಸ್ ಜಾನ್ಸನ್ ಅವರನ್ನು ತೊಡೆದುಹಾಕಲು ರಿಷಿ ರಾಜತಾಂತ್ರಿಕ ಪ್ರಯತ್ನಗಳನ್ನು ಮಾಡಿದ್ದರು ಎಂದು ಬರೆದಿದ್ದಾರೆ.