ಬೀಜಿಂಗ್ (ಚೀನಾ) : ಚೀನಾದ ಈಶಾನ್ಯ ನಗರವಾದ ಕಿಕಿಹಾರ್‌ನಲ್ಲಿರುವ ಮಾಧ್ಯಮಿಕ ಶಾಲೆಯಲ್ಲಿನ ಜಿಮ್ ಮೇಲ್ಛಾವಣಿ ಕುಸಿದು ಹತ್ತು ಜನ ಸಾವನ್ನಪ್ಪಿದ್ದಾರೆ ಎಂದು ಚೀನಾದ ಸರ್ಕಾರಿ ಮಾಧ್ಯಮ ವರದಿ ಮಾಡಿದೆ. ಅಪಘಾತದ ಸಮಯದಲ್ಲಿ ಜಿಮ್‌ನಲ್ಲಿ 19 ಜನರಿದ್ದರು. ಸ್ಥಳೀಯ ಶೋಧ ಮತ್ತು ರಕ್ಷಣಾ ಕೇಂದ್ರದ ಪ್ರಕಾರ, ದುರಂತ ಘಟನೆ ನಡೆದಾಗ ಹದಿನೈದು ಮಂದಿ ಒಳಗೆ ಸಿಲುಕಿಕೊಂಡಿದ್ದರು ಮತ್ತು ನಾಲ್ವರು ಪಾರಾಗಿದ್ದಾರೆ. ಪ್ರಾಥಮಿಕ ತನಿಖೆಯ ಪ್ರಕಾರ, ಪಕ್ಕದ ಕಟ್ಟಡದ ನಿರ್ಮಾಣದ ಸಮಯದಲ್ಲಿ ಜಿಮ್ ಛಾವಣಿ ಮೇಲೆ ಉಳಿದಿರುವ ಪರ್ಲೈಟ್ ಎಂಬ ನಿರ್ಮಾಣ ತ್ಯಾಜ್ಯವು ಕುಸಿತಕ್ಕೆ ಕಾರಣವಾಗಿರಬಹುದು ಎಂದು ವರದಿ ತಿಳಿಸಿವೆ.
ಆರಂಭಿಕ ತನಿಖೆಯ ಪ್ರಕಾರ, ತ್ಯಾಜ್ಯ ವಸ್ತುವು ಮಳೆ ನೀರಿನೊಂದಿಗೆ ಸೇರಿಕೊಂಡಾಗ ಅದರ ಭಾರ ಹೆಚ್ಚಾಗಿದೆ. ಅದರ ಭಾರ ತೀರಾ ಹೆಚ್ಚಾದಾಗ ಮೇಲ್ಛಾವಣಿ ಕುಸಿದಿದೆ. ನಿರ್ಮಾಣದ ಉಸ್ತುವಾರಿ ವಹಿಸಿದ್ದವರನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ. ಘಟನೆಯ ಬಗ್ಗೆ ಸೂಕ್ತ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸ್ ಅಧಿಕಾರಿಗಳು ಹೇಳಿದ್ದಾರೆ.
ಚೀನಾಕ್ಕೆ ವೀಸಾ ಮುಕ್ತ ಪ್ರವೇಶ: ಸಿಂಗಾಪೂರ್ ಮತ್ತು ಬ್ರೂನಿ ನಾಗರಿಕರಿಗೆ ಚೀನಾ ಬುಧವಾರದಿಂದ 15 ದಿನಗಳ ವೀಸಾ ಮುಕ್ತ ಪ್ರವೇಶ ಪುನಾರಂಭಿಸಲಿದೆ. ಕೋವಿಡ್-19 ಸಮಯದಲ್ಲಿ ಈ ದೇಶಗಳ ನಾಗರಿಕರಿಗೆ ವೀಸಾ ಮುಕ್ತ ಪ್ರವೇಶ ಸ್ಥಗಿತಗೊಳಿಸಲಾಗಿತ್ತು. ಆದರೆ, ಮೂರು ವರ್ಷಗಳ ನಂತರ ಈ ಸೌಲಭ್ಯ ಮತ್ತೆ ಆರಂಭವಾಗುತ್ತಿದೆ ಎಂದು ಉಭಯ ದೇಶಗಳಲ್ಲಿನ ಅದರ ರಾಯಭಾರ ಕಚೇರಿಗಳು ತಿಳಿಸಿವೆ.
ವ್ಯಾಪಾರ ವಹಿವಾಟಿಗಾಗಿ, ಪ್ರೇಕ್ಷಣೀಯ ಸ್ಥಳಗಳನ್ನು ವೀಕ್ಷಿಸಲು, ಸಂಬಂಧಿಕರು ಮತ್ತು ಸ್ನೇಹಿತರನ್ನು ಭೇಟಿ ಮಾಡಲು ಮತ್ತು ಸಾರಿಗೆಗಾಗಿ ಪ್ರಯಾಣಿಸುವ ಸಾಮಾನ್ಯ ಪಾಸ್‌ಪೋರ್ಟ್‌ಗಳೊಂದಿಗೆ ಸಿಂಗಾಪುರ ಮತ್ತು ಬ್ರೂನಿ ನಾಗರಿಕರಿಗೆ ಚೀನಾಕ್ಕೆ ವೀಸಾ ಮುಕ್ತ ಪ್ರವೇಶ ಲಭ್ಯವಿರುತ್ತದೆ ಎಂದು ರಾಯಭಾರ ಕಚೇರಿಗಳು ತಮ್ಮ ವೆಬ್‌ಸೈಟ್‌ಗಳಲ್ಲಿ ತಿಳಿಸಿವೆ.
ಚೀನಾದಲ್ಲಿ ಭಾರಿ ಮಳೆ, ಪ್ರವಾಹ: ಭಾರೀ ಮಳೆಯಿಂದ ಪೂರ್ವ ಚೀನಾದ ಹಲವಾರು ಪ್ರದೇಶಗಳಲ್ಲಿ ಪ್ರವಾಹ ಉಂಟಾಗಿದೆ. ಪ್ರವಾಹದಿಂದ ಕನಿಷ್ಠ ಐವರು ಸಾವನ್ನಪ್ಪಿದ್ದಾರೆ ಮತ್ತು ಮೂವರು ಕಾಣೆಯಾಗಿದ್ದಾರೆ ಮತ್ತು 1,500 ಕ್ಕೂ ಹೆಚ್ಚು ಜನರನ್ನು ಸ್ಥಳಾಂತರಿಸಲಾಗಿದೆ ಎಂದು ಸರ್ಕಾರಿ ಮಾಧ್ಯಮ ಭಾನುವಾರ ವರದಿ ಮಾಡಿದೆ. ಶನಿವಾರ ಮಧ್ಯಾಹ್ನ ಹ್ಯಾಂಗ್‌ಝೌ ನಗರದ ಫುಯಾಂಗ್ ಜಿಲ್ಲೆಯ ಹಳ್ಳಿಯೊಂದರಲ್ಲಿ ಭಾರಿ ಪ್ರವಾಹವು ಅನೇಕ ಮನೆಗಳನ್ನು ಆವರಿಸಿದೆ ಎಂದು ಚೀನಾ ನ್ಯಾಷನಲ್ ರೇಡಿಯೊ ಹೇಳಿದೆ.
ಮಳೆಯ ನಂತರ ಭಾಗಶಃ ಪರ್ವತ ಕುಸಿತ ಮತ್ತು ಮಣ್ಣಿನ ಕುಸಿತದ ಘಟನೆಗಳು ನಡೆದಿವೆ. 1,600 ಕ್ಕೂ ಹೆಚ್ಚು ಮನೆಗಳ ವಿದ್ಯುತ್ ಕಡಿತವಾಗಿದೆ. 1,500 ಕ್ಕೂ ಹೆಚ್ಚು ಜನರನ್ನು ಸ್ಥಳಾಂತರಿಸಲಾಗಿದೆ ಎಂದು ಸರ್ಕಾರಿ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಈ ತಿಂಗಳ ಆರಂಭದಲ್ಲಿ, ಚಾಂಗ್‌ಕಿಂಗ್‌ನ ನೈಋತ್ಯ ಪ್ರದೇಶದಲ್ಲಿ ಪ್ರವಾಹದಿಂದ ಕನಿಷ್ಠ 15 ಜನರು ಸಾವನ್ನಪ್ಪಿದ್ದರು.
ಇದನ್ನೂ ಓದಿ : ಭಾರತೀಯ ಸಾಮಾಜಿಕ ಮನಸ್ಥಿತಿಯ ಬಗ್ಗೆ ಪ್ರಧಾನಿ ಮೋದಿಯವರಿಗಿದೆ ಅಗಾಧ ಜ್ಞಾನ: ಹಿರಿಯ ಪತ್ರಕರ್ತ ಅಜಯ್ ಸಿಂಗ್
