ಸ್ಪೇನ್​ನಲ್ಲಿ ಮಂಕಿಪಾಕ್ಸ್ ಅಬ್ಬರ.. ಯುರೋಪಿಯನ್ ಯೂನಿಯನ್ ರಾಷ್ಟ್ರದಲ್ಲಿ ಮೊದಲ ಸಾವು!

ಯುರೋಪಿಯನ್ ಯೂನಿಯನ್ ರಾಷ್ಟ್ರದಲ್ಲಿ ಮಂಕಿಪಾಕ್ಸ್​ ಹಾವಳಿ ಹೆಚ್ಚುತ್ತಿದ್ದು, ಸ್ಪೇನ್​ನಲ್ಲಿ ಮಂಕಿಪಾಕ್ಸ್​ ರೋಗಕ್ಕೆ ಮೊದಲ ಸಾವು ದಾಖಲಾಗಿದೆ.

ಮ್ಯಾಡ್ರಿಡ್(ಸ್ಪೇನ್):ಮಂಕಿಪಾಕ್ಸ್‌ನಿಂದ ವ್ಯಕ್ತಿಯ ಸಾವನ್ನಪ್ಪಿದ್ದು, ಇದು ಯುರೋಪಿಯನ್ ಯೂನಿಯನ್ ರಾಷ್ಟ್ರದಲ್ಲಿ ಮೊದಲನೇ ಮರಣವಾಗಿದೆ ಎಂದು ಸ್ಪಾನೀಷ್​​ ಮಾಧ್ಯಮಗಳು ವರದಿ ಮಾಡಿವೆ. ಇದುವರೆಗೆ 120 ಜನರನ್ನು ಮಂಕಿಪಾಕ್ಸ್‌ನಿಂದ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಇದರಲ್ಲಿ ಒಬ್ಬರು ಸಾವನ್ನಪ್ಪಿದ್ದಾರೆ. ಇದು ದೇಶದ ಮೊದಲ ಮಂಕಿಪಾಕ್ಸ್ ಸಾವು ಎಂದು ಸ್ಪೇನ್‌ನ ಆರೋಗ್ಯ ಸಚಿವಾಲಯವು ಪ್ರಕಟಣೆ ಮೂಲಕ ತಿಳಿಸಿದೆ ಎಂದು ಸ್ಪೇನ್‌ನ ರಾಜ್ಯ ಸುದ್ದಿ ಸಂಸ್ಥೆ ಎಫೆ ಮತ್ತು ಇತರ ಮಾಧ್ಯಮಗಳು ಹೇಳಿವೆ.

ಸಾವಿನ ಬಗ್ಗೆ ಹೆಚ್ಚಿನ ವಿವರಗಳನ್ನು ಸಚಿವಾಲಯ ಬಹಿರಂಗ ಪಡಿಸಿಲ್ಲ. ಸ್ಪೇನ್‌ನಲ್ಲಿ 4,298 ಜನರು ವೈರಸ್ ಸೋಂಕಿಗೆ ಒಳಗಾಗಿದ್ದಾರೆ. ಅದರಲ್ಲಿ, ಸುಮಾರು 3,500 ಪ್ರಕರಣಗಳು ಇತರ ಪುರುಷರೊಂದಿಗೆ ಸಂಭೋಗಿಸಿದ ಪುರುಷರಲ್ಲಿ ಈ ವೈರಸ್​ ಕಂಡು ಬಂದಿದ್ದು, ಕೇವಲ 64 ಮಹಿಳೆಯರಲ್ಲಿ ಮಾತ್ರ ಈ ಸೋಂಕು ಕಾಣಿಸಿಕೊಂಡಿದೆ.

ಯುರೋಪ್ ಮತ್ತು ಉತ್ತರ ಅಮೆರಿಕದಲ್ಲಿ ಮಂಕಿಪಾಕ್ಸ್ ಏಕಾಏಕಿ ಏರಿಕೆ ಕಂಡಿದೆ. ಬೆಲ್ಜಿಯಂ ಮತ್ತು ಸ್ಪೇನ್‌ನಲ್ಲಿನ ಎರಡು ರೇವ್‌ಗಳಲ್ಲಿ ಲೈಂಗಿಕತೆಯಿಂದ ಮಂಕಿಪಾಕ್ಸ್​ ಹರಡಿದೆ ಎಂದು ತಜ್ಞರು ಶಂಕಿಸಿದ್ದಾರೆ. ಪ್ರಸ್ತುತ ಏಕಾಏಕಿ ವೈರಸ್ ವೇಗವಾಗಿ ಹರಡುತ್ತಿದ್ದು, ಇದನ್ನು ವಿಶ್ವ ಆರೋಗ್ಯ ಸಂಸ್ಥೆಯು ಜಾಗತಿಕ ಆರೋಗ್ಯ ತುರ್ತುಸ್ಥಿತಿ ಎಂದು ಘೋಷಿಸಿದೆ.

ಓದಿ:ಮಂಕಿಪಾಕ್ಸ್​ ಲಸಿಕೆ ಅಭಿವೃದ್ಧಿಗೆ ಟೆಂಡರ್​ ಕರೆದ ಕೇಂದ್ರ ಸರ್ಕಾರ