ಭಾರತದ ಬಳಿಕ ಬ್ರಿಟನ್​​ನಲ್ಲಿ ಪೋಲಿಯೋ ವೈರಸ್​ ಮಾದರಿ ಪತ್ತೆ

ಪೋಲಿಯೋ ಮುಕ್ತವಾಗಿದ್ದ ಬ್ರಿಟನ್​ನಲ್ಲಿ ಒಳಚರಂಡಿ ನೀರಿನಲ್ಲಿ ವೈರಸ್​ ಪತ್ತೆಯಾದ ಬಗ್ಗೆ ಅಲ್ಲಿನ ಆರೋಗ್ಯ ಅಧಿಕಾರಿಗಳು ಮಾಹಿತಿ ಹಂಚಿಕೊಂಡಿದ್ದಾರೆ.

ಜಿನೀವಾ:ಪೋಲಿಯೋ ಮುಕ್ತವಾಗಿದ್ದರೂ ಭಾರತದಲ್ಲಿ ಕೆಲ ದಿನಗಳ ಹಿಂದಷ್ಟೇ ಒಳಚರಂಡಿ ನೀರಿನಲ್ಲಿ ಪೋಲಿಯೋ ವೈರಸ್​ ಕಂಡು ಬಂದು ಸುದ್ದಿಯಾಗಿತ್ತು. ಇದೀಗ ಲಂಡನ್​ನಲ್ಲೂ ಕೂಡ ಒಳಚರಂಡಿ ನೀರಿನಲ್ಲಿ ವೈರಸ್​ ಪತ್ತೆಯಾಗಿದೆ. ಇದು ಆ ದೇಶ ಪೋಲಿಯೋ ಮುಕ್ತವಾದ 2 ದಶಕಗಳ ಬಳಿಕ ಇದೇ ಮೊದಲ ಬಾರಿಗೆ ಮತ್ತೆ ವೈರಸ್​ ಗೋಚರವಾಗಿದೆ.

ಒಳಚರಂಡಿ ನೀರಿನ ಮಾದರಿ ಸಂಗ್ರಹಿಸಿ ನಡೆಸಿದ ಪರೀಕ್ಷೆಯಲ್ಲಿ ಪೋಲಿಯೋ ವೈರಸ್​ ಮಾದರಿ ಕಂಡು ಬಂದಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಮತ್ತು ಬ್ರಿಟಿಷ್ ಆರೋಗ್ಯ ಅಧಿಕಾರಿಗಳು ಬುಧವಾರ ಹೇಳಿದ್ದಾರೆ. ಈ ಬಗ್ಗೆ ಹೆಚ್ಚಿನ ವಿಶ್ಲೇಷಣೆ ನಡೆಯುತ್ತಿದೆ ಎಂದು ತಿಳಿಸಿದ್ದಾರೆ.

ಎರಡು ದಶಕಗಳ ಹಿಂದೆ ಮಾರಕ ರೋಗವನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡಿದ ಬ್ರಿಟನ್‌ನಲ್ಲಿ ಯಾವುದೇ ಮಾನವ ಪೋಲಿಯೊ ಪ್ರಕರಣಗಳು ಈವರೆಗೂ ಕಂಡುಬಂದಿಲ್ಲ.

ಲಸಿಕೆ ಪಡೆದವರಲ್ಲಿ ಕಂಡುಬರುವ ಟೈಪ್ 2 ಪೋಲಿಯೊ ವೈರಸ್ (VDPV2) ಬ್ರಿಟನ್​ ರಾಜಧಾನಿಯಲ್ಲಿನ ಪರಿಸರದಲ್ಲಿ ಕಂಡುಬಂದಿದೆ ಎಂದು ವಿಶ್ವಸಂಸ್ಥೆ ಹೇಳಿಕೆಯಲ್ಲಿ ತಿಳಿಸಿದೆ. ಈ ವೈರಸ್‌ ಈಗ ಅಫ್ಘಾನಿಸ್ತಾನ ಮತ್ತು ಪಾಕಿಸ್ತಾನದಲ್ಲಿ ಮಾತ್ರ ಅಸ್ತಿತ್ವದಲ್ಲಿದೆ.

ಇದನ್ನೂ ಓದಿ:ಅಸ್ಸೋಂನಲ್ಲಿ ಮಳೆ, ಪ್ರವಾಹಕ್ಕೆ 107 ಜನ ಸಾವು; ಪರಿಸ್ಥಿತಿ ಮೇಲೆ ತೀವ್ರ ನಿಗಾ- ಪ್ರಧಾನಿ ಮೋದಿ