ಬರ್ಲಿನ್ (ಜರ್ಮನಿ) :ಮೂರು ದಿನಗಳ ಯುರೋಪ್ ಪ್ರವಾಸದಲ್ಲಿರುವ ಪ್ರಧಾನಿ ಮೋದಿ ಅವರು ಇಂದು ಜರ್ಮನ್ ರಾಜಧಾನಿ ಬರ್ಲಿನ್ಗೆ ಭೇಟಿ ನೀಡಿದರು. ಈ ವೇಳೆ ಬರ್ಲಿನ್‌ನಲ್ಲಿರುವ ಫೆಡರಲ್ ಚಾನ್ಸೆಲರಿಯಿಂದ ಮೋದಿ ಅವರನ್ನು ರೆಡ್ ಕಾರ್ಪೆಟ್ ಹಾಕಿ ಅದ್ದೂರಿಯಾಗಿ ಸ್ವಾಗತಿಸಲಾಯಿತು.
ಬರ್ಲಿನ್‌ನ ಹೋಟೆಲ್ ಅಡ್ಲಾನ್ ಕೆಂಪಿನ್ಸ್ಕಿಯಲ್ಲಿ ಮೋದಿ ಆಗಮನಕ್ಕಾಗಿ ಸಾವಿರಾರು ಭಾರತೀಯರು ಕಾದು ಕುಳಿತಿದ್ದರು. ವಿಮಾನದಿಂದ ಇಳಿದು ಮೋದಿ ಅವರು ನಡೆದು ಬರುತ್ತಿದ್ದಾಗ ಪ್ರಧಾನಿಯನ್ನು ಕಂಡ ಜನರು 'ವಂದೇ ಮಾತರಂ' ಮತ್ತು 'ಭಾರತ್ ಮಾತಾ ಕಿ ಜೈ' ಎಂದು ಘೋಷಣೆ ಕೂಗಿದರು. ಫೆಡರಲ್ ಚಾನ್ಸೆಲರಿಗೆ ಹೊರಡುವ ಮೊದಲು ಪ್ರಧಾನಿಯನ್ನು ಜರ್ಮನ್ನಲ್ಲಿರುವ ಭಾರತೀಯರು ಅದ್ದೂರಿಯಾಗಿ ಸ್ವಾಗತಿಸಿದರು.