ಡಾಲರ್ ಎದುರು ಪಾತಾಳ ಕಂಡ ಪಾಕ್ ರೂಪಾಯಿ!

ಪಾಕಿಸ್ತಾನದ ರೂಪಾಯಿ ಐತಿಹಾಸಿಕ ಕೆಳಮಟ್ಟಕ್ಕೆ ಕುಸಿದಿದೆ. ಪಾಕ್ ಕರೆನ್ಸಿಯು ಒಂದೇ ದಿನ ಶೇಕಡಾ 9ಕ್ಕಿಂತ ಹೆಚ್ಚಿಗೆ ಕುಸಿದಿದ್ದು, ಇದು ಅಕ್ಟೋಬರ್ 30, 1999 ರ ನಂತರದ ಅತ್ಯಧಿಕ ಕರೆನ್ಸಿ ಕುಸಿತ.

ಕರಾಚಿ (ಪಾಕಿಸ್ತಾನ):ಮುಕ್ತ ಮತ್ತು ಅಂತರಬ್ಯಾಂಕ್ ಮಾರುಕಟ್ಟೆಯಲ್ಲಿ ರೂಪಾಯಿ ಅಪಮೌಲ್ಯದ ನಂತರ, ಪಾಕಿಸ್ತಾನದ ಸ್ಟಾಕ್ ಎಕ್ಸ್‌ಚೇಂಜ್ (ಪಿಎಸ್‌ಎಕ್ಸ್) ಬೆಂಚ್‌ಮಾರ್ಕ್ ಸೂಚ್ಯಂಕವು 1,000 ಅಂಕಗಳಿಗಿಂತ ಹೆಚ್ಚು ಏರಿಕೆ ಕಂಡಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ. ಈ ಬೆಳವಣಿಗೆಯ ಬಗ್ಗೆ ಪ್ರತಿಕ್ರಿಯಿಸಿದ ಆರಿಫ್ ಹಬೀಬ್ ಲಿಮಿಟೆಡ್‌ನ ಸಂಶೋಧನಾ ಮುಖ್ಯಸ್ಥ ತಾಹಿರ್ ಅಬ್ಬಾಸ್, ರೂಪಾಯಿಯ ತೀವ್ರ ಕುಸಿತವು ಮಾರುಕಟ್ಟೆಯಲ್ಲಿ ಸಕಾರಾತ್ಮಕ ಭಾವನೆಯನ್ನು ಉಂಟುಮಾಡಿದೆ ಎಂದಿದ್ದಾರೆ.

ಮಾರುಕಟ್ಟೆಯ ಹಿಂದಿನ ಪ್ರೇರಕ ಶಕ್ತಿಯು ರೂಪಾಯಿಯ ಮಾರುಕಟ್ಟೆ ಆಧಾರಿತ ವಿನಿಮಯ ದರವಾಗಿದೆ. ಇದು ಹೂಡಿಕೆದಾರರ ಮನಸ್ಸಿನಲ್ಲಿದ್ದ ಅನಿಶ್ಚಿತತೆಯನ್ನು ದೂರ ಮಾಡಲು ಸಹಾಯ ಮಾಡಿದೆ ಎಂದು ಅಬ್ಬಾಸ್ ಹೇಳಿದರು. ಮಾರುಕಟ್ಟೆಯು ಚೇತರಿಸಿಕೊಳ್ಳಲು ಮತ್ತು ಹೂಡಿಕೆದಾರರ ವಿಶ್ವಾಸವನ್ನು ಹೆಚ್ಚಿಸಲು ಸರ್ಕಾರದ ಕ್ರಮಗಳು ಸಹಾಯ ಮಾಡುತ್ತಿವೆ ಎಂದು ವಿಶ್ಲೇಷಕರು ಹೇಳಿದ್ದಾರೆ. ಅಂತರರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ಕಾರ್ಯಕ್ರಮದ ಪುನರುಜ್ಜೀವನದ ಅನಿಶ್ಚಿತತೆಯಿಂದ ಹೂಡಿಕೆದಾರರು ಇಕ್ಕಟ್ಟಿನ ಸ್ಥಿತಿಯಲ್ಲಿದ್ದರು.

ಮುಂದಿನ ಎಂಟರಿಂದ 10 ದಿನಗಳಲ್ಲಿ ಮಿನಿ ಬಜೆಟ್ ಅನ್ನು ನಿರೀಕ್ಷಿಸಲಾಗಿದೆ. ಅನಿಲ ಮತ್ತು ವಿದ್ಯುತ್ ದರಗಳು ಹೆಚ್ಚಾಗಬಹುದು ಮತ್ತು ಹೆಚ್ಚಿನ ತೆರಿಗೆಗಳನ್ನು ವಿಧಿಸಬಹುದು ಎಂದು ಅಬ್ಬಾಸ್ ತಿಳಿಸಿದ್ದಾರೆ. ಪಾಕಿಸ್ತಾನದ ರೂಪಾಯಿಯು ಎರಡು ದಶಕಗಳ ಇತಿಹಾಸದಲ್ಲಿಯೇ ಡಾಲರ್ ಎದುರು ತನ್ನ ಅತಿದೊಡ್ಡ ಏಕದಿನ ಕುಸಿತವನ್ನು ದಾಖಲಿಸಿದೆ. ವಿದೇಶಿ ವಿನಿಮಯ ಮೀಸಲುಗಳು ವೇಗವಾಗಿ ಖಾಲಿಯಾದ ನಂತರ ಮತ್ತು ಕರೆನ್ಸಿಯ ಮೇಲಿನ ತನ್ನ ಹಿಡಿತವನ್ನು ಸಡಿಲಿಸಲು ಐಎಂಎಫ್ ಸರ್ಕಾರವನ್ನು ಒತ್ತಾಯಿಸಿದ ನಂತರ ಪಾಕ್ ರೂಪಾಯಿಯಲ್ಲಿ ಇಷ್ಟೊಂದು ದೊಡ್ಡ ಮಟ್ಟದ ಕುಸಿತ ಉಂಟಾಗಿದೆ.

ಐಎಂಎಫ್ ಷರತ್ತಿನ ಭಾಗವಾಗಿ ರೂಪಾಯಿ-ಡಾಲರ್ ವಿನಿಮಯ ದರದ ಮೇಲಿನ ತನ್ನ ನಿಯಂತ್ರಣವನ್ನು ಕೊನೆಗೊಳಿಸುವ ಸರ್ಕಾರದ ನಿರ್ಧಾರದ ನಂತರ, ಪಾಕ್ ಕರೆನ್ಸಿಯು ಯುಎಸ್ ಡಾಲರ್ ಎದುರು ಶೇಕಡಾ 9.61 ರಷ್ಟು ಅಥವಾ 24.5 ರೂ.ಗೆ ಕುಸಿದಿದೆ. ಬುಧವಾರದ ಅಂತ್ಯಕ್ಕೆ ಹೋಲಿಸಿದರೆ ಇದು 255.43 ರೂ.ಗಳಿಂದ 230.89 ರೂ.ಗೆ ಕುಸಿದಿದೆ. ಶೇಕಡಾ 9 ಕ್ಕಿಂತ ಹೆಚ್ಚಿನ ಕುಸಿತವು ಅಕ್ಟೋಬರ್ 30, 1999 ರ ನಂತರದ ಅತ್ಯಧಿಕ ಕರೆನ್ಸಿ ಕುಸಿತವಾಗಿದೆ.

ಸ್ಟೇಟ್ ಬ್ಯಾಂಕ್ ಆಫ್ ಪಾಕಿಸ್ತಾನವು ವಿನಿಮಯ ದರವನ್ನು ಮಾರುಕಟ್ಟೆ ದರಕ್ಕೆ ಸರಿಹೊಂದಿಸುತ್ತಿದೆ. ಅಧಿಕೃತ ಮತ್ತು ಮುಕ್ತ ಮಾರುಕಟ್ಟೆ ದರಗಳ ನಡುವಿನ ಹೆಚ್ಚಿನ ವ್ಯತ್ಯಾಸವನ್ನು ಪರಿಹರಿಸಲು ಮತ್ತು ಅನೌಪಚಾರಿಕ ಮಾರುಕಟ್ಟೆಯ ಮೂಲಕ ಡಾಲರ್ ಹರಿವನ್ನು ತಡೆಯಲು ಮುಕ್ತ ಮಾರುಕಟ್ಟೆಗೆ ಇದು ಪೂರಕವಾಗಿದೆ ಎಂದು ಬಂಡವಾಳ ಮಾರುಕಟ್ಟೆ ತಜ್ಞ ಸಾದ್ ಅಲಿ ಹೇಳಿದರು.

ಭಾರತ ಪಾಕ್ ಮಧ್ಯೆ ಹಿಂಬಾಗಿಲ ಚರ್ಚೆ ಇಲ್ಲ: ಇಸ್ಲಾಮಾಬಾದ್ ಮತ್ತು ನವದೆಹಲಿ ನಡುವೆ ಯಾವುದೇ ಹಿಂಬಾಗಿಲ ಚರ್ಚೆಗಳು ನಡೆಯುತ್ತಿಲ್ಲ ಎಂದು ಪಾಕಿಸ್ತಾನ ಗುರುವಾರ ಹೇಳಿದೆ. ಸದ್ಯ ಅಂತಹ ಯಾವುದೇ ವಿಷಯಗಳು ನಡೆಯುತ್ತಿಲ್ಲ ಎಂದು ವಿದೇಶಾಂಗ ವ್ಯವಹಾರಗಳ ರಾಜ್ಯ ಸಚಿವ ಹಿನಾ ರಬ್ಬಾನಿ ಖಾರ್ ಸಂಸತ್ತಿನ ಮೇಲ್ಮನೆ ಸೆನೆಟ್‌ಗೆ ತಿಳಿಸಿದರು. ಫಲಿತಾಂಶಗಳು ಬರುವ ಸಾಧ್ಯತೆಗಳಿರುವಾಗ ಹಿಂಬಾಗಿಲ ರಾಜತಾಂತ್ರಿಕತೆಯು ಆದ್ಯತೆಯಾಗಿರುತ್ತದೆ ಎಂದು ಅವರು ಹೇಳಿದರು. ವಿದೇಶಾಂಗ ಕಚೇರಿಯ ವಕ್ತಾರ ಮುಮ್ತಾಜ್ ಜಹ್ರಾ ಬಲೋಚ್ ಕೂಡ ರಬ್ಬಾನಿ ಅವರ ಮಾತಿಗೆ ದನಿಗೂಡಿಸಿದ್ದು, ಭಾರತದೊಂದಿಗೆ ಯಾವುದೇ ರಹಸ್ಯ ರಾಜತಾಂತ್ರಿಕ ಸಂವಾದಗಳು ನಡೆಯುತ್ತಿಲ್ಲ ಎಂದರು.

ಇದನ್ನೂ ಓದಿ: ನಾಗರ ಹಾವಿನೊಂದಿಗೆ ಸೆಲ್ಫಿ ತೆಗದುಕೊಳ್ಳಲು ಹೋಗಿ ಪ್ರಾಣ ಕಳೆದುಕೊಂಡ ಯುವಕ....