ನವದೆಹಲಿ:ಪಾಕಿಸ್ತಾನ ಆರ್ಥಿಕ, ಸಾಮಾಜಿಕ ಸ್ಥಿತಿಗತಿ, ಈಗ ರಾಜಕೀಯವಾಗಿಯೂ ನರಳುತ್ತಿದೆ. ಈಗಿನ ಪ್ರಧಾನಿ ಇಮ್ರಾನ್ ಖಾನ್ ಸರ್ಕಾರ ಭಾರಿ ಪ್ರಮಾಣದ ಭ್ರಷ್ಟಾಚಾರ ಆರೋಪಗಳನ್ನು ಎದುರಿಸುತ್ತಿದ್ದು, ಇಮ್ರಾನ್ ಅಧಿಕಾರ ಕಳೆದುಕೊಳ್ಳುವ ಅಂಚಿನಲ್ಲಿದ್ದಾರೆ. ಹೀಗೊಂದು ವೇಳೆ ಹಾಲಿ ಪ್ರಧಾನಿ ಅಧಿಕಾರದಿಂದ ಪದಚ್ಯುತಗೊಂಡಲ್ಲಿ ವಿಶೇಷ ಪಟ್ಟಿಗೆ ಸೇರ್ಪಡೆಯಾಗಲಿದ್ದಾರೆ. ಅದೇನೆಂದರೆ, ಪಾಕಿಸ್ತಾನ ಅಸ್ತಿತ್ವಕ್ಕೆ ಬಂದ ಬಳಿಕ ಈವರೆಗೂ ಯಾವೊಬ್ಬ ಪ್ರಧಾನಿಯೂ ತಮ್ಮ ಪೂರ್ಣಾವಧಿಯನ್ನು ಮುಗಿಸಿಲ್ಲ!. ಇಮ್ರಾನ್ ಖಾನ್ ಕೂಡ ಅದೇ ದಾರಿಯಲ್ಲಿ ಸಾಗುತ್ತಿದ್ದಾರೆ.
ಪಾಕಿಸ್ತಾನ ಈವರೆಗೂ 4 ಬಾರಿ ಪ್ರಜಾಪ್ರಭುತ್ವ ಆಡಳಿತವನ್ನು ಕಳೆದುಕೊಂಡು ಸೇನಾಡಳಿತಕ್ಕೆ ಒಳಪಟ್ಟಿದೆ. ಅಲ್ಲದೇ ಈವರೆಗೂ 19 ಪ್ರಧಾನಿಗಳನ್ನು ಕಂಡಿದೆ. ಆದರೆ, ಯಾರೂ ಕೂಡ ಅವರ ಅಧಿಕಾರವನ್ನು ಪೂರ್ಣವಾಗಿ ಮುಗಿಸಿಲ್ಲ ಎಂಬುದೇ ಸೋಜಿಗದ ಸಂಗತಿ.
1947ರಲ್ಲಿ ಭಾರತದಿಂದ ಇಬ್ಭಾಗವಾಗಿ ಪ್ರತ್ಯೇಕ ರಾಷ್ಟ್ರವಾದ ಪಾಕಿಸ್ತಾನದ ಮೊದಲ ಪ್ರಧಾನಿಯಾಗಿ ಲಿಯಾಖತ್ ಅಲಿ ಖಾನ್ ಆಯ್ಕೆಯಾದರು. ಅವರು 4 ವರ್ಷ 63 ದಿನಗಳು ಪ್ರಧಾನಿಯಾಗಿ ಆಳ್ವಿಕೆ ಮಾಡಿದ್ದಾರೆ. ಇದಾದ ಬಳಿಕ ಸೇನಾ ಅಧಿಪತ್ಯ ಮುಂದುವರೆದು ಯಾವೊಬ್ಬ ಪ್ರಧಾನಿಯೂ ಸುಭಿಕ್ಷವಾಗಿ ಅಧಿಕಾರ ನಡೆಸಿಲ್ಲ.
ದೇಶದ ಸಂವಿಧಾನವೇ ರದ್ದು:1950 ರಲ್ಲಿ ನಾಗರಿಕ ದಂಗೆಯ ಬಳಿಕ ಆಗಿನ ಅಧ್ಯಕ್ಷ ಇಸ್ಕಂದರ್ ಮಿರ್ಜಾ ಸಂವಿಧಾನವನ್ನೇ ರದ್ದು ಮಾಡಿ, ಸೇನಾಡಳಿತವನ್ನು ಹೇರಿದ್ದರು. 13 ವರ್ಷಗಳ ಸೇನಾಡಳಿತದ ನಂತರ ಜುಲ್ಫಿಕರ್ ಅಲಿ ಭುಟ್ಟೋ ಅಧ್ಯಕ್ಷರಾಗಿ ಆಯ್ಕೆಯಾದ ಬಳಿಕ ಮತ್ತೆ ಸಂವಿಧಾನವನ್ನು ಅಂಗೀಕರಿಸಿದರು. ತದನಂತರ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿ ಪ್ರಧಾನಿಯಾದರು. ಇವರೂ ಕೂಡ 3 ವರ್ಷಗಳ ಅಧಿಕಾರ ನಡೆಸಿ ಪದತ್ಯಾಗ ಮಾಡಬೇಕಾಯಿತು.
1977ರಲ್ಲಿ ನಡೆದ ಮತ್ತೊಂದು ನಾಗರಿಕ ದಂಗೆಯಲ್ಲಿ ಸೇನಾಧಿಕಾರಿಯಾಗಿದ್ದ ಜನರಲ್ ಜಿಯಾ-ಉಲ್-ಹಕ್ ಪದಚ್ಯುತರಾದರು. ಈ ವೇಳೆ ಜುಲ್ಫೀಕರ್ ಅಲಿ ಭುಟ್ಟೋ ಅವರ ಪುತ್ರಿ ಬೆನಜೀರ್ ಭುಟ್ಟೋ ಪ್ರಧಾನಿಗಳಾಗಿ ಆಯ್ಕೆಯಾದರು. ಇವರ ಅಧಿಕಾರವು ಕೂಡ 3 ವರ್ಷದಲ್ಲಿ ಕೊನೆಗೊಂಡಿತು. ಇದಕ್ಕೆ ಕಾರಣ 1990 ರಲ್ಲಿ ಅಂದಿನ ಅಧ್ಯಕ್ಷರು ಸಂಸತ್ತನ್ನು ವಿಸರ್ಜಿಸಿದ್ದರು. ಇದರಿಂದ ಬೆನಜೀರ್ ಭುಟ್ಟೋ ಅಧಿಕಾರ ಕಳೆದುಕೊಂಡಿದ್ದರು.
ಈ ವೇಳೆ ರಾಜಕೀಯದಲ್ಲಿ ಬೆಳೆದುಕೊಂಡ ನವಾಜ್ ಷರೀಫ್ ಭ್ರಷ್ಟಾಚಾರದ ವಿರುದ್ಧ ಅಭಿಯಾನ ಆರಂಭಿಸಿ ಜನಮತಗಳಿಸಿದ ಬಳಿಕ ಅಧಿಕಾರಕ್ಕೆ ಬಂದರು. 3 ವರ್ಷಗಳ ತರುವಾಯ ಮತ್ತೆ ಪಾಕಿಸ್ತಾನ ಸೇನೆ ಒತ್ತಡ ಹೇರಿ ಷರೀಫ್ರನ್ನು ಅಧಿಕಾರಿ ಕಿತ್ತೆಸೆಯಿತು. 1993 ರಲ್ಲಿ ಮತ್ತೆ ಅಧಿಕಾರಕ್ಕೆ ಬಂದ ಬೆನಜೀರ್ ಭುಟ್ಟೋ ದೇಶವನ್ನು ಮುನ್ನಡೆಸುವ ಅವಕಾಶ ಪಡೆದುಕೊಂಡರು.
ಮತ್ತೆ ಪ್ರಜಾಪ್ರಭುತ್ವ ಸರ್ಕಾರ ಅಸ್ತಿತ್ವಕ್ಕೆ:1996 ರಲ್ಲಿ ಅಧ್ಯಕ್ಷ ಫಾರೂಕ್ ಲೆಘರಿ ಅಸೆಂಬ್ಲಿಯನ್ನು ವಿಸರ್ಜಿಸಿದರು. ಭುಟ್ಟೊ ಮತ್ತೊಮ್ಮೆ ಅಧಿಕಾರದಿಂದ ವಂಚಿತರಾಗಬೇಕಾಯಿತು. 1997 ರಲ್ಲಿ ನಡೆದ ಚುನಾವಣೆಯಲ್ಲಿ ನವಾಜ್ ಷರೀಫ್ ಅವರ ಪಾಕಿಸ್ತಾನ್ ಮುಸ್ಲಿಂ ಲೀಗ್ ಪಕ್ಷ ಬಹುಮತ ಪಡೆದು ಅಧ್ಯಕ್ಷರಾಗಿದ್ದ ಜನರಲ್ ಪರ್ವೇಜ್ ಮುಷರಫ್ರನ್ನು ಅಧಿಕಾರದಿಂದ ಕಿತ್ತು ಹಾಕುವ ಮೂಲಕ ಮತ್ತೊಮ್ಮೆ ಪ್ರಜಾಪ್ರಭುತ್ವ ಸರ್ಕಾರವನ್ನು ಅಸ್ತಿತ್ವಕ್ಕೆ ತಂದಿದ್ದರು.
ಯೂಸುಫ್ ರಾಜಾ ಗಿಲಾನಿ ದಾಖಲೆ:1999 ರಲ್ಲಿ ದೇಶದಲ್ಲಿ ತುರ್ತು ಪರಿಸ್ಥಿತಿ ಹೇರಲ್ಪಟ್ಟು ನವಾಜ್ ಷರೀಫ್ ಮತ್ತೆ ಅಧಿಕಾರ ಕಳೆದುಕೊಂಡರು. ಬಳಿಕ 4 ವರ್ಷದಲ್ಲಿ ಮೂವರು ಪ್ರಧಾನಿಗಳಾಗಿ ಮೀರ್ ಜಫರುಲ್ಲಾ ಖಾನ್ ಜಮಾಲಿ, ಚೌಧರಿ ಶುಜಾತ್ ಮತ್ತು ಶೌಕತ್ ಅಜೀಜ್ ಅಧಿಕಾರ ನಡೆಸಿದರು. 2008 ರಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲಿ ಯೂಸುಫ್ ರಜಾ ಗಿಲಾನಿ ಪ್ರಧಾನಿಯಾಗಿ ಆಯ್ಕೆಯಾದರು. 4 ವರ್ಷ 86 ದಿನಗಳು ಅಧಿಕಾರ ನಡೆಸಿದ ಗಿಲಾನಿ ಪಾಕಿಸ್ತಾನದ ಇತಿಹಾಸದಲ್ಲಿಯೇ ಅಧಿಕ ಅವಧಿಗೆ ಅಧಿಕಾರ ನಡೆಸಿದ ಪ್ರಧಾನಿಯಾಗಿದ್ದಾರೆ.
ಇದಾದ ಬಳಿಕ ನವಾಜ್ ಷರೀಫ್ ಎರಡನೇ ಬಾರಿಗೆ ಪ್ರಧಾನಿಯಾಗಿ ಆಯ್ಕೆಯಾದರೂ 4 ವರ್ಷದಲ್ಲಿಯೇ ಅಧಿಕಾರ ಕಳೆದುಕೊಂಡರು. ಬಳಿಕ ಶಾಹಿದ್ ಖಾಕನ್ ಅಬ್ಬಾಸಿ ಪ್ರಧಾನಿಯಾಗಿ 303 ದಿನ ಅಧಿಕಾರದಲ್ಲಿದ್ದರು.
ತೂಗುಯ್ಯಾಲೆಯಲ್ಲಿ ಇಮ್ರಾನ್ ಖಾನ್:ಇನ್ನು 2018ರಲ್ಲಿ ಪಾಕಿಸ್ತಾನದ ಪ್ರಧಾನಿಯಾಗಿ ಆಯ್ಕೆಯಾದ ಇಮ್ರಾನ್ ಖಾನ್ ಮೇಲೆ ಇದೀಗ ಭಾರಿ ಭ್ರಷ್ಟಾಚಾರ ಆರೋಪ ಕೇಳಿ ಬಂದಿದೆ. ಏಪ್ರಿಲ್ 4 ರಂದು ಇಮ್ರಾನ್ ಖಾನ್ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡನೆಗೆ ವಿಪಕ್ಷಗಳು ಸಿದ್ಧವಾಗಿದೆ. ಒಂದು ವೇಳೆ ನಿರ್ಣಯ ಪಾಸಾದಲ್ಲಿ ಇಮ್ರಾನ್(3 ವರ್ಷ 222 ದಿನ) ಅಧಿಕಾರದಿಂದ ಕೆಳಗಿಳಿಯಲಿದ್ದು, ಅವಧಿಪೂರ್ವವೇ ಅಧಿಕಾರದಿಂದ ನಿರ್ಗಮಿಸಲಿದ್ದಾರೆ.
ಇದನ್ನೂ ಓದಿ:ಭ್ರಷ್ಟಾಚಾರ: 45 ಇಲಾಖೆಗಳ 715 ಕೇಂದ್ರ ಸರ್ಕಾರಿ ನೌಕರರ ವಿರುದ್ಧ'ಸಿಬಿಐ' ಕೇಸ್
