ಮೋಚಾ ಚಂಡಮಾರುತಕ್ಕೆ ಮ್ಯಾನ್ಮಾರ್ ತತ್ತರ; ಸಾವಿನ ಸಂಖ್ಯೆ 81ಕ್ಕೇರಿಕೆ: ಬಾಂಗ್ಲಾದಲ್ಲೂ ಅಪಾರ ನಷ್ಟ

ಮ್ಯಾನ್ಮಾರ್ ಮತ್ತು ಬಾಂಗ್ಲಾದೇಶಗಳು ಚಂಡಮಾರುತಕ್ಕೆ ನಲುಗಿವೆ.

ಬ್ಯಾಂಕಾಕ್: ಮ್ಯಾನ್ಮಾರ್ ಮತ್ತು ಬಾಂಗ್ಲಾದೇಶದಲ್ಲಿ ಮೋಚಾ ಚಂಡಮಾರುತಕ್ಕೆ ಜನ ತತ್ತರಿಸಿ ಹೋಗಿದ್ದಾರೆ. ಮ್ಯಾನ್ಮಾರ್ ದೇಶದಲ್ಲಿ 81 ಕ್ಕೂ ಅಧಿಕ ಮಂದಿ ಸಾವನ್ನಪ್ಪಿದ್ದು, ನೂರಾರು ಜನ ನಾಪತ್ತೆಯಾಗಿದ್ದಾರೆ. ರಕ್ಷಣಾ ಕಾರ್ಯಚರಣೆ ಮುಂದುವರೆದಿದೆ. ಸಂಪರ್ಕ ವ್ಯವಸ್ಥೆ ಹದಗೆಟ್ಟಿದೆ. ದೊಡ್ಡ ಪ್ರಮಾಣದ ಪ್ರವಾಹಕ್ಕೆ ಭಾರಿ ಹಾನಿಯಾಗಿದೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ಮೋಚಾ ಚಂಡಮಾರುತಕ್ಕೆ ನಲುಗಿದ ಮ್ಯಾನ್ಮಾರ್

ಭಾನುವಾರ ಮಧ್ಯಾಹ್ನದ ನಂತರ 209 ಕಿಲೋಮೀಟರ್ (130 ಮೈಲುಗಳು) ವೇಗದ ಗಾಳಿಯೊಂದಿಗೆ ರಾಖೈನ್ ರಾಜ್ಯದ ಸಿಟ್ವೆ ಟೌನ್‌ಶಿಪ್ ಬಳಿ ಮೋಚಾ ಚಂಡಮಾರುತ ಬಂದು ಅಪ್ಪಳಿಸಿದ್ದು, ಭೂಕುಸಿತ ಉಂಟು ಮಾಡಿತ್ತು. ಸೋಮವಾರ ಮಧ್ಯಾಹ್ನದ ವೇಳೆಗೆ ಪರಿಸ್ಥಿತಿ ದುರ್ಬಲಗೊಂಡಿದ್ದು, ವ್ಯಾಪಕ ಪ್ರವಾಹವುಂಟು ಮಾಡಿತ್ತು. ಭಾರಿ ಗಾಳಿಯ ರಭಸಕ್ಕೆ ಕಟ್ಟಡಗಳ ಮೇಲ್ಛಾವಣಿಗಳು ಕಿತ್ತುಹೋಗಿದ್ದು, ಫೋನ್ ಟವರ್​ಗಳು ನೆಲಕ್ಕುರುಳಿವೆ.

ಪ್ರವಾಹಕ್ಕೂ ಮುನ್ನ ಪ್ರವಾಹದ ನಂತರದ ದೃಶ್ಯ

10 ಶತಮಾನಗಳ ಹಿಂದೆ ಮ್ಯಾನ್ಮಾರ್‌ನ ರಾಜಧಾನಿಯಾಗಿದ್ದ ಯುನೆಸ್ಕೋ ವಿಶ್ವ ಪರಂಪರೆಯ ತಾಣವಾದ ಬಗಾನ್‌ನ ಕೇಂದ್ರ ನಗರ ಸೇರಿದಂತೆ ಮತ್ತಷ್ಟು ಒಳನಾಡಿನ ಪ್ರದೇಶಗಳು ಹಾನಿಗೊಳಗಾಗಿವೆ. ಭೀಕರ ಚಂಡಮಾರುತಕ್ಕೆ 11,532 ಮನೆಗಳು, 73 ಧಾರ್ಮಿಕ ಕಟ್ಟಡಗಳು, 47 ಮಠಗಳು, 163 ಶಾಲೆಗಳು, 29 ಆಸ್ಪತ್ರೆಗಳು ಮತ್ತು ಚಿಕಿತ್ಸಾಲಯಗಳು ಹಾಗೂ 112 ಸರ್ಕಾರಿ ಕಟ್ಟಡಗಳು ಹಾನಿಗೊಳಗಾಗಿವೆ. ಹಾಗೂ ನೂರಾರು ಜನರು ನಾಪತ್ತೆಯಾಗಿದ್ದಾರೆ. ಸಂತ್ರಸ್ತರನ್ನು ಶಿಬಿರಗಳಿಗೆ ಸ್ಥಳಾಂತರ ಮಾಡಲಾಗಿದೆ. ರಾಖೈನ್‌ ರಾಜ್ಯದ ಉತ್ತರದಲ್ಲಿ 17 ಮತ್ತು ಚಿನ್ ರಾಜ್ಯದಲ್ಲಿ ನಾಲ್ಕು ಟೌನ್‌ಶಿಪ್‌ಗಳಿಗೆ ಸರ್ಕಾರವು ವಿಪತ್ತು ಘೋಷಣೆಗಳನ್ನು ಹೊರಡಿಸಿದೆ ಎಂದು ಮ್ಯಾನ್ಮಾರ್ ಸರ್ಕಾರಿ ಟೆಲಿವಿಷನ್ MRTV ಮಂಗಳವಾರ ವರದಿ ಮಾಡಿದೆ.

ಹೆಚ್ಚಿನ ಗಾಳಿಯಿಂದಾಗಿ ದೂರಸಂಪರ್ಕ ಸೌಲಭ್ಯಗಳು ಹಾನಿಗೊಳಗಾದ ಕಾರಣ ಸಾವು-ನೋವುಗಳು ಮತ್ತು ಹಾನಿಯ ಪ್ರಮಾಣವನ್ನು ದೃಢೀಕರಿಸುವುದು ಕಷ್ಟವಾಗುತ್ತಿದೆ. ಚಂಡಮಾರುತದ ಆಗಮನಕ್ಕೂ ಮುನ್ನ ಶಿಬಿರಗಳಲ್ಲಿರುವ ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸುವಂತೆ ಅಧಿಕಾರಿಗಳು ಎಚ್ಚರಿಸಿದ್ದರು. ಆದರೆ, ಕೆಲವರು ನಿರ್ಲಕ್ಷ ತೋರಿದ್ದರಿಂದ ಅನಾಹುತ ಎದುರಿಸುವಂತಾಗಿದೆ ಎಂದು ಮಾಧ್ಯಮಗಳು ತಿಳಿಸಿವೆ.

ಇದನ್ನೂ ಓದಿ :ರುದ್ರಾವತಾರ ತಾಳಿದ ಮೋಚಾ ಚಂಡಮಾರುತ: ಸೈಕ್ಲೋನ್​ಗೆ ಆರು ಜನ ಬಲಿ, ಮಿಜೋರಾಂನಲ್ಲಿ 236 ಮನೆಗಳಿಗೆ ಹಾನಿ

ಮ್ಯಾನ್ಮಾರ್‌ನ ಪ್ರಮುಖ ಆಕರ್ಷಣೀಯ ಪ್ರವಾಸಿ ಸ್ಥಳಗಳಲ್ಲಿ ಒಂದಾಗಿರುವ ಬಗಾನ್‌ನಲ್ಲಿ ಭಾರಿ ಮಳೆ ಸುರಿದು ಪ್ರವಾಹ ಉಂಟಾಗಿತ್ತು. ಪರಿಣಾಮ, ನಾಲ್ಕು ದೇವಾಲಯಗಳ ಅಡಿಪಾಯ ಕುಸಿದಿದ್ದು, ಮ್ಯಾನ್ಮಾರ್‌ನ ಮಿಲಿಟರಿ ಸರ್ಕಾರದ ಮುಖ್ಯಸ್ಥ, ಹಿರಿಯ ಜನರಲ್ ಮಿನ್ ಆಂಗ್ ಹ್ಲೈಂಗ್ ಅವರು ಹಾನಿಗೀಡಾದ ಸ್ಥಳ ಪರಿಶೀಲಿಸಲು ಮಂಗಳವಾರ ಭೇಟಿ ನೀಡಿದ್ದರು.

ಪ್ರವಾಹಕ್ಕೂ ಮುನ್ನ ಪ್ರವಾಹದ ನಂತರದ ದೃಶ್ಯ

ಇನ್ನು ಬಾಂಗ್ಲಾದೇಶದ ಕಾಕ್ಸ್ ಬಜಾರ್ ಜಿಲ್ಲೆಯಲ್ಲಿರುವ ಅತಿದೊಡ್ಡ ನಿರಾಶ್ರಿತರ ಶಿಬಿರದಲ್ಲಿ ಮೋಚಾ ಚಂಡಮಾರುತದ ಹೊಡೆತಕ್ಕೆ ಸಿಲುಕಿದ ಸಾವಿರಾರು ರೋಹಿಂಗ್ಯಾಗಳನ್ನು ಸ್ಥಳಾಂತರಿಸಲಾಗಿದೆ. 700,000 ಕ್ಕೂ ಹೆಚ್ಚು ಜನರನ್ನು ಶಾಲೆಗಳು, ಧಾರ್ಮಿಕ ತಾಣಗಳೂ ಸೇರಿದಂತೆ ತಾತ್ಕಾಲಿಕ ಶಿಬಿರಗಳಿಗೆ ಸ್ಥಳಾಂತರಿಸಲಾಗಿದೆ ಎಂದು ಬಾಂಗ್ಲಾದೇಶದ ಪ್ರಧಾನಿ ಶೇಖ್ ಹಸೀನಾ ಹೇಳಿದ್ದಾರೆ.

ಚಂಡಮಾರುತವು ನಿರಾಶ್ರಿತರ ವಸಾಹತುಗಳಿಗೆ ನೇರವಾಗಿ ಅಪ್ಪಳಿಸಲಿಲ್ಲವಾದರೂ, ದೊಡ್ಡ ಹಾನಿಯನ್ನುಂಟುಮಾಡಿದೆ. ಸೈಕ್ಲೋನ್​ ಹಿನ್ನೆಲೆ ಭೂಕುಸಿತಗಳು ಮತ್ತು ಹಠಾತ್ ಪ್ರವಾಹ ಸಂಭವಿಸುತ್ತಿದೆ ಎಂದು ಪ್ರಮುಖ ನೆರವು ಸಂಸ್ಥೆಯಾದ ಕ್ಯಾಥೋಲಿಕ್ ರಿಲೀಫ್ ಸರ್ವೀಸಸ್‌ನ ಬಾಂಗ್ಲಾದೇಶದ ತುರ್ತು ಸಂಯೋಜಕ ಅಲೆಕ್ಸಿಯಾ ರಿವಿಯೆರ್ ಹೇಳಿಕೆಯಲ್ಲಿ ಕಳವಳ ವ್ಯಕ್ತಪಡಿಸಿದ್ದಾರೆ.

ಇದೀಗ ಬಾಂಗ್ಲಾದೇಶಕ್ಕೆ ಬಂದು ಅಪ್ಪಳಿಸಿರುವ ಮೋಚಾ ಸೈಕ್ಲೋನ್ ದಶಕಗಳಲ್ಲಿ ಸಂಭವಿಸಿದ ಅತಿದೊಡ್ಡ ಚಂಡಮಾರುತಗಳಲ್ಲಿ ಒಂದಾಗಿದೆ. 2007 ರಲ್ಲಿ ಸಂಭವಿಸಿದ ಸಿದ್ರ್ ಚಂಡಮಾರುತವು 3,000 ಕ್ಕೂ ಹೆಚ್ಚು ಜನರನ್ನುಬಲಿ ಪಡೆದಿತ್ತು, ಶತಕೋಟಿ ಡಾಲರ್‌ಗಳಷ್ಟು ಹಾನಿಯನ್ನುಂಟುಮಾಡಿತ್ತು.