ಇಸ್ಲಾಮಾಬಾದ್(ಪಾಕಿಸ್ತಾನ):ಇಮ್ರಾನ್ ಖಾನ್ ದೇಶದ ಜನರನ್ನು ದಾರಿ ತಪ್ಪಿಸುತ್ತಿದ್ದು, ಅದನ್ನು ಸಹಿಸಲಾಗದೇ ನಾನು ಆತನನ್ನು ಕೊಲೆ ಮಾಡಲು ಬಯಸಿದ್ದೆ. ಬೇರೆ ಯಾರ ಮೇಲೂ ದಾಳಿ ಮಾಡಲು ನಾನು ಗುಂಡು ಹಾರಿಸಿಲ್ಲ..
ಇದು ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಮೇಲೆ ಗುಂಡಿನ ದಾಳಿ ನಡೆಸಿದ ಆರೋಪಿಯ ಹೇಳಿಕೆ. ಪಾಕಿಸ್ತಾನ ಪಂಜಾಬ್ನ ವಜೀರಾಬಾದ್ನಲ್ಲಿ ಮಾಜಿ ಪ್ರಧಾನಿ ನಡೆಸುತ್ತಿದ್ದ ರ‍್ಯಾಲಿಯ ವೇಳೆ ಇಮ್ರಾನ್ ಖಾನ್ ಗುರಿಯಾಗಿಸಿಕೊಂಡು ವ್ಯಕ್ತಿಯೊಬ್ಬ ಗುಂಡಿನ ದಾಳಿ ನಡೆಸಿದ್ದ. ಇದರಲ್ಲಿ ಇಮ್ರಾನ್ ಮತ್ತು ಅವರ ಆಪ್ತ ಸಹಾಯಕನಿಗೆ ಗುಂಡು ತಾಕಿ ಗಾಯಗೊಂಡಿದ್ದಾರೆ.
ಸ್ಥಳದಲ್ಲೇ ಆರೋಪಿಯನ್ನು ಬಂಧಿಸಿದ ಪೊಲೀಸರು ವಿಚಾರಣೆ ನಡೆಸಿದ್ದು, ಇದರ ವಿಡಿಯೋ ಹರಿಬಿಟ್ಟಿದ್ದಾರೆ. ವಿಡಿಯೋದಲ್ಲಿ ಆರೋಪಿ ನೀಡಿದ ಹೇಳಿಕೆಯಂತೆ, ಇಮ್ರಾನ್ ಖಾನ್ ದೇಶದ ಜನರ ದರಿ ತಪ್ಪಿಸುತ್ತಿದ್ದಾರೆ. ಇದರಿಂದ ಬೇಸತ್ತಿದ್ದ ನನಗೆ ಅವರನ್ನು ಹತ್ಯೆ ಮಾಡಬೇಕು ಎಂದು ರ‍್ಯಾಲಿಯಲ್ಲಿ ಭಾಗಿಯಾದೆ. ಬಳಿಕ ಖಾನ್ ಇದ್ದ ವಾಹನದ ಹತ್ತಿರ ತೆರಳಿ ಗುಂಡಿನ ದಾಳಿ ಮಾಡಿದೆ. ಇಮ್ರಾನ್ ಅವರನ್ನು ಮಾತ್ರ ಹತ್ಯೆ ಮಾಡಲು ಬಯಸಿದ್ದೆ. ಬೇರೆ ಯಾರ ಮೇಲೂ ನಾನು ಗುಂಡು ಹಾರಿಸಿಲ್ಲ ಎಂದು ಹೇಳಿದ್ದಾನೆ.