ಸಲ್ಮಾನ್​ ರಶ್ದಿ ಮೇಲಿನ ದಾಳಿ ಬಳಿಕ ಹ್ಯಾರಿ ಪಾಟರ್‌ ಲೇಖಕಿ ಜೆ ಕೆ ರೌಲಿಂಗ್‌ಗೆ ಕೊಲೆ ಬೆದರಿಕೆ

ಲೇಖಕ ಸಲ್ಮಾನ್​ ರಶ್ದಿ ಅವರ ಮೇಲಾದ ದಾಳಿಯನ್ನು ಖಂಡಿಸಿದ ಲೇಖಕಿ ಜೆ ಕೆ ರೌಲಿಂಗ್​ ಅವರಿಗೆ ಟ್ವಿಟರ್​ ಬಳಕೆದಾರನೊಬ್ಬ ಕೊಲೆ ಬೆದರಿಕೆ ಹಾಕಿದ್ದಾನೆ. ಈ ಬಗ್ಗೆ ಪೊಲೀಸ್ ತನಿಖೆ ನಡೆಯುತ್ತಿದೆ.

ನ್ಯೂಯಾರ್ಕ್:ನ್ಯೂಯಾರ್ಕ್​ನಲ್ಲಿ ಭಾರತ ಮೂಲದ ವಿವಾದಾತ್ಮಕ ಲೇಖಕ ಸಲ್ಮಾನ್ ರಶ್ದಿ ಅವರ ಮೇಲೆ ನಡೆದ ದಾಳಿಯನ್ನು ಟೀಕಿಸಿದ್ದಕ್ಕಾಗಿ ಹ್ಯಾರಿ ಪಾಟರ್ ಸರಣಿಯ ಪ್ರಸಿದ್ಧ ಲೇಖಕಿ ಜೆ ಕೆ ರೌಲಿಂಗ್ ಅವರಿಗೆ ಜೀವ ಬೆದರಿಕೆ ಹಾಕಲಾಗಿದೆ. ಟ್ವೀಟ್​ನಲ್ಲಿ ಬಂದ ಬೆದರಿಕೆ ಸಂದೇಶದ ಸ್ಕ್ರೀನ್​ಶಾಟ್​ ಅನ್ನು ಅವರು ಹಂಚಿಕೊಂಡಿದ್ದಾರೆ.

ರೌಲಿಂಗ್​ ಅವರು, ಲೇಖಕ ರಶ್ದಿ ಅವರನ್ನು ಚಾಕುವಿನಿಂದ ಇರಿದ ಆರೋಪಿಯ ಚಿತ್ರವನ್ನು ಟ್ವೀಟ್​ ಮಾಡಿ ಭಯೋತ್ಪಾದನೆ, ರಕ್ತಪಾತವನ್ನು ಬೆಳೆಸಲಾಗದು. ರಶ್ದಿ ಮೇಲಾದ ದಾಳಿ ನೋವಿನ ಸಂಗತಿ ಎಂದು ಬರೆದಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿರುವ ಮೀರ್​ ಅಸಿಫ್​ ಅಜಿಜ್​ ಹೆಸರಿನ ಟ್ವಿಟರ್​ ಬಳಕೆದಾರ, ಚಿಂತಿಸಬೇಡಿ ಮುಂದಿನ ಸರದಿ ನಿಮ್ಮದೇ ಎಂದಿದ್ದಾನೆ.

ಈ ಬೆದರಿಕೆ ಸಂದೇಶದ ಸ್ಕ್ರೀನ್​ಶಾಟ್​ ಟ್ವೀಟ್​ ಮಾಡಿರುವ ರೌಲಿಂಗ್​, ಭಯೋತ್ಪಾದನೆ, ಉಗ್ರವಾದ ಹಿಂಸೆಯ ವೈಭವೀಕರಣವೇ ನಿಮ್ಮ ಮಾರ್ಗಸೂಚಿಗಳೇ ಎಂದು ಪ್ರಶ್ನಿಸಿ, ಇವನ್ನು ನಾವು ಬಯಸುದಿಲ್ಲ. ಒಬ್ಬ ವ್ಯಕ್ತಿ, ಗುಂಪನ್ನು ಇದರಿಂದ ಬೆದರಿಸಬಾರದು. ಹಿಂಸೆಯನ್ನು ವೈಭವೀಕರಣ ಮಾಡಬಾರದು ಎಂದು ಹೇಳಿದ್ದಾರೆ.

ಶುಕ್ರವಾರದಂದು ಪಶ್ಚಿಮ ನ್ಯೂಯಾರ್ಕ್‌ನಲ್ಲಿ ನಡೆದ ಸಾಹಿತ್ಯಿಕ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡಿದ್ದ ಸಲ್ಮಾನ್​ ರಶ್ದಿ ಅವರ ಮೇಲೆ ನ್ಯೂಜೆರ್ಸಿಯ ಹದಿ ಮಾತರ್ ಎಂಬಾತ ಚಾಕುವಿನಿಂದ 14 ಬಾರಿ ಇರಿದಿದ್ದಾನೆ.

ಇದನ್ನೂ ಓದಿ:ವಿವಾದಾತ್ಮಕ ಲೇಖಕ ಸಲ್ಮಾನ್​ ರಶ್ದಿ ಸ್ಥಿತಿ ಗಂಭೀರ.. ಕಣ್ಣು ಯಕೃತ್​ಗೆ ತೀವ್ರ ಹಾನಿ