ಇಸ್ರೇಲ್‌ ವೃದ್ಧೆಯನ್ನು ಬರ್ಬರವಾಗಿ ಕೊಂದು ಫೇಸ್​ಬುಕ್​ಗೆ ವಿಡಿಯೋ ಅಪ್ಲೋಡ್; ಹಮಾಸ್​ ಉಗ್ರರ ಪೈಶಾಚಿಕ ಕೃತ್ಯ

ಅಸಹಾಯಕ ವೃದ್ಧೆಯೊಬ್ಬಳನ್ನು ಕೊಂದು ಅದರ ವಿಡಿಯೋವನ್ನು ಫೇಸ್​ಬುಕ್‌ಗೆ ಅಪ್ಲೋಡ್​ ಮಾಡಿದ ಹಮಾಸ್ ಉಗ್ರರು ತಮ್ಮ ದುಷ್ಟತನವನ್ನು ಜಗತ್ತಿಗೆ ತೋರಿಸಿದ್ದಾರೆ.

ಟೆಲ್ ಅವಿವ್ (ಇಸ್ರೇಲ್) : ಇಸ್ರೇಲ್​​ ನಾಗರಿಕ ವೃದ್ಧೆಯೊಬ್ಬಳನ್ನು ಹಮಾಸ್​ ಉಗ್ರರು ಬರ್ಬರವಾಗಿ ಕೊಲೆ ಮಾಡಿ, ಭೀಭತ್ಸ ದೃಶ್ಯಾವಳಿಗಳನ್ನು ಇಂಟರ್​ನೆಟ್​ನಲ್ಲಿ ವೈರಲ್ ಮಾಡಿದ್ದಾರೆ. ವೃದ್ಧೆಯನ್ನು ಕೊಂದು ಆಕೆಯ ಮೊಬೈಲ್ ಫೋನ್​ನಿಂದಲೇ ಆ ವಿಡಿಯೋಗಳನ್ನು ಫೇಸ್​ಬುಕ್​ಗೆ ಅಪ್ಲೋಡ್​ ಮಾಡಿದ ಹಮಾಸ್ ಉಗ್ರರು ತಮ್ಮ ಕ್ರೂರತನವನ್ನು ಜಗತ್ತಿಗೆ ಪ್ರದರ್ಶಿಸಿದ್ದಾರೆ.

ಫೇಸ್​ಬುಕ್​ನಲ್ಲಿ ತನ್ನ ಸ್ವಂತ ಅಜ್ಜಿಯನ್ನು ಕೊಲೆ ಮಾಡಿದ ದೃಶ್ಯ ನೋಡಿದ ವೃದ್ಧೆಯ ಮೊಮ್ಮಗಳಾದ ಮೋರ್ ಬೈಡರ್​ ಈ ಬಗ್ಗೆ ತಮ್ಮ ನೋವನ್ನು ಹಂಚಿಕೊಂಡಿದ್ದಾರೆ. "ಈ ಘಟನೆ ನಮ್ಮ ಜೀವನದ ಅತ್ಯಂತ ಕೆಟ್ಟ ಘಳಿಗೆಗಳಲ್ಲೊಂದಾಗಿದೆ. ನನ್ನ ಅಜ್ಜಿ ನನ್ನ ಜಗತ್ತೇ ಆಗಿದ್ದರು. ನನ್ನ ಹಾಗೂ ನಮ್ಮ ಕುಟುಂಬದ ಜೀವನದ ಬೆಳಕು, ನಮ್ಮ ಜೀವನದ ಆಧಾರಸ್ತಂಭ ಅವರಾಗಿದ್ದರು" ಎಂದು ಬೈಡರ್​ ಶ್ರದ್ಧಾಂಜಲಿ ಸಂದೇಶದಲ್ಲಿ ಬರೆದಿದ್ದಾರೆ.

"ಜೀವನದುದ್ದಕ್ಕೂ ಕಿಬ್ಬುಟ್ಜ್ ನಿರ್ ಓಜ್ ನಿವಾಸಿಯಾಗಿದ್ದ ನನ್ನ ಅಜ್ಜಿಯನ್ನು ನಿನ್ನೆ ಅವರ ಮನೆಗೆ ನುಗ್ಗಿ ಹಮಾಸ್ ಭಯೋತ್ಪಾದಕರು ಕೊಲೆ ಮಾಡಿದ್ದಾರೆ. ದಕ್ಷಿಣ ಇಸ್ರೇಲ್​ನ ಕಿಬ್ಬುಟ್ಜ್ ನಿರ್ ಓಜ್ ಮನೆಗೆ ಬಂದ ಭಯೋತ್ಪಾದಕನೊಬ್ಬ ಆಕೆಯನ್ನು ಕೊಂದಿದ್ದಾನೆ. ಆತ ಆಕೆಯ ಫೋನ್ ತೆಗೆದುಕೊಂಡು ಕೊಲೆಯಯನ್ನು ಚಿತ್ರೀಕರಿಸಿ ಅದನ್ನು ಆಕೆಯ ಫೇಸ್​ಬುಕ್​​ನಲ್ಲಿ ಶೇರ್​ ಮಾಡಿದ್ದಾನೆ" ಎಂದು ಬೈಡರ್ ಹೇಳಿದ್ದಾರೆ.

ಗಾಜಾ ಪಟ್ಟಿ ಪ್ರದೇಶದ ನಾಗರಿಕ ಪ್ರದೇಶದ ಮೇಲೆ ಯಾವುದೇ ಮುನ್ಸೂಚನೆ ನೀಡದೆ ಇಸ್ರೇಲ್ ದಾಳಿ ಮಾಡಿದಾಗಲೆಲ್ಲ ಓರ್ವ ಇಸ್ರೇಲ್ ಒತ್ತೆಯಾಳನ್ನು ಕೊಲ್ಲುವುದಾಗಿ ಪ್ಯಾಲೆಸ್ಟೈನ್​ನ ಹಮಾಸ್​ ಉಗ್ರರು ಎಚ್ಚರಿಕೆ ನೀಡಿದ್ದಾರೆ. ಸೋಮವಾರ ರಾತ್ರಿ ಬಿಡುಗಡೆ ಮಾಡಿದ ಆಡಿಯೊದಲ್ಲಿ, ಕಸ್ಸಾಮ್ ಬ್ರಿಗೇಡ್​ನ ವಕ್ತಾರ ಅಬು ಒಬೇದಾ, "ನಾವು ಇದನ್ನು ಕೊನೆಗೊಳಿಸಲು ನಿರ್ಧರಿಸಿದ್ದೇವೆ ಮತ್ತು ಈಗಿರುವಂತೆ ಪೂರ್ವ ಎಚ್ಚರಿಕೆಯಿಲ್ಲದೆ ನಮ್ಮ ಜನರನ್ನು ಗುರಿಯಾಗಿಸಿ ಬಾಂಬ್ ದಾಳಿ ಮಾಡಿದರೆ ನಾವು ಹಿಡಿದಿಟ್ಟುಕೊಂಡಿರುವ ಇಸ್ರೇಲ್ ನಾಗರಿಕರನ್ನು ಒಬ್ಬೊಬ್ಬರನ್ನಾಗಿ ಕೊಲ್ಲುತ್ತೇವೆ" ಎಂದು ಹೇಳಿದ್ದಾನೆ.

ಮತ್ತೊಂದೆಡೆ, ಇಸ್ರೇಲ್​ನಿಂದ ಅಪಹರಿಸಲ್ಪಟ್ಟು ಗಾಜಾದಲ್ಲಿ ಬಂಧಿಸಿ ಇಡಲಾಗಿರುವ ಯಾವುದೇ ಒತ್ತೆಯಾಳುಗಳಿಗೆ ಹಾನಿ ಮಾಡದಂತೆ ಇಸ್ರೇಲ್​ನ ವಿದೇಶಾಂಗ ಸಚಿವರು ಹಮಾಸ್​ಗೆ ಎಚ್ಚರಿಕೆ ನೀಡಿದ್ದಾರೆ. ಗಾಜಾ ಗಡಿಯ ಮೇಲೆ ಮತ್ತೆ ಸಂಪೂರ್ಣ ನಿಯಂತ್ರಣ ಸಾಧಿಸಿರುವುದಾಗಿ ಹೇಳಿರುವ ಇಸ್ರೇಲ್ ಮಿಲಿಟರಿ ವಕ್ತಾರರು, ಹಮಾಸ್​ ಉಗ್ರರು ಗಡಿ ಬೇಲಿ ನಾಶಪಡಿಸಿದ ಸ್ಥಳಗಳಲ್ಲಿ ನೆಲಬಾಂಬ್​ಗಳನ್ನು ಅಡಗಿಸಿ ಇಡುತ್ತಿರುವುದಾಗಿ ತಿಳಿಸಿದ್ದಾರೆ.

ಇದನ್ನೂ ಓದಿ : ಅರಬ್‌ನಾಡಿನಲ್ಲಿ ಮೊದಲ ಹಿಂದು ದೇಗುಲ ನಿರ್ಮಾಣ: ಮುಂದಿನ ವರ್ಷ ಪ್ರಧಾನಿ ಮೋದಿಯಿಂದ ಉದ್ಘಾಟನೆ