ಕದನ ವಿರಾಮ: ಹಮಾಸ್​ನಿಂದ 25 ಒತ್ತೆಯಾಳುಗಳ ಬಿಡುಗಡೆ, ಇಸ್ರೇಲ್​ನಿಂದ 39 ಪ್ಯಾಲೆಸ್ತೀನ್ ಕೈದಿಗಳು ಬಂಧಮುಕ್ತ

Israel Palestine Ceasefire 2023: ಕಳೆದ ಒಂದೂವರೆ ತಿಂಗಳಿನಿಂದ ಇಸ್ರೇಲ್ ಮತ್ತು ಹಮಾಸ್ ನಡುವೆ ನಡೆಯುತ್ತಿರುವ ಭೀಕರ ಯುದ್ಧದಲ್ಲಿ ನಿರ್ಣಾಯಕ ಬೆಳವಣಿಗೆ ನಡೆದಿದೆ. ಹಮಾಸ್ ತನ್ನ 240 ಒತ್ತೆಯಾಳುಗಳಲ್ಲಿ 25 ಜನರನ್ನು ತಾತ್ಕಾಲಿಕ ಕದನ ವಿರಾಮದ ಭಾಗವಾಗಿ ಮೊದಲ ಹಂತದಲ್ಲಿ ಬಿಡುಗಡೆ ಮಾಡಿದೆ.

ಗಾಜಾ:ಹಮಾಸ್ ಮತ್ತು ಇಸ್ರೇಲ್ ನಡುವಿನ ತಾತ್ಕಾಲಿಕ ಕದನ ವಿರಾಮ ಒಪ್ಪಂದದ ಭಾಗವಾಗಿ ಒತ್ತೆಯಾಳುಗಳ ಬಿಡುಗಡೆ ಪ್ರಕ್ರಿಯೆ ಪ್ರಾರಂಭವಾಗಿದೆ. ಮೊದಲ ಹಂತದಲ್ಲಿ ಹಮಾಸ್ 25 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿತು. ಅವರಲ್ಲಿ 13 ಮಂದಿ ಇಸ್ರೇಲ್‌ನವರು ಮತ್ತು 12 ಮಂದಿ ಥೈಲ್ಯಾಂಡ್‌ನ ನಾಗರಿಕರು ಸೇರಿದ್ದಾರೆ. 13 ಇಸ್ರೇಲಿಗಳನ್ನು ರೆಡ್‌ಕ್ರಾಸ್‌ಗೆ ಹಮಾಸ್ ಹಸ್ತಾಂತರಿಸಿತು ಮತ್ತು ಅವರನ್ನು ರಫಾ ಗಡಿಗೆ ಕರೆದೊಯ್ಯಲಾಯಿತು. ಅಲ್ಲಿ ಬಂಧಿತರಿಗೆ ವೈದ್ಯಕೀಯ ಪರೀಕ್ಷೆ ನಡೆಸಿ ಈಜಿಪ್ಟಿಗೆ ಕರೆದೊಯ್ಯಲಾಯಿತು.

ಒತ್ತೆಯಾಳುಗಳ ಬಿಡುಗಡೆ ಪ್ರಾರಂಭ:ಮತ್ತೊಂದೆಡೆ, ಹಮಾಸ್ ತಮ್ಮ ದೇಶದ 12 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿದೆ ಎಂದು ಥಾಯ್ಲೆಂಡ್ ಘೋಷಿಸಿದೆ. ಈ ವಿಷಯವನ್ನು ಥಾಯ್ಲೆಂಡ್ ಪ್ರಧಾನಿ ಶ್ರೆತಾ ಥಾವಿಸಿನ್ ಖಚಿತಪಡಿಸಿದ್ದಾರೆ. ಅವರನ್ನು ಕರೆತರಲು ರಾಯಭಾರಿ ತಂಡಗಳು ತೆರಳಿವೆ ಎಂದು ತಿಳಿದುಬಂದಿದೆ.

ಒಪ್ಪಂದದ ಪ್ರಕಾರ ಇಸ್ರೇಲ್ ತನ್ನ ಜೈಲುಗಳಿಂದ 39 ಪ್ಯಾಲೆಸ್ತೀನ್ ಮಹಿಳೆಯರು ಮತ್ತು ಮಕ್ಕಳನ್ನು ಬಿಡುಗಡೆ ಮಾಡಿದೆ. ಒಪ್ಪಂದದ ಮಧ್ಯಸ್ಥಿಕೆ ವಹಿಸಿದ್ದ ಕತಾರ್ ಇದನ್ನು ಖಚಿತಪಡಿಸಿದೆ. ಅವರನ್ನು ಜೈಲಿನಲ್ಲಿ ಇರಿಸಲು ಕಾರಣಗಳನ್ನು ಇಸ್ರೇಲ್ ಸೇನೆ ಬಹಿರಂಗಪಡಿಸಿದೆ. ಅವರು ಜೈಲಿನಲ್ಲಿಟ್ಟವರಲ್ಲಿ ಅನೇಕರು ಇಸ್ರೇಲ್ ಸೇನೆಯ ಮೇಲೆ ಕಲ್ಲು ಎಸೆದವರಾಗಿದ್ದಾರೆ ಎಂದು ಕತಾರ್​ ಹೇಳಿದೆ.

'ಎಲ್ಲಾ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಲು ಬದ್ಧ': ಹಮಾಸ್ ಒತ್ತೆಯಾಳುಗಳ ಬಿಡುಗಡೆಗೆ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಪ್ರತಿಕ್ರಿಯಿಸಿದ್ದಾರೆ. ಎಲ್ಲಾ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಲು ತಮ್ಮ ಸರ್ಕಾರ ಬದ್ಧವಾಗಿದೆ. ಇಸ್ರೇಲ್ ನಾಗರಿಕರು ತಮ್ಮದೇ ಆದ ಜಗತ್ತಿಗೆ ಬರಲು ಸಂತೋಷಪಡುತ್ತಾರೆ ಎಂದು ನೆತನ್ಯಾಹು ಹೇಳಿದರು.

ಒತ್ತೆಯಾಳುಗಳ ಬಿಡುಗಡೆಗೆ ಪ್ರತಿಕ್ರಿಯಿಸಿದ ಅಮೆರಿಕ, ಮೊದಲ ಹಂತದಲ್ಲಿ ಹಮಾಸ್ ಬಿಡುಗಡೆ ಮಾಡಿದವರಲ್ಲಿ ಯಾವುದೇ ಅಮೆರಿಕನ್ನರು ಇಲ್ಲ ಎಂದು ಸ್ಪಷ್ಟಪಡಿಸಿದೆ. ಒಟ್ಟು 50 ಮಂದಿಯನ್ನು ಬಿಡುಗಡೆ ಮಾಡಲು ಒಪ್ಪಂದ ಮಾಡಿಕೊಳ್ಳಲಾಗಿದೆ. ನಂತರ ಬಿಡುಗಡೆಯಾಗುವವರಲ್ಲಿ ಅಮೆರಿಕನ್ನರೂ ಇರುತ್ತಾರೆ ಎಂದು ಭರವಸೆ ವ್ಯಕ್ತಪಡಿಸಿದರು.

ಅಕ್ಟೋಬರ್ 7 ರಂದು ಇಸ್ರೇಲ್ ಮೇಲೆ ಮಿಂಚಿನ ದಾಳಿ ನಡೆಸಿದ ಹಮಾಸ್, ಸುಮಾರು 240 ಒತ್ತೆಯಾಳುಗಳನ್ನು ಇರಿಸಿಕೊಂಡಿತ್ತು. ಇದರೊಂದಿಗೆ ಹಮಾಸ್ ನಿರ್ಮೂಲನೆ ಮಾಡುವ ಉದ್ದೇಶದಿಂದ ಇಸ್ರೇಲ್ ಗಾಜಾ ಮೇಲೆ ಉಗ್ರ ದಾಳಿ ನಡೆಸುತ್ತಿದೆ. ಈ ಕ್ರಮದಲ್ಲಿ ಒತ್ತೆಯಾಳುಗಳ ಬಿಡುಗಡೆ ಮತ್ತು ಕದನ ವಿರಾಮಕ್ಕಾಗಿ ವಿವಿಧ ದೇಶಗಳ ಪ್ರಯತ್ನದಿಂದ ತಾತ್ಕಾಲಿಕ ಕದನ ವಿರಾಮವನ್ನು ಘೋಷಿಸಲಾಯಿತು. ಈ ಒಪ್ಪಂದ ಪ್ರಕಾರ ಇಸ್ರೇಲ್ 4 ದಿನಗಳ ಕಾಲ ದಾಳಿ ನಿಲ್ಲಿಸಿದರೆ ಹಮಾಸ್ 50 ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಲಿದೆ. ಅಲ್ಲದೆ ಇಸ್ರೇಲ್ ಕೂಡ 150 ಪ್ಯಾಲೆಸ್ತೀನ್ ಪ್ರಜೆಗಳನ್ನು ಜೈಲಿನಿಂದ ಬಿಡುಗಡೆ ಮಾಡಬೇಕಾಗಿದೆ.

'ಒಪ್ಪಂದ ಒಂದು ಅಮೂಲ್ಯವಾದ ಕಲ್ಪನೆ': ಹಮಾಸ್ ಮತ್ತು ಇಸ್ರೇಲ್ ನಡುವೆ ಕದನ ವಿರಾಮ ಒಪ್ಪಂದ ನಾಲ್ಕು ದಿನಗಳಿಗಿಂತ ಹೆಚ್ಚು ಇರುತ್ತದೆ ಎಂದು ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಭರವಸೆ ವ್ಯಕ್ತಪಡಿಸಿದರು. ದಿನದಿಂದ ದಿನಕ್ಕೆ ಇನ್ನಷ್ಟು ಒತ್ತೆಯಾಳುಗಳು ಬಿಡುಗಡೆಯಾಗಲಿ ಎಂದು ಹಾರೈಸುತ್ತೇನೆ ಎಂದರು.

ಓದಿ:ಇಂದಿನಿಂದ ಇಸ್ರೇಲ್​ - ಹಮಾಸ್​ ನಡುವೆ ಕದನ ವಿರಾಮ: ಒತ್ತೆಯಾಳುಗಳು, ಕೈದಿಗಳ ವಿನಿಮಯಕ್ಕೆ ಹಾದಿ ಸುಗಮ