ಟ್ವಿಟರ್​ನಲ್ಲಿ ಉದ್ಯೋಗ ಕಡಿತದ ಬಗ್ಗೆ ಬ್ಯಾಂಕರ್​ಗಳೊಂದಿಗೆ ಚರ್ಚಿಸಿದ ಮಸ್ಕ್​

$44 ಬಿಲಿಯನ್​ಗೆ ಟ್ವಿಟರ್​ ಅನ್ನು ಎಲಾನ್‌ ಮಸ್ಕ್​ ಯಶಸ್ವಿಯಾಗಿ ಸ್ವಾಧೀನಪಡಿಸಿಕೊಂಡಿದ್ದು, ನಾನು ಹಾಗೂ ಕಂಪನಿಯ ಇಡೀ ತಂಡ ಟ್ವಿಟರ್​ ಅನ್ನು ಇನ್ನೂ ಚೆನ್ನಾಗಿ ರೂಪಿಸಲು ಕೆಲಸ ಮಾಡುತ್ತೇವೆ ಎಂದು ಅಗರ್​ವಾಲ್​ ಹೇಳಿದ್ದಾರೆ.

ಸ್ಯಾನ್ ಫ್ರಾನ್ಸಿಸ್ಕೋ: ಟ್ವಿಟರ್​ನ ಬಾಟಮ್​ ಲೈನ್​ ಸುಧಾರಿಸಲು ಅದರ ಅಧಿಕಾರ ವಹಿಸಿಕೊಂಡ ಕೂಡಲೇ ಉದ್ಯೋಗಗಳನ್ನು ಕಡಿತಗೊಳಿಸಲು ಟೆಸ್ಲಾ ಸಿಇಒ ಎಲಾನ್ ಮಸ್ಕ್ ಬ್ಯಾಂಕ್​ಗಳೊಂದಿಗಿನ ಚರ್ಚೆ ವೇಳೆ ನಿರ್ಧರಿಸಿದ್ದಾರೆ ಎಂದು ವರದಿಯಾಗಿದೆ. ಮೈಕ್ರೋ-ಬ್ಲಾಗಿಂಗ್ ಪ್ಲಾಟ್‌ಫಾರ್ಮ್‌ನಲ್ಲಿ ದಕ್ಷತೆ ಕಾಪಾಡಲು ಉದ್ಯೋಗ ಕಡಿತವೂ ಅಗತ್ಯ ಎಂದು ಬ್ಯಾಂಕರ್​ಗಳೊಂದಿಗೆ ಚರ್ಚಿಸಿದ್ದಾರೆ ಎಂದು ತಿಳಿದುಬಂದಿದೆ.

ಟ್ವಿಟರ್ ಅಥವಾ ಸಿಇಒ ಪರಾಗ್ ಅಗರವಾಲ್ ಇದರ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಈ ಸಮಯದಲ್ಲಿ ಯಾವುದೇ ಕಡಿತಗಳಿರುವುದಿಲ್ಲ ಎಂದು ಈ ಹಿಂದೆ ಅಗರವಾಲ್ ಉದ್ಯೋಗಿಗಳಿಗೆ ಹೇಳಿದ್ದರು. ವರದಿಗಳ ಪ್ರಕಾರ, ಕಂಪೆನಿಯ ನೀತಿ ವಿಭಾಗದಲ್ಲಿ ಮಸ್ಕ್​ ಉದ್ಯೋಗ ಕಡಿತ ಮಾಡುವ ಸಾಧ್ಯತೆ ಇದೆ. ಕ್ಯಾಪಿಟಲ್ ಹಿಲ್ ಹಿಂಸಾಚಾರದ ಹಿನ್ನೆಲೆಯಲ್ಲಿ ಯುಎಸ್ ಅಧ್ಯಕ್ಷ ಜೋ ಬೈಡನ್ ಅವರ ಮಗ ಹಂಟರ್ ಅವರ ಲ್ಯಾಪ್‌ಟಾಪ್‌ಗೆ ಸಂಬಂಧಿಸಿದ ವಿಶೇಷ ಕಥೆಗಳನ್ನು ಸೆನ್ಸಾರ್ ಮಾಡುವ ಕುರಿತು ಈ ವಾರ ಟ್ವಿಟರ್‌ನ ನೀತಿ ಮುಖ್ಯಸ್ಥ ವಿಜಯ ಗಡ್ಡೆ ಅವರ ಟೀಕೆಯಲ್ಲಿ ಮಸ್ಕ್ ಅವರ ಅಸಮಾಧಾನ ವ್ಯಕ್ತಗೊಂಡಿದೆ.

$44 ಬಿಲಿಯನ್​ಗೆ ಟ್ವಿಟರ್​ ಅನ್ನು ಮಸ್ಕ್​ ಯಶಸ್ವಿಯಾಗಿ ಸ್ವಾಧೀನಪಡಿಸಿಕೊಂಡಿದ್ದು, ನಾನು ಹಾಗೂ ಕಂಪನಿಯ ಇಡೀ ತಂಡ ಟ್ವಿಟರ್​ ಅನ್ನು ಇನ್ನೂ ಚೆನ್ನಾಗಿ ರೂಪಿಸಲು ಕೆಲಸ ಮಾಡುತ್ತೇವೆ ಎಂದು ಅಗರ್​ವಾಲ್​ ಹೇಳಿದ್ದಾರೆ. ಟ್ವಿಟರ್​ ಅನ್ನು ಇನ್ನಷ್ಟು ಉತ್ತಮಗೊಳಿಸಲು, ಅಗತ್ಯವಿರುವಲ್ಲಿ ಸೇವೆಯನ್ನು ಸರಿಪಡಿಸಿ, ಬಲಪಡಿಸಲು ಈ ಕೆಲಸವನ್ನು ನಾನು ಆಯ್ದುಕೊಂಡಿದ್ದೇನೆ. ಈ ಎಲ್ಲ ಗದ್ದಲದ ನಡುವೆಯೂ ಗಮನವಿಟ್ಟು ತುರ್ತು ಕೆಲಸಗಳನ್ನು ಮುಂದುವರಿಸುತ್ತಿರುವ ನಮ್ಮ ಕೆಲಸಗಾರರ ಬಗ್ಗೆ ನನಗೆ ಹೆಮ್ಮೆಯಿದೆ ಎಂದು ಗುರುವಾರ ಅಗರ್​ವಾಲ್​ ಟ್ವೀಟ್​ ಮಾಡಿದ್ದಾರೆ.

ಮಸ್ಕ್​ ಟ್ವಿಟರ್​ ಅನ್ನು ಸ್ವಾಧೀನಪಡಿಸಿಕೊಂಡ ನಂತರ ಅಗರವಾಲ್ ಉದ್ಯೋಗಿಗಳೊಂದಿಗೆ ಮಾತನಾಡಿರುವ ಆಡಿಯೋ ಒಂದು ಸೋರಿಕೆಯಾಗಿದ್ದು, ಆ ಆಡಿಯೋ ಕ್ಲಿಪ್​ನಲ್ಲಿ, ಮಸ್ಕ್ ಶೀಘ್ರದಲ್ಲೇ ಕೆಲಸಗಾರರನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ. ಒಮ್ಮೆ ಒಪ್ಪಂದದ ಕೆಲಸಗಳು ಮುಕ್ತಾಯಗೊಂಡರೆ, ವಿಭಿನ್ನ ನಿರ್ಧಾರಗಳನ್ನು ತೆಗೆದುಕೊಳ್ಳಬಹುದು. ಅದರ ಬಗ್ಗೆ ತಿಳಿದುಕೊಂಡು, ಸಾಧ್ಯವಾದಷ್ಟು ಬೇಗ ಎಲಾನ್ ನಿಮ್ಮ ಜೊತೆ ಮಾತನಾಡಲು ವ್ಯವಸ್ಥೆ ಮಾಡುತ್ತೇವೆ ಎಂದು ಹೇಳಿದ್ದಾರೆ.

ಟೆಸ್ಲಾ ಸಿಇಒ ಮಸ್ಕ್​ ಸುಮಾರು $4 ಬಿಲಿಯನ್​ ಮೌಲ್ಯದ ಕಂಪನಿಯ ಸುಮಾರು 4.4 ಮಿಲಿಯನ್ ಷೇರುಗಳನ್ನು ಮಾರಾಟ ಮಾಡಿ, ಸುಮಾರು $44 ಬಿಲಿಯನ್‌ಗೆ ಟ್ವಿಟರ್ ಅನ್ನು ಸ್ವಾಧೀನಪಡಿಸಿಕೊಳ್ಳಲು ತಯಾರಿ ನಡೆಸುತ್ತಿದ್ದಾರೆ. ಮಸ್ಕ್ ತನ್ನ ವೈಯಕ್ತಿಕ ಸಾಮರ್ಥ್ಯದಲ್ಲಿ $21 ಬಿಲಿಯನ್​ ಹಾಕಬೇಕಾಗಿರುವುದರಿಂದ ಈ ಹಣವು ಮೈಕ್ರೋ-ಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ಅನ್ನು ಸ್ವಾಧೀನಪಡಿಸಿಕೊಳ್ಳಲು ಹೋಗಬಹುದು.

ಒಪ್ಪಂದದ ಭಾಗವಾಗಿ, ಮೋರ್ಗನ್ ಸ್ಟಾನ್ಲಿ ಮತ್ತು ಇತರ ಹಣಕಾಸು ಸಂಸ್ಥೆಗಳು ಟೆಸ್ಲಾ ಮತ್ತು ಇತರ ಕಂಪನಿಗಳಲ್ಲಿನ ಅವರ ಷೇರುಗಳ ವಿರುದ್ಧ $12.5 ಬಿಲಿಯನ್ ಮಾರ್ಜಿನ್ ಲೋನ್‌ಗಳ ಜೊತೆಗೆ $13 ಬಿಲಿಯನ್ ಹಣಕಾಸು ಒದಗಿಸಲು ಬದ್ಧವಾಗಿವೆ. ಮಸ್ಕ್ ತನ್ನದೇ ಆದ ಸರಿಸುಮಾರು $21 ಬಿಲಿಯನ್ ಇಕ್ವಿಟಿ ಹಣಕಾಸು ಒದಗಿಸುವ ನಿರೀಕ್ಷೆಯಿದೆ.

ಯುಎಸ್​ ಸೆಕ್ಯುರಿಟೀಸ್ ಮತ್ತು ಎಕ್ಸ್‌ಚೇಂಜ್ ಕಮಿಷನ್ (SEC) ಗೆ ಸಲ್ಲಿಸಿದ ಮಸ್ಕ್‌ನ ಇತ್ತೀಚಿನ ಟೆಸ್ಲಾ ಸ್ಟಾಕ್ ಮಾರಾಟದ ಮೌಲ್ಯವು ಸುಮಾರು $4 ಬಿಲಿಯನ್ ಆಗಿದೆ. ಮಸ್ಕ್​ ಟ್ವಿಟರ್​ ಅನ್ನು ಸ್ವಾಧೀಮ ಪಡಿಸಿಕೊಳ್ಳುತ್ತಿರುವ ಸುದ್ದಿ ಹೊರಬೀಳುತ್ತಲೇ ಟ್ವಿಟರ್​ ಷೇರು ಮೌಲ್ಯ ಹೆಚ್ಚಾದರೆ ಟೆಸ್ಲಾ ಷೇರು ಮೌಲ್ಯ ಶೇ.12.2ರಷ್ಟು ಕುಸಿದಿದೆ. ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ ಮಸ್ಕ್​ $257 ಬಿಲಿಯನ್ ನಿವ್ವಳ ಮೌಲ್ಯ ಹೊಂದಿದ್ದಾನೆ. ಆದರೆ ಅವನ ಸಂಪತ್ತಿನ ಮೂರನೇ ಎರಡರಷ್ಟು ಭಾಗ ಟೆಸ್ಲಾ ಸ್ಟಾಕ್‌ನಲ್ಲಿದೆ.

ವರದಿಗಳ ಪ್ರಕಾರ, ಮಸ್ಕ್ ಆ ಕೆಲವು ಹಿಡುವಳಿಗಳನ್ನು ಆಫ್‌ಲೋಡ್ ಮಾಡಿದರೆ, ಅದು ಟೆಸ್ಲಾ ಅವರ ಷೇರು ಬೆಲೆಯನ್ನು ಮತ್ತಷ್ಟು ಕಡಿಮೆ ಮಾಡಬಹುದು. ಯುಎಸ್​ ಸೆಕ್ಯುರಿಟೀಸ್ ಮತ್ತು ಎಕ್ಸ್‌ಚೇಂಜ್ ಕಮಿಷನ್‌ಗೆ ಸಲ್ಲಿಸಿದ ತನ್ನ ಇತ್ತೀಚಿನ ವಾರ್ಷಿಕ ವರದಿಯಲ್ಲಿ ಕಂಪನಿಯು ಹೂಡಿಕೆದಾರರಿಗೆ ಇದೇ ಬಗ್ಗೆ ಎಚ್ಚರಿಕೆ ನೀಡಿದೆ. ಎಲಾನ್ ಮಸ್ಕ್ ಅವರು ಕೆಲವು ವೈಯಕ್ತಿಕ ಸಾಲದ ಬಾಧ್ಯತೆಗಳನ್ನು ಪಡೆಯಲು ನಮ್ಮ ಸಾಮಾನ್ಯ ಸ್ಟಾಕ್‌ನ ಷೇರುಗಳನ್ನು ಮಾರಾಟ ಮಾಡಲು ಒತ್ತಾಯಿಸಿದರೆ, ಅಂತಹ ಷೇರುಗಳು ನಮ್ಮ ಸ್ಟಾಕ್ ಬೆಲೆ ಕುಸಿತಕ್ಕೆ ಕಾರಣವಾಗಬಹುದು ಎಂದು ಕಂಪನಿ ಹೇಳಿದೆ.

ಇದನ್ನೂ ಓದಿ:ಟ್ವಿಟರ್​ ನಂತರ ಎಲಾನ್ ಮಸ್ಕ್ ಮುಂದಿನ ಟಾರ್ಗೆಟ್​ ಕೊಕಾ ಕೋಲಾ, ಮೆಕ್​ ಡೊನಾಲ್ಡ್!