ಬೀಜಿಂಗ್(ಚೀನಾ):ಗಡಿ ಮತ್ತು ನ್ಯಾಟೋ ಸೇರ್ಪಡೆ ವಿಷಯವಾಗಿ ಈಗಾಗಲೇ ಉಕ್ರೇನ್ ಮತ್ತು ರಷ್ಯಾ ಮಧ್ಯೆ ಯುದ್ಧ ನಡೆಯುತ್ತಿದೆ. ಇದೀಗ ಚೀನಾ ಮತ್ತು ಅಮೆರಿಕಾ ಮಧ್ಯೆ ಯುದ್ಧದ ಮಾತುಗಳು ಹೊರಬಿದ್ದಿವೆ. ಅದೂ ತೈವಾನ್ ಎಂಬ ಪುಟ್ಟ ದ್ವೀಪ ರಾಷ್ಟ್ರಕ್ಕಾಗಿ.
ಸಾಂಸ್ಕೃತಿಕವಾಗಿ, ಆರ್ಥಿಕವಾಗಿ ತೈವಾನ್ ಚೀನಾದ ಜೊತೆ ಸಂಬಂಧ ಹೊಂದಿದೆ. ಚೀನಾ ದ್ವೀಪ ರಾಷ್ಟ್ರವನ್ನು ತನ್ನ ತೆಕ್ಕೆಗೆ ತೆಗೆದುಕೊಳ್ಳಲು ಹವಣಿಸುತ್ತಿದೆ. ಆದರೆ, ಇದಕ್ಕೆ ಅಮೆರಿಕ ತೊಡರುಗಾಲು ಹಾಕಿದೆ. ಯಾವುದೇ ರಾಷ್ಟ್ರಗಳ ಸ್ವಾತಂತ್ರ್ಯದಲ್ಲಿ ಕೈ ಹಾಕಬಾರದು ಎಂದು ಎಚ್ಚರಿಕೆ ನೀಡಿದೆ. ಈ ನಿಯಮ ಮೀರಿದಲ್ಲಿ ತನ್ನ ಹಸ್ತಕ್ಷೇಪದ ಬಗ್ಗೆಯೂ ಎಚ್ಚರಿಕೆ ನೀಡಿದೆ.
ಅಮೆರಿಕದ ಈ ಎಚ್ಚರಿಕೆಯಿಂದ ಕುಪಿತಗೊಂಡಿರುವ ಡ್ರ್ಯಾಗನ್ ರಾಷ್ಟ್ರ ತೈವಾನ್ ಅನ್ನು ಚೀನಾದಿಂದ ಇಬ್ಭಾಗಿಸಿದರೆ ಅಥವಾ ಉಭಯ ರಾಷ್ಟ್ರಗಳ ಮಧ್ಯೆ ಮೂಗು ತೂರಿಸಿದಲ್ಲಿ ಯಾವುದೇ ರೀತಿಯ ಯುದ್ಧಕ್ಕೆ ಸನ್ನದ್ಧ ಎಂದು ಚೀನಾ ಗುಡುಗಿದೆ.
ಮೂಗು ತೂರಿಸಬೇಡಿ:ತೈವಾನ್ ಸ್ವಾತಂತ್ರ್ಯವನ್ನು ಘೋಷಿಸಿದರೆ, ಅಮೆರಿಕ ವಿರುದ್ಧ ಯುದ್ಧ ಮಾಡಲೂ ದೇಶ ಹಿಂಜರಿಯುವುದಿಲ್ಲ ಎಂದು ಸಿಂಗಾಪುರದಲ್ಲಿ ನಡೆದ ಸಭೆಯಲ್ಲಿ ಚೀನಾದ ರಕ್ಷಣಾ ಸಚಿವ ವೈಫೆಂಗ್ ಅವರು ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಲಾಯ್ಡ್ ಆಸ್ಟಿನ್ ಮುಂದೆ ಈ ವಿಷಯವನ್ನು ಪ್ರಸ್ತಾಪಿಸಿದ್ದಾರೆ. ಈ ಮೂಲಕ ತೈವಾನ್ ವಿಚಾರದಲ್ಲಿ ಅಮೆರಿಕಕ್ಕೆ ಚೀನಾ ಖಡಕ್ ಎಚ್ಚರಿಕೆ ನೀಡಿದೆ.