ಮುಸ್ಲಿಮರ ಧಾರ್ಮಿಕ ನಂಬಿಕೆಗಳನ್ನು ಗೌರವಿಸಿ: ಚೀನಾದಿಂದ ಸಾಮರಸ್ಯದ ಪಾಠ!

ಚೀನಾ ತನ್ನ ದೇಶದ ಉಯ್ಘರ್ ಮುಸ್ಲಿಮರ ಮೇಲೆ ನೀಡುತ್ತಿರುವ ಕಿರುಕುಳ ಜಗತ್ತಿಗೆ ಗೊತ್ತಿದೆ. ಆದರೂ ಯುರೋಪಿಯನ್ ದೇಶವಾದ ಸ್ವೀಡನ್​ಗೆ ಸಾಮರಸ್ಯದ ಪಾಠ ಮಾಡಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

ಬೀಜಿಂಗ್(ಚೀನಾ): ಮಾನವ ಹಕ್ಕುಗಳ ವಿಚಾರಕ್ಕೆ ಬರುವುದಾದರೆ ಚೀನಾದಲ್ಲಿ ಅತ್ಯಂತ ಕೆಟ್ಟ ಪರಿಸ್ಥಿತಿ ಇದೆ ಎಂಬುದು ಮಾನವ ಹಕ್ಕುಗಳ ಸಂಘಟನೆಗಳು ಹೇಳುವ ಮಾತು. ಆದರೆ, ಈಗ ಸ್ವತಃ ಚೀನಾ ಸ್ವೀಡನ್​ಗೆ ಮಾನವ ಹಕ್ಕುಗಳ ಪಾಠ ಮಾಡಿದೆ. ಸ್ವೀಡನ್​​ನಲ್ಲಿರುವ ಮುಸ್ಲಿಮರ ಮತ್ತು ಇತರ ಅಲ್ಪಸಂಖ್ಯಾತ ಸಮುದಾಯಗಳ ಧಾರ್ಮಿಕ ನಂಬಿಕೆಗಳನ್ನು ಗೌರವಿಸಬೇಕು. ಅವರ ಕಾನೂನು ಬದ್ಧ ಹಕ್ಕುಗಳನ್ನು ರಕ್ಷಿಸಿಬೇಕು ಎಂದು ಚೀನಾ ಸ್ವೀಡನ್​ಗೆ ಆಗ್ರಹಿಸಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

ಏಪ್ರಿಲ್ 15-16ರಂದು ಸ್ವೀಡನ್​ನಲ್ಲಿ ಮುಸ್ಲಿಂ ವಿರೋಧಿ ಗಲಭೆಗಳು ನಡೆದಿವೆ ಎಂಬ ಹಿನ್ನೆಲೆಯಲ್ಲಿ ಏಪ್ರಿಲ್ 20ರಂದು ಪ್ರತಿಕ್ರಿಯೆ ನೀಡಿದ್ದ ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ವಾಂಗ್ ವೆನ್ಬಿನ್ 'ಮುಸ್ಲಿಮರು ಮತ್ತು ಇತರ ಅಲ್ಪಸಂಖ್ಯಾತ ಗುಂಪುಗಳ ಧಾರ್ಮಿಕ ನಂಬಿಕೆಗಳನ್ನು ಶ್ರದ್ಧೆಯಿಂದ ಗೌರವಿಸಬೇಕು. ಅವರ ಧಾರ್ಮಿಕ ನಂಬಿಕೆಯ ಸ್ವಾತಂತ್ರ್ಯ ನೀಡಬೇಕು' ಎಂದು ಆಗ್ರಹಿಸಿದ್ದಾರೆ. ಈ ಕುರಿತು ಹಾಂಕಾಂಗ್ ಪೋಸ್ಟ್ ವರದಿ ಮಾಡಿದೆ.

ಚೀನಾ ಇಬ್ಬಗೆಯ ನೀತಿ:ಸ್ವೀಡನ್​ನ ಮುಸ್ಲಿಮರ ಬಗ್ಗೆ ಮಾತನಾಡುವ ಚೀನಾ ತನ್ನ ದೇಶದ ಉಯ್ಘರ್ ಮುಸ್ಲಿಮರ ಮೇಲೆ ನೀಡುತ್ತಿರುವ ಕಿರುಕುಳ ಜಗತ್ತಿಗೆ ಗೊತ್ತಿದೆ. ಈ ಹಿನ್ನೆಲೆಯಲ್ಲಿ ಉಯ್ಘರ್ ಮುಸ್ಲಿಮರನ್ನು ಭೇಟಿಯಾಗುವ ಇಚ್ಚೆಯನ್ನು ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಹೈಕಮಿಷನರ್ ಮಿಚೆಲ್ ಬ್ಯಾಚೆಲೆಟ್ ವ್ಯಕ್ತಪಡಿಸಿದ್ದರು. ಆದರೆ, ಚೀನಾ ಮಿಚೆಲ್ ಬ್ಯಾಚೆಲೆಟ್ ಅವರ ನಿರ್ಧಾರಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿದೆ. ಹೈಕಮಿಷನರ್ ಚೀನಾ ಭೇಟಿ ಕೇವಲ ಸಹಕಾರವನ್ನು ಉತ್ತೇಜಿಸುವುದಾಗಿರಬೇಕು ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇಲ್ಲಿ ಮತ್ತೊಂದು ಆಸಕ್ತಿದಾಯಕ ವಿಚಾರವೆಂದರೆ ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ವಾಂಗ್ ವೆನ್ಬಿನ್ ಮಿಚೆಲ್ ಬ್ಯಾಚೆಲೆಟ್ ಅವರನ್ನು ಮೇ ತಿಂಗಳಲ್ಲಿ ಭೇಟಿಯಾಗಬೇಕಿತ್ತು. ಮಿಚೆಲ್ ಬ್ಯಾಚೆಲೆಟ್ ಅವರು ಉಯ್ಘರ್ ಮುಸ್ಲಿಮರ ಭೇಟಿಯ ಬಗ್ಗೆ ಆಸಕ್ತಿ ವಹಿಸುತ್ತಿರುವುದನ್ನು ಕಂಡ ವಾಂಗ್ ವೆನ್ಬಿನ್ ಈಗ ಭೇಟಿಯ ವಿಚಾರದಿಂದ ಯೂಟರ್ನ್ ತೆಗೆದುಕೊಂಡಿದ್ದಾರೆ ಎನ್ನಲಾಗಿದೆ.

ಸ್ವೀಡನ್‌ನಲ್ಲಿನ ಮುಸ್ಲಿಮರ ಕಾನೂನುಬದ್ಧ ಹಕ್ಕುಗಳಿಗಾಗಿ ಕಾಳಜಿ ವ್ಯಕ್ತಪಡಿಸುವ ಚೀನಾ, ಮಿಚೆಲ್ ಬ್ಯಾಚೆಲೆಟ್ ಅವರು ಕ್ಸಿನ್‌ಜಿಯಾಂಗ್‌ (ಉಯ್ಘರ್ ಮುಸ್ಲಿಮರು ಇರುವ ಪ್ರದೇಶ) ಭೇಟಿ ನೀಡಿದರೆ ಅದು ಚೀನಾಗೆ ಕಷ್ಟವಾಗಬಹುದು ಎಂಬ ಚಿಂತೆ ಚೀನಾವನ್ನು ಕಾಡುತ್ತಿದೆ ಎಂದು ಹಾಂ​ಕಾಂಗ್ ಪೋಸ್ಟ್​ನಲ್ಲಿ ಉಲ್ಲೇಖಿಸಲಾಗಿದೆ.

ಇದನ್ನೂ ಓದಿ:ಉಕ್ರೇನ್​ನ ಖೇರ್ಸನ್ ನಗರದಲ್ಲಿ ರಷ್ಯಾದ ದೂರದರ್ಶನ ಗೋಪುರದ ಬಳಿ ಸರಣಿ ಸ್ಫೋಟ