ನ್ಯೂಯಾರ್ಕ್‌: ಮೆಟಾ ಸಿಇಒ ಮಾರ್ಕ್ ಜುಕರ್ಬರ್ಗ್ ಮತ್ತು ತಮ್ಮ ನಡುವೆ ನಡೆಯಲಿರುವ ಕೇಜ್ ಫೈಟ್ (ಪಂಜರದೊಳಗಿನ ಕಾದಾಟ)ನ್ನು ಸಾಮಾಜಿಕ ಮಾಧ್ಯಮ 'ಎಕ್ಸ್'ನಲ್ಲಿ (ಟ್ವಿಟರ್) ನೇರ ಪ್ರಸಾರ ಮಾಡಲಾಗುವುದು ಎಂದು ಎಲೋನ್ ಮಸ್ಕ್ ಹೇಳಿದ್ದಾರೆ. ಇದನ್ನು('ಎಕ್ಸ್') ಮೊದಲು ಟ್ವಿಟರ್ ಎಂದು ಕರೆಯಲಾಗುತ್ತಿತ್ತು.
ಕೇಜ್ ಫೈಟ್‌ನಲ್ಲಿ ಪರಸ್ಪರ ಮುಖಾಮುಖಿಯಾಗಲು ಈ ಇಬ್ಬರು ಟೆಕ್‌ ಬಿಲಿಯನೇರ್‌ಗಳು ಜೂನ್ ತಿಂಗಳಲ್ಲಿ ಒಪ್ಪಿಗೆ ಸೂಚಿಸಿದ್ದರು. ಫೇಸ್‌ಬುಕ್‌ ಸಂಸ್ಥಾಪಕ ಜುಕರ್ಬರ್ಗ್ ಅವರು ಸಮರ ಕಲೆಯನ್ನು ಕಲಿತಿದ್ದು, ತಾವು ಮೊದಲ ಜಿಯು ಜಿಟ್ಸು ಟೂರ್ನಿ ಪೂರ್ಣಗೊಳಿಸಿರುವ ಬಗ್ಗೆ ಈ ವರ್ಷದ ಆರಂಭದಲ್ಲಿ ಫೇಸ್‌ಬುಕ್‌ನಲ್ಲಿ ಪೋಸ್ಟ್ ಮಾಡಿದ್ದರು.
ಭಾರ ಎತ್ತುವ ಮೂಲಕ ಕಾದಾಟಕ್ಕೆ ತರಬೇತಿ ಪಡೆಯುತ್ತಿದ್ದೇನೆ ಎಂದು ಮಸ್ಕ್ ಇತ್ತೀಚೆಗೆ ಹೇಳಿದ್ದರು. ಮಸ್ಕ್ ಮತ್ತು ಜುಕರ್ಬರ್ಗ್ ಅವರು ನಿಜವಾಗಿಯೂ ಕೇಜ್ ಫೈಟ್‌ನಲ್ಲಿ ಸೆಣಸಲಿದ್ದಾರೆಯೇ ಎಂಬುದನ್ನು ಕಾದು ನೋಡಬೇಕಾಗಿದೆ. ವಿಶೇಷವಾಗಿ ಮಸ್ಕ್ ಆಗಾಗ್ಗೆ ಟ್ವೀಟ್ ಮಾಡುತ್ತಾರೆ. ಆದರೆ ಈ ಇಬ್ಬರ ಕೇಜ್ ಫೈಟ್ ಒಪ್ಪಂದ ಮತ್ತು ಪೋಸ್ಟ್‌ಗಳು ತಮಾಷೆಯಾಗಿ ಗಮನ ಸೆಳೆದಿವೆ ಎಂದು ಮೂಲಗಳು ಹೇಳಿವೆ.
ಇದನ್ನೂ ಓದಿ:Twitter logo: 'ಹಾರಿ ಹೋದ ನೀಲಿಹಕ್ಕಿ' ಜಾಗದಲ್ಲಿ ಬಂತು X, ಬದಲಾಯ್ತು ಜನಪ್ರಿಯ ಟ್ವಿಟರ್ ಲೋಗೊ
ಮಸ್ಕ್ ಮತ್ತು ಜುಕರ್ ಬರ್ಗ್ ಮಧ್ಯೆ ಲಾಸ್ ವೇಗಾಸ್ನಲ್ಲಿ ಕೇಜ್ ಫೈಟ್ ನಡೆಯಲಿದೆ ಎನ್ನಲಾಗಿದೆ. ಮಾರ್ಕ್ ಜುಕರ್ ಬರ್ಗ್ ಅವರೊಂದಿಗೆ ನಡೆಯಲಿರುವ ಕೇಜ್ ಫೈಟ್ನ್ನು ತಮ್ಮ ಮೈಕ್ರೋ ಬ್ಲಾಗಿಂಗ್ ಸೈಟ್ ಎಕ್ಸ್ನಲ್ಲಿ ನೇರಪ್ರಸಾರ ಮಾಡುವುದಾಗಿ ಮಸ್ಕ್ ಭಾನುವಾರ ಹೇಳಿದ್ದಾರೆ. ಅಲ್ಲದೇ ಈ ಫೈಟ್ನ ನೇರಪ್ರಸಾರದಿಂದ ಬರುವ ಎಲ್ಲ ಆದಾಯವನ್ನು ಕ್ಷೇತ್ರದಲ್ಲಿ ಕೆಲಸ ಮಾಡಿದ ಹಿರಿಯರಿಗೆ ಕೊಡುಗೆಯಾಗಿ ನೀಡಲಾಗುವುದು ಎಂದು ಅವರು ಹೇಳಿದ್ದಾರೆ.
ಜಗತ್ತಿನ ಎರಡು ದೈತ್ಯ ಕಂಪನಿಗಳ ಮುಖ್ಯಸ್ಥರಾಗಿರುವ ಜುಕರ್ ಬರ್ಗ್ ಮತ್ತು ಎಲೋನ್ ಮಸ್ಕ್ ಇಬ್ಬರೂ ಕೇಜ್ ಮ್ಯಾಚ್ ಆಡುವುದಾಗಿ ಎಂದು ಕಳೆದ ಜೂನ್ನಿಂದ ಸಾಮಾಜಿಕ ಮಾಧ್ಯಮಗಳಲ್ಲಿ ಹೇಳಿಕೊಳ್ಳುತ್ತಿದ್ದರು. ಬರ್ಗ್ ಅವರೊಂದಿಗೆ ಕೇಜ್ ಫೈಟ್ ಆಡಲು ತಾವು ಸಿದ್ಧವಿರುವುದಾಗಿ ಎಲೋನ್ ಮಸ್ಕ್ ಜೂನ್ನಲ್ಲಿ ಟ್ವಿಟರ್ನಲ್ಲಿ ಪೋಸ್ಟ್ ಮಾಡಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ಜುಕರ್ ಬರ್ಗ್, ಮಸ್ಕ್ ಅವರ ಪೋಸ್ಟ್ನ ಸ್ಕ್ರೀನ್ ಶಾಟ್ ಶೇರ್ ಮಾಡಿ, ಫೈಟ್ ಎಲ್ಲಿ ಮಾಡೋಣ ಲೊಕೇಶನ್ ಕಳುಹಿಸಿ ಎಂದು ತಿರುಗೇಟು ನೀಡಿದ್ದರು. ಇದಕ್ಕೆ ಉತ್ತರಿಸಿದ್ದ ಮಸ್ಕ್ ವೇಗಾಸ್ ಆಕ್ಟಾಗಾನ್ ಎಂದು ಉತ್ತರಿಸಿದ್ದರು.
ಇಬ್ಬರ ಫೈಟ್ನ ಉದ್ದೇಶವಾದರೂ ಏನು ಎಂದು ಎಕ್ಸ್ ಬಳಕೆದಾರರೊಬ್ಬರು ಮಸ್ಕ್ಗೆ ಕೇಳಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ಮಸ್ಕ್, ಇದೊಂದು ಯುದ್ಧದ ಸುಸಂಸ್ಕೃತ ರೂಪ. ಪುರುಷರು ಯುದ್ಧವನ್ನು ಪ್ರೀತಿಸುತ್ತಾರೆ ಎಂದು ಹೇಳಿದ್ದರು.
ಇದನ್ನೂ ಓದಿ:ಟೀಕೆಗಳ ಬಳಿಕ ಟ್ವಿಟರ್ ಕಂಪನಿ ಮೇಲಿನ X ಚಿಹ್ನೆ ತೆಗೆಸಿದ ಎಲಾನ್ ಮಸ್ಕ್, ಮತ್ತೆ ಗೂಡು ಸೇರುತ್ತಾ 'ನೀಲಿಹಕ್ಕಿ'?
