ಲಂಡನ್: ಬ್ರಿಟನ್ ಪ್ರಧಾನಿ ರಿಷಿ ಸುನಕ್ ಅವರು ವಾಯುವ್ಯ ಇಂಗ್ಲೆಂಡ್‌ನ ಪ್ರದೇಶವೊಂದಕ್ಕೆ ತೆರಳಲು ಕಾರು ಚಾಲನೆ ಮಾಡುವಾಗ ಸೋಶಿಯಲ್ ಮೀಡಿಯಾದಲ್ಲಿ ಹಾಕಲು ವೀಡಿಯೊ ಚಿತ್ರೀಕರಿಸಲು ಕೆಲವೇ ಕ್ಷಣ ತಮ್ಮ ಸೀಟ್ ಬೆಲ್ಟ್ ತೆಗೆದಿದ್ದಕ್ಕಾಗಿ ಕ್ಷಮೆಯಾಚಿಸಿದ್ದಾರೆ. ಸುನಕ್ ಅವರು ಸ್ವಲ್ಪವೇ ಸಮಯ ಸೀಟ್ ಬೆಲ್ಟ್ ತೆಗೆದಿದ್ದರು ಮತ್ತು ತಾವು ತಪ್ಪು ಮಾಡಿದ್ದನ್ನು ಅವರು ಒಪ್ಪಿಕೊಂಡಿದ್ದಾರೆ ಎಂದು ಅವರ ಡೌನಿಂಗ್ ಸ್ಟ್ರೀಟ್ ವಕ್ತಾರರು ಗುರುವಾರ ಹೇಳಿದ್ದಾರೆ. ಅದೊಂದು ತಪ್ಪು ಕಲ್ಪನೆಯಿಂದ ಉಂಟಾದ ದೋಷವಾಗಿದೆ. ಸಣ್ಣ ವೀಡಿಯೊ ಕ್ಲಿಪ್ ಚಿತ್ರೀಕರಿಸಲು ಪ್ರಧಾನಿ ತಮ್ಮ ಸೀಟ್ ಬೆಲ್ಟ್ ಅನ್ನು ತೆಗೆದುಹಾಕಿದ್ದಾರೆ. ಇದು ತಪ್ಪಾಗಿದೆ ಎಂದು ಅವರು ಸಂಪೂರ್ಣವಾಗಿ ಒಪ್ಪಿಕೊಂಡಿದ್ದಾರೆ ಮತ್ತು ಅದರ ಬಗ್ಗೆ ಕ್ಷಮೆಯಾಚಿಸಿದ್ದಾರೆ. ಪ್ರತಿಯೊಬ್ಬರೂ ಸೀಟ್ ಬೆಲ್ಟ್ ಧರಿಸಬೇಕು ಎಂಬುದು ಪ್ರಧಾನಿಯ ಅಭಿಪ್ರಾಯವಾಗಿದೆ ಎಂದು ಸುನಕ್ ವಕ್ತಾರರು ತಿಳಿಸಿದ್ದಾರೆ.
ಸೀಟ್ ಬೆಲ್ಟ್ ಧರಿಸದಿರುವುದಕ್ಕೆ ವಿನಾಯಿತಿ ನೀಡುವ ವೈದ್ಯಕೀಯ ಶಿಫಾರಸು ಇಲ್ಲದ ವ್ಯಕ್ತಿಯು ಸೀಟ್ ಬೆಲ್ಟ್ ಇಲ್ಲದೆ ಪ್ರಯಾಣಿಸಿದಲ್ಲಿ ಅಂಥವರಿಗೆ ಸ್ಥಳದಲ್ಲಿಯೇ 100 ಪೌಂಡ್ ದಂಡ ವಿಧಿಸಲಾಗುತ್ತದೆ. ಒಂದು ವೇಳೆ ಪ್ರಕರಣ ನ್ಯಾಯಾಲಯದ ಮೆಟ್ಟಿಲೇರಿದರೆ ದಂಡದ ಮೊತ್ತ 500 ಪೌಂಡ್ವರೆಗೆ ಹೆಚ್ಚಾಗಬಹುದು.
ದೇಶದಾದ್ಯಂತ 100 ಕ್ಕೂ ಹೆಚ್ಚು ಯೋಜನೆಗಳಿಗೆ ಧನಸಹಾಯ ಮಾಡಲು ತಮ್ಮ ಸರ್ಕಾರದ ಹೊಸ ಲೆವೆಲಿಂಗ್ ಅಪ್ ಫಂಡ್ ಪ್ರಕಟಣೆಗಳನ್ನು ಪ್ರಚಾರ ಮಾಡಲು ಸುನಕ್ ವೀಡಿಯೊ ಒಂದನ್ನು ಚಿತ್ರೀಕರಿಸಿದ್ದರು. ಅವರು ಕ್ಯಾಮೆರಾವನ್ನು ಉದ್ದೇಶಿಸಿ ಮಾತನಾಡುತ್ತಿದ್ದಂತೆ ಪೋಲೀಸ್ ಮೋಟರ್‌ಬೈಕ್‌ಗಳು ಅವರ ಕಾರಿಗೆ ಬೆಂಗಾವಲು ಮಾಡುವುದನ್ನು ಕಾಣಬಹುದು. ಸುನಕ್ ತನ್ನ ಕಾಂಟ್ಯಾಕ್ಟ್ಲೆಸ್ ಕಾರ್ಡ್ನಿಂದ ಪೇಮೆಂಟ್ ಮಾಡುವಾಗ ಹೆಣಗಾಡುತ್ತಿರುವ ವೀಡಿಯೊವೊಂದು ಬೆಳಕಿಗೆ ಬಂದಿತ್ತು. ಅದರ ನಂತರ ಇತ್ತೀಚಿನ ಘಟನೆಯ ನಂತರ ಸುನಕ್ ಅವರನ್ನು ಪ್ರತಿಪಕ್ಷ ಲೇಬರ್ ಪಾರ್ಟಿ ಟೀಕಿಸಿದೆ.