ಚೆಕ್​ಪಾಯಿಂಟ್ ಮೇಲೆ ದಾಳಿ: ಇಸ್ರೇಲ್ ಸೈನಿಕರ ಗುಂಡಿಗೆ ಇಬ್ಬರು ಪ್ಯಾಲೆಸ್ಟೇನಿಯರ ಸಾವು

ಇಸ್ರೇಲ್ ಚೆಕ್​ಪಾಯಿಂಟ್​ನಲ್ಲಿ​ ಇಸ್ರೇಲಿ ಯೋಧರು ಹಾರಿಸಿದ ಗುಂಡಿಗೆ ಇಬ್ಬರು ಪ್ಯಾಲೆಸ್ಟೇನಿಯರು ಬಲಿಯಾಗಿದ್ದಾರೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.

ರಮಲ್ಲಾ :ವೆಸ್ಟ್ ಬ್ಯಾಂಕ್ (ಪಶ್ಚಿಮ ದಂಡೆ) ಪ್ರದೇಶದಲ್ಲಿ ಇಸ್ರೇಲಿ ಯೋಧರು ಹಾರಿಸಿದ ಗುಂಡಿಗೆ ಇಬ್ಬರು ಪ್ಯಾಲೆಸ್ಟೇನಿಯರು ಸಾವನ್ನಪ್ಪಿದ್ದಾರೆ. ಇಸ್ರೇಲಿ ಚೆಕ್‌ಪಾಯಿಂಟ್ ಮೇಲೆ ದಾಳಿ ಮಾಡಿದ್ದಕ್ಕಾಗಿ ಇಸ್ರೇಲ್ ಗುಂಡಿನ ದಾಳಿಗೆ ಬಲಿಯಾದ ಓರ್ವ ಇದರಲ್ಲಿ ಸೇರಿದ್ದಾನೆ. ವೆಸ್ಟ್ ಬ್ಯಾಂಕ್ ನಗರವಾದ ರಮಲ್ಲಾ ಮತ್ತು ಜೆರುಸಲೆಮ್ ನಡುವಿನ ಇಸ್ರೇಲಿ ಸೇನಾ ಚೆಕ್‌ಪಾಯಿಂಟ್‌ನಲ್ಲಿ 18 ವರ್ಷದ ಇಸಾಕ್ ಅಜ್ಲೋನಿ ಎಂಬಾತ ಕೊಲ್ಲಲ್ಪಟ್ಟಿದ್ದಾನೆ ಎಂದು ಇಸ್ರೇಲಿ ಮತ್ತು ಪ್ಯಾಲೆಸ್ಟೈನ್ ಮೂಲಗಳನ್ನು ಉಲ್ಲೇಖಿಸಿ ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.

ಜೆರುಸಲೆಮ್‌ನ ಉತ್ತರದಲ್ಲಿರುವ ಕ್ಲಾಂಡಿಯಾ ಚೆಕ್‌ಪಾಯಿಂಟ್‌ನಲ್ಲಿ ಇಸಾಕ್ ಅಜ್ಲೋನಿ ಎಂಬಾತ ಇಸ್ರೇಲಿ ಸೈನಿಕರ ಮೇಲೆ ಗುಂಡು ಹಾರಿಸಿದ್ದ. ಇದರಲ್ಲಿ ಓರ್ವ ಇಸ್ರೇಲಿ ಭದ್ರತಾ ಸಿಬ್ಬಂದಿ ಲಘುವಾಗಿ ಗಾಯಗೊಂಡ ನಂತರ ಆತನನ್ನು ಇಸ್ರೇಲಿ ಸೈನಿಕರು ಕೊಂದು ಹಾಕಿದ್ದಾರೆ ಎಂದು ಪ್ಯಾಲೇಸ್ಟಿನಿಯನ್ ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ. M16 ಸ್ವಯಂಚಾಲಿತ ಮೆಷಿನ್ ಗನ್‌ನೊಂದಿಗೆ ಇಸ್ರೇಲಿ ಚೆಕ್ ಪಾಯಿಂಟ್​ಗೆ ಬಂದಿದ್ದ ಯುವಕ ಇಸ್ರೇಲಿ ಸೈನಿಕರು ಮತ್ತು ಭದ್ರತಾ ಪಡೆಗಳ ಮೇಲೆ ಗುಂಡು ಹಾರಿಸಿದ ಎಂದು ಇಸ್ರೇಲಿ ಪೊಲೀಸ್ ವಕ್ತಾರರು ದೃಢಪಡಿಸಿದ್ದಾರೆ.

ಫತಾಹ್ ಆಂದೋಲನದ ಸಶಸ್ತ್ರ ವಿಭಾಗವಾದ ಅಲ್ ಅಕ್ಸಾ ಹುತಾತ್ಮ ದಳವು (Al-Aqsa Martyrs Brigade) ಇಸ್ರೇಲಿ ಚೆಕ್‌ಪಾಯಿಂಟ್ ಮೇಲಿನ ದಾಳಿಯ ಹೊಣೆಯನ್ನು ಹೊತ್ತುಕೊಂಡಿದೆ. 39 ವರ್ಷದ ತಾರಿಕ್ ಇದ್ರಿಸ್ ಎಂಬಾತ ಶುಕ್ರವಾರ ಉತ್ತರ ವೆಸ್ಟ್ ಬ್ಯಾಂಕ್ ನಗರವಾದ ನಬ್ಲಸ್‌ನಲ್ಲಿ ಇಸ್ರೇಲಿ ಸೇನೆಯ ದಾಳಿಯ ಗುಂಡೇಟಿನಿಂದ ಗಾಯಗೊಂಡು ಸಾವಿಗೀಡಾಗಿದ್ದಾನೆ ಎಂದು ಪ್ಯಾಲೇಸ್ಟಿನಿಯನ್ ಆರೋಗ್ಯ ಸಚಿವಾಲಯ ತಿಳಿಸಿದೆ.

ಪ್ರತ್ಯಕ್ಷದರ್ಶಿಗಳ ಪ್ರಕಾರ, ನಿರಾಶ್ರಿತರ ಶಿಬಿರದಲ್ಲಿನ ಡಜನ್‌ಗಟ್ಟಲೆ ಪ್ಯಾಲೆಸ್ಟೀನಿಯನ್ನರು ಮತ್ತು ಇಸ್ರೇಲಿ ಸೈನಿಕರ ನಡುವಿನ ಘರ್ಷಣೆಯಲ್ಲಿ ಇದ್ರಿಸ್ ತೀವ್ರವಾಗಿ ಗಾಯಗೊಂಡಿದ್ದ. ಇಸ್ರೇಲ್​ ತನಗೆ ಬೇಕಾಗಿರುವ ಪ್ಯಾಲೇಸ್ಟೈನಿಯರನ್ನು ಬಂಧಿಸಲು ಜನವರಿ ಆರಂಭದಿಂದ ಬಹುತೇಕ ಪ್ರತಿದಿನ ಪ್ಯಾಲೇಸ್ಟಿನಿಯನ್ ಪಟ್ಟಣಗಳು ಮತ್ತು ನಗರಗಳ ಮೇಲೆ ದಾಳಿ ನಡೆಸುತ್ತಿದೆ. ಇದರಿಂದ ವೆಸ್ಟ್ ಬ್ಯಾಂಕ್ ಮತ್ತು ಪೂರ್ವ ಜೆರುಸಲೆಮ್‌ನಲ್ಲಿ ಉದ್ವಿಗ್ನತೆ ಭುಗಿಲೆದ್ದಿದೆ.

ಕಳೆದ ಜನವರಿಯಿಂದ ಪ್ಯಾಲೇಸ್ಟೈನ್ ದಾಳಿಯಲ್ಲಿ 24 ಇಸ್ರೇಲಿಗರು ಕೊಲ್ಲಲ್ಪಟ್ಟಿದ್ದಾರೆ. ಹಾಗೆಯೇ ಇಸ್ರೇಲ್ ಯೋಧರ ದಾಳಿಯಿಂದ ಮಕ್ಕಳು ಮಹಿಳೆಯರು ಸೇರಿದಂತೆ 175 ಪ್ಯಾಲೆಸ್ಟೈನಿಯನ್ನರು ಸಾವಿಗೀಡಾಗಿದ್ದಾರೆ.

ಐಸಿಸ್ ಉಗ್ರರನ್ನು ಕೊಂದು ಹಾಕಿದ ಇರಾಕ್ ಸೇನೆ: ಇರಾಕ್​ನ ಉತ್ತರ ಪ್ರಾಂತ್ಯದ ಕಿರ್ಕುಕ್‌ನಲ್ಲಿ ಇಸ್ಲಾಮಿಕ್ ಸ್ಟೇಟ್ (ಐಎಸ್) ಉಗ್ರಗಾಮಿಗಳ ಅಡಗುತಾಣದ ಮೇಲೆ ವೈಮಾನಿಕ ದಾಳಿ ನಡೆಸಿ ಅಲ್ಲಿದ್ದ ಎಲ್ಲಾ ಉಗ್ರರನ್ನು ಹತ್ಯೆ ಮಾಡಿರುವುದಾಗಿ ಇರಾಕ್ ಮಿಲಿಟರಿ ಹೇಳಿದೆ. ಗುಪ್ತಚರ ವರದಿಗಳ ಆಧಾರದ ಮೇಲೆ, ಪ್ರಾಂತೀಯ ರಾಜಧಾನಿ ಕಿರ್ಕುಕ್‌ನಿಂದ ದಕ್ಷಿಣಕ್ಕೆ 60 ಕಿಮೀ ದೂರದಲ್ಲಿರುವ ಅಲ್-ರಶಾದ್ ಪಟ್ಟಣದ ಸಮೀಪವಿರುವ ಹಳ್ಳಿಯೊಂದರ ಅಡಗುತಾಣದ ಮೇಲೆ ಇರಾಕ್ ಯುದ್ಧವಿಮಾನಗಳು ವೈಮಾನಿಕ ದಾಳಿ ನಡೆಸಿವೆ. ವೈಮಾನಿಕ ದಾಳಿಯ ನಂತರ ಅಡಗುತಾಣದಲ್ಲಿ ಐಎಸ್ ಉಗ್ರರ ಶವಗಳು ಪತ್ತೆಯಾಗಿವೆ ಎಂದು ಇರಾಕ್ ಸೇನೆ ಹೇಳಿದೆ.

ಇದನ್ನೂ ಓದಿ :Stock Market: ಇಕ್ವಿಟಿ ಮಾರುಕಟ್ಟೆಯಲ್ಲಿ ಎಫ್​ಪಿಐಗಳಿಂದ 30,600 ಕೋಟಿ ರೂ. ಹೂಡಿಕೆ