ಚಂದಿರನ ಅಂಗಳಕ್ಕೆ ಹಾರಲು NASA ಪ್ರಯತ್ನ: ತಾಂತ್ರಿಕ ಸಮಸ್ಯೆಯಿಂದ ಮೇಲೇಳದ ರಾಕೆಟ್​​

ಅಮೆರಿಕದ ಫ್ಲೋರಿಡಾದಲ್ಲಿರುವ ನಾಸಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ಇಂದು ಗಗನಕ್ಕೆ ಚಿಮ್ಮಬೇಕಿದ್ದ ಆರ್ಟೆಮಿಸ್ 1 ಮಿಷನ್ ರಾಕೆಟ್ ತಾಂತ್ರಿಕ ಸಮಸ್ಯೆಯಿಂದ ಉಡಾವಣೆಗೊಂಡಿಲ್ಲ.

ವಾಷಿಂಗ್ಟನ್​​​(ಅಮೆರಿಕ): ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ (ನಾಸಾ) ವಿಜ್ಞಾನಿಗಳು ಆರ್ಟೆಮಿಸ್ ಮಿಷನ್ ಅಡಿ ಮತ್ತೆ ಚಂದ್ರನ ಮೇಲೆ ಮಾನವನನ್ನು ಕಳುಹಿಸಲು ತಯಾರಿ ನಡೆಸುತ್ತಿದ್ದಾರೆ. ಇದರ ಭಾಗವಾಗಿ ಇಂದು ಆರ್ಟೆಮಿಸ್ 1 ಮಿಷನ್ ರಾಕೆಟ್ ಉಡಾವಣೆ ಪ್ರಯತ್ನ ನಡೆಸಿದ್ದು, ತಾಂತ್ರಿಕ ಸಮಸ್ಯೆಯಿಂದಾಗಿ ರಾಕೆಟ್ ಉಡಾವಣೆಗೊಂಡಿಲ್ಲ.

ನಾಸಾ ನಿರ್ಮಿಸಿದ ಅತ್ಯಂತ ಶಕ್ತಿಶಾಲಿ ರಾಕೆಟ್​​​ ಆರ್ಟೆಮಿಸ್​​ 1 ಮಿಷನ್​​​ ಉಡಾವಣೆಗೊಳ್ಳಬೇಕಾಗಿತ್ತು. ಆದರೆ, ಇಂಜಿನ್​​ನಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿದ್ದು ರಾಕೆಟ್ ನೆಲ ಬಿಟ್ಟು ಮೇಲೇಳಲಿಲ್ಲ. ಇದರ ಬಗ್ಗೆ ನಾಸಾ ವಿಜ್ಞಾನಿಗಳು ಮಾಹಿತಿ ನೀಡಿದ್ದು, ಡೇಟಾ ಸಂಗ್ರಹ ಕಾರ್ಯ ಮುಂದುವರೆದಿದೆ. ಉಡಾವಣೆಯ ಮುಂದಿನ ದಿನಾಂಕ ತಿಳಿಸಲಾಗುವುದು ಎಂದು ನಾಸಾ ಟ್ವೀಟ್​ ಮಾಡಿದೆ.

2025ಕ್ಕೆ ಆರ್ಟೆಮಿಸ್​​ ಯೋಜನೆಯ 3ನೇ ಭಾಗ ಆರಂಭವಾಗಲಿದೆ. ಬಾಹ್ಯಾಕಾಶದ ಕಾರ್ಯಾಚರಣೆಯ ಹಿಂದಿನ ಮುಖ್ಯ ಉದ್ದೇಶ ಮಾನವರನ್ನು ಮತ್ತೊಮ್ಮೆ ಚಂದ್ರ ಲೋಕಕ್ಕೆ ಕಳುಹಿಸುವುದೇ ಆಗಿದೆ. ಇಂದಿನ ಉಡಾವಣೆ ವಿಫಲಗೊಂಡಿರುವ ಕಾರಣ ಇದೀಗ ಸೆಪ್ಟೆಂಬರ್​​ 2ರಂದು ಮತ್ತೊಮ್ಮೆ ರಾಕೆಟ್​ ಉಡಾವಣೆ ಕಾರ್ಯ ನಡೆಯಲಿದೆ.