ಉಗ್ರ ಜವಾಹಿರಿ ಹತ್ಯೆಯ 35 ನಿಮಿಷದ ವಿಡಿಯೋ ಹಂಚಿಕೊಂಡ ಅಲ್​ಖೈದಾ ಸಂಘಟನೆ

ಅವಳಿ ಕಟ್ಟಡಗಳ ಧ್ವಂಸ ಮಾಡಿದ್ದ ಮೋಸ್ಟ್​ ವಾಂಟೆಡ್​ ಉಗ್ರ ಅಯ್ನಾನ್​ ಅಲ್​ ಜವಾಹಿರಿಯನ್ನು ಅಮೆರಿಕ ಸೇನಾಪಡೆಗಳು ಡ್ರೋನ್​ ದಾಳಿ ನಡೆಸಿ ಹತ್ಯೆ ಮಾಡಿದ ವಿಡಿಯೋವನ್ನು ಅಲ್​ಖೈದಾ ಸಂಘಟನೆ ಹಂಚಿಕೊಂಡಿದೆ.

ಕೈರೋ(ಈಜಿಪ್ಟ್):ಮೋಸ್ಟ್​ ವಾಂಟೆಡ್​ ಉಗ್ರ ಅಯ್ನಾನ್​ ಅಲ್​ ಜವಾಹಿರಿಯನ್ನು ಅಮೆರಿಕ ಡ್ರೋನ್​ ದಾಳಿ ನಡೆಸಿ ಹತ್ಯೆ ಮಾಡಿತ್ತು. ತನ್ನ ನಾಯಕನನ್ನು ಕೊಂದ 35 ನಿಮಿಷಗಳ ವಿಡಿಯೋವನ್ನು ಅಂತಾರಾಷ್ಟ್ರೀಯ ಉಗ್ರ ಸಂಘಟನೆಯಾದ ಅಲ್​ ಖೈದಾ ಶುಕ್ರವಾರ ಬಿಡುಗಡೆ ಮಾಡಿದೆ ಎಂದು ವರದಿಯಾಗಿದೆ.

ಗುಪ್ತಚರ ಸಂಸ್ಥೆಯಾದ SITE ಈ ವಿಡಿಯೋದ ಸತ್ಯಾಸತ್ಯತೆ ಬಗ್ಗೆ ನಿರೂಪಿಸಿದ್ದು, ಅಲ್​ಖೈದಾ ಸಂಘಟನೆಯ ಜವಾಹಿರಿಯ ಬಲಿ ಪಡೆದ ವಿಡಿಯೋ ಎಂದು ಹೇಳಿದೆ. 9/11 ದಾಳಿ ಎಂದೇ ಕುಖ್ಯಾತಿಯಾದ ಅಮೆರಿಕದ ಅವಳಿ ಕಟ್ಟಡಗಳ ಧ್ವಂಸದ ಮಾಸ್ಟರ್​ಮೈಂಡ್​ ಜವಾಹಿರಿಯನ್ನು ಅದರ ಸೇನಾಪಡೆಗಳು ಬೆಂಬತ್ತಿದ್ದವು. ಹಲವು ವರ್ಷಗಳಿಂದ ಅಜ್ಞಾತವಾಸದಲ್ಲಿದ್ದ ಉಗ್ರನನ್ನು ಅಫ್ಘಾನಿಸ್ತಾನದ ಕಾಬೂಲ್​ನಲ್ಲಿ ಇರುವುದನ್ನು ಪತ್ತೆ ಮಾಡಲಾಗಿತ್ತು.

ಅದರಂತೆ ನಿಖರ ದಾಳಿ ರೂಪಿಸಿ ಡ್ರೋನ್​ ಮೂಲಕ ಜುಲೈ 31 ರಂದು ಜವಾಹಿರಿಯನ್ನು ಉಡಾಯಿಸಲಾಯಿತು. ಅದರ ವಿಡಿಯೋವನ್ನು ಅಲ್​​ಖೈದಾ ಈಗ ಹಂಚಿಕೊಂಡಿದೆ. ದಾಳಿ ನಡೆದ ದಿನಾಂಕವನ್ನು ಮಾತ್ರ ಅದು ನಮೂದಿಸಿಲ್ಲ.

ಅಫ್ಘಾನಿಸ್ತಾನವನ್ನು ತಾಲಿಬಾನ್ ವಶಪಡಿಸಿಕೊಳ್ಳುವವರೆಗೂ ಜವಾಹಿರಿ ಪಾಕಿಸ್ತಾನದಲ್ಲಿ ವಾಸಿಸುತ್ತಿದ್ದ ಎಂದೇ ಹೇಳಲಾಗಿತ್ತು. ತಾಲಿಬಾನಿಗಳು ಅಧಿಕಾರ ಸ್ಥಾಪಿಸಿದ ಬಳಿಕ ಪಾಕ್​ ಗಡಿಯಿಂದ ಆಫ್ಘನ್​ಗೆ ತೆರಳಿದ್ದ. ಅಮೆರಿಕ ಪಡೆಗಳು ಕೂಡ ಅಷ್ಟೊತ್ತಿಗೆ ಅಲ್ಲಿಂದ ಕಾಲ್ಕಿತ್ತಿದ್ದವು. ಈ ಕಾರಣಕ್ಕಾಗಿ ಆತ ಆಫ್ಘನ್​ಗೆ ವಲಸೆ ಹೋಗಿದ್ದ. ಆತನ ಕುಟುಂಬ ಕಾಬೂಲ್​ನಲ್ಲಿ ವಾಸಿಸುತ್ತಿದೆ ಎಂದು ತಿಳಿದುಬಂದಿದೆ.

ಇನ್ನು ಅಯ್ನಾನ್​ ಅಲ್​ ಜವಾಹಿರಿ ಪಾಕಿಸ್ತಾನಕ್ಕೆ ಕಂಟಕವಾಗಿದ್ದ ಕಾರಣ ಅಲ್ಲಿನ ಸರ್ಕಾರವೇ ಅಮೆರಿಕದ ಜೊತೆಗೂಡಿ ಹತ್ಯೆ ಮಾಡಲು ಸಂಚು ರೂಪಿಸಿತ್ತು ಎಂದು ಅಮೆರಿಕನ್ ಎಂಟರ್‌ಪ್ರೈಸ್ ಇನ್‌ಸ್ಟಿಟ್ಯೂಟ್‌ನ (ಎಇಐ) ಹಿರಿಯ ಉದ್ಯೋಗಿ ಮೈಕೆಲ್ ರೂಬಿನ್ ಹೇಳಿಕೆ ನೀಡಿದ್ದರು.

ಓದಿ:ಸಾರಿಗೆ ನೌಕರರ ಧರಣಿ: ಪ್ರತಿಭಟನೆ ಕೈ ಬಿಡುವಂತೆ ಪೊಲೀಸರಿಂದ ಧಮ್ಕಿ ಆರೋಪ