ಮೊದಲ ಪರಮಾಣು ದಾಳಿಗೆ 77 ವರ್ಷ: ಅಣ್ವಸ್ತ್ರ ಮುಕ್ತ ಜಗತ್ತಿಗೆ ವಿಶ್ವ ನಾಯಕರ ಕರೆ

ಪರಮಾಣು ದಾಳಿಯ ಭೀಕರತೆಯನ್ನು ಇಂದು ಮತ್ತೊಮ್ಮೆ ನೆನಪಿಸಿಕೊಳ್ಳಬೇಕಾದ ಕಾಲ ಬಂದಿದೆ. ಹಿರೋಶಿಮಾ ನಗರದ ಮೇಲೆ ಅಮೆರಿಕ ಪರಮಾಣು ಬಾಂಬ್ ದಾಳಿ ನಡೆಸಿ ಇಂದಿಗೆ 77 ವರ್ಷಗಳಾಗುತ್ತಿವೆ. ಉಕ್ರೇನ್ ಮೇಲೆ ರಷ್ಯಾ ದಾಳಿಯಿಂದ ಮತ್ತೊಂದು ಪರಮಾಣು ಯುದ್ಧ ನಡೆಯಲಿದೆಯಾ ಎಂಬ ಆತಂಕ ಮನೆ ಮಾಡಿದೆ.

ಟೋಕಿಯೊ: ಹಿರೋಶಿಮಾ ನಗರದ ಮೇಲೆ ಅಮೆರಿಕ ಪರಮಾಣು ಬಾಂಬ್ ದಾಳಿ ನಡೆಸಿ ಇಂದಿಗೆ 77 ವರ್ಷಗಳಾಗುತ್ತಿವೆ. ಈ ಮಧ್ಯೆ ಜಗತ್ತಿನಲ್ಲಿ ಪರಮಾಣು ಅಸ್ತ್ರಗಳ ಸಂಗ್ರಹದಲ್ಲಿ ಹೆಚ್ಚಳವಾಗುತ್ತಿರುವುದು ಮತ್ತು ಉಕ್ರೇನ್ ಮೇಲೆ ರಷ್ಯಾ ದಾಳಿ ಹಿನ್ನೆಲೆಯಲ್ಲಿ ವಿಶ್ವಸಂಸ್ಥೆಯ ಮುಖ್ಯಸ್ಥರು ಸೇರಿದಂತೆ ಹಲವಾರು ನಾಯಕರು, ಮತ್ತೊಂದು ಪರಮಾಣು ದಾಳಿಯ ಸಂಭವನೀಯತೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ.

ಮತ್ತೆ ಪರಮಾಣು ಭೀತಿ:ಹಿರೋಶಿಮಾ ಮೇಲೆ ಪರಮಾಣು ಬಾಂಬ್ ದಾಳಿ ನಡೆದು 77 ವರ್ಷಗಳು ಕಳೆದ ನಂತರ ಈಗ ಮತ್ತೊಮ್ಮೆ ಪರಮಾಣು ಭೀತಿ ಆವರಿಸುತ್ತಿದೆ. "ಪರಮಾಣು ಶಸ್ತ್ರಾಸ್ತ್ರಗಳು ಅರಿವುಗೇಡಿ ಅಸ್ತ್ರಗಳು. ಅವುಗಳಿಂದ ವಿಶ್ವಕ್ಕೆ ಯಾವತ್ತೂ ಸುರಕ್ಷತೆ ಸಿಗಲಾರದು. ಅವು ಕೇವಲ ಸಾವು ಮತ್ತು ವಿನಾಶಗಳನ್ನು ಮಾತ್ರ ತರಬಲ್ಲವು" ಎಂದು ವಿಶ್ವಸಂಸ್ಥೆಯ ಸೆಕ್ರೆಟರಿ ಜನರಲ್ ಅಂಟೋನಿಯೊ ಗುಟೆರಸ್ ಹೇಳಿದರು. ಹಿರೋಶಿಮಾ ಪೀಸ್​ ಪಾರ್ಕ್​ನಲ್ಲಿ ನಡೆದ ಶಾಂತಿ ಪ್ರಾರ್ಥನೆ ಸಭೆಯಲ್ಲಿ ಅವರು ಮಾತನಾಡಿದರು.

ಹಿರೋಶಿಮಾ ನಗರದ ಮೇಲೆ ಅವತ್ತು ಆವರಿಸಿದ ಅಣಬೆಯಾಕಾರದ ಮೋಡಗಳಿಂದ ನಾವು ಯಾವ ಪಾಠ ಕಲಿತಿದ್ದೇವೆ ಎಂಬುದನ್ನು 77 ವರ್ಷಗಳ ನಂತರ ನಾವಿಂದು ಪರಿಶೀಲನೆ ಮಾಡಬೇಕಿದೆ. ಎಂದು ಅವರು ಹೇಳಿದರು. 1945ರ ಆಗಸ್ಟ್​ 6 ರಂದು ಅಮೆರಿಕವು ಜಗತ್ತಿನ ಮೊದಲ ಪರಮಾಣು ಅಸ್ತ್ರವನ್ನು ಹಿರೋಶಿಮಾ ನಗರದ ಮೇಲೆ ಹಾಕಿತ್ತು. ಈ ದಾಳಿಯಲ್ಲಿ ಹಿರೋಶಿಮಾ ನಗರ ಸಂಪೂರ್ಣ ಭಸ್ಮವಾಗಿತ್ತು. ಇದರಲ್ಲಿ 1 ಲಕ್ಷ 40 ಸಾವಿರ ಜನ ಪ್ರಾಣ ಕಳೆದುಕೊಂಡಿದ್ದರು.

ಇದಾಗಿ ಮೂರು ದಿನಗಳ ನಂತರ ಅಮೆರಿಕ ನಾಗಸಾಕಿಯ ಮೇಲೆ ಎರಡನೇ ಬಾಂಬ್ ಅನ್ನು ಬೀಳಿಸಿತ್ತು. ಈ ದಾಳಿಯಲ್ಲಿ 70 ಸಾವಿರ ಜನ ಸಾವಿಗೀಡಾಗಿದ್ದರು. ಇದರ ನಂತರ ಜಪಾನ್ ಆಗಸ್ಟ್ 15 ರಂದು ಶರಣಾಯಿತು ಮತ್ತು ಇಲ್ಲಿಗೆ ಎರಡನೇ ವಿಶ್ವಸಮರ ಕೊನೆಗೊಂಡಿತ್ತು. ಅಲ್ಲದೇ ಏಷ್ಯಾದಲ್ಲಿ ಜಪಾನ್‌ನ ಸುಮಾರು ಅರ್ಧ ಶತಮಾನದ ಆಳ್ವಿಕೆಯನ್ನು ಇದು ಕೊನೆಗೊಳಿಸಿತು. ಪ್ರಸ್ತುತ ಫೆಬ್ರವರಿಯಲ್ಲಿ ಉಕ್ರೇನ್ ವಿರುದ್ಧದ ಯುದ್ಧ ಪ್ರಾರಂಭವಾದಾಗಿನಿಂದ ರಷ್ಯಾ ಉಕ್ರೇನ್ ವಿರುದ್ಧ ಪರಮಾಣು ದಾಳಿ ನಡೆಸುವ ಭಯ ಆವರಿಸುತ್ತಿದೆ.

ಪುಟಿನ್​ ವಿರುದ್ಧ ವಾಗ್ದಾಳಿ:ಹಿರೋಷಿಮಾ ಮೇಯರ್ ಕಝುಮಿ ಮಾಟ್ಸುಯಿ ಶಾಂತಿ ಘೋಷಣೆಯಲ್ಲಿ ಮಾತನಾಡಿ, ಪುಟಿನ್ ತನ್ನ ಸ್ವಂತ ಜನರನ್ನು ಯುದ್ಧದ ಸಾಧನಗಳಾಗಿ ಬಳಸುತ್ತಿದ್ದಾರೆ ಮತ್ತು ಇನ್ನೊಂದು ದೇಶದಲ್ಲಿ ಮುಗ್ಧ ನಾಗರಿಕರ ಜೀವನ ಮತ್ತು ಜೀವನೋಪಾಯವನ್ನು ಕಸಿಯುತ್ತಿದ್ದಾರೆ" ಎಂದು ಆರೋಪಿಸಿದರು. ಉಕ್ರೇನ್‌ನ ಮೇಲಿನ ರಷ್ಯಾದ ಯುದ್ಧವು ಪರಮಾಣು ಶಸ್ತ್ರಾಸ್ತ್ರ ತಡೆಗೆ ಬೆಂಬಲ ಕ್ರೋಢೀಕರಿಸಲು ಸಹಾಯ ಮಾಡುತ್ತಿದೆ ಎಂದು ಮಾಟ್ಸುಯಿ ಹೇಳಿದರು. 77 ವರ್ಷಗಳ ಹಿಂದೆ ತನ್ನ ನಗರವನ್ನು ನಾಶಪಡಿಸಿದಂಥ ತಪ್ಪು ಪುನರಾವರ್ತನೆ ಆಗದಂತೆ ನೋಡಿಕೊಳ್ಳಬೇಕೆಂದು ಅವರು ಜಗತ್ತಿಗೆ ಒತ್ತಾಯಿಸಿದರು.

ಪರಮಾಣು ಶಸ್ತ್ರಾಸ್ತ್ರಗಳ ಬಳಕೆಯ ದುರಂತವು ಎಂದಿಗೂ ಮರುಕಳಿಸಬಾರದು ಎಂದು ಪ್ರಪಂಚದ ಜನರಿಗೆ ಮನವಿ ಮಾಡುತ್ತಿದ್ದೇನೆ. ಎಷ್ಟೇ ಕಷ್ಟವಾದರೂ ಪರಮಾಣು ಶಸ್ತ್ರಾಸ್ತ್ರಗಳಿಲ್ಲದ ಪ್ರಪಂಚದ ಕಡೆಗೆ ಜಪಾನ್ ತನ್ನ ಪ್ರಯತ್ನಗಳನ್ನು ಮುಂದುವರಿಸಲಿದೆ ಎಂದು ಸಭೆಯಲ್ಲಿ ಪಾಲ್ಗೊಂಡಿದ್ದ ಜಪಾನ್ ಪ್ರಧಾನಿ ಫ್ಯೂಮಿಯೊ ಕಿಶಿಡಾ ಹೇಳಿದರು.

ಶನಿವಾರ ಶಾಂತಿ ಸಭೆಯಲ್ಲಿ ಹಾಜರಿದ್ದ ಸರ್ಕಾರದ ನಾಯಕರು ಮತ್ತು ರಾಜತಾಂತ್ರಿಕರು ಸೇರಿದಂತೆ ಜನಸಮುದಾಯದವರು 8:15 ಕ್ಕೆ ಶಾಂತಿ ಗಂಟೆಯ ಧ್ವನಿಯೊಂದಿಗೆ ಮೌನ ಆಚರಿಸಿದರು. ಅವತ್ತು ಅಮೆರಿಕದ ಯುಎಸ್​ಬಿ -29 ವಿಮಾನವು ಹಿರೋಶಿಮಾ ನಗರದ ಮೇಲೆ ಇದೇ ಸಮಯಕ್ಕೆ ಬಾಂಬ್ ಹಾಕಿತ್ತು. ಶಾಂತಿಯ ಸಂಕೇತವಾಗಿ ಸುಮಾರು 400 ಪಾರಿವಾಳಗಳನ್ನು ಹಾರಿಸಲಾಯಿತು.

ಬಾಂಬ್ ದಾಳಿಯಿಂದ ಬದುಕುಳಿದ ಅನೇಕರು ಸ್ಫೋಟ ಮತ್ತು ವಿಕಿರಣದ ಪ್ರಭಾವದ ಪರಿಣಾಮವಾಗಿ ಶಾಶ್ವತವಾದ ಗಾಯ ಮತ್ತು ಕಾಯಿಲೆಗಳನ್ನು ಹೊಂದಿದ್ದಾರೆ. ಅಲ್ಲದೆ ಇವರು ಜಪಾನ್‌ನಲ್ಲಿ ತಾರತಮ್ಯ ನೀತಿಯನ್ನು ಎದುರಿಸುತ್ತಿದ್ದಾರೆ.

ಇದನ್ನು ಓದಿ:ತೈವಾನ್ ಗಡಿ ತಲುಪಿದ ಚೀನಾ ಯುದ್ಧ ನೌಕೆಗಳು: ಆತಂಕದಲ್ಲಿ ದ್ವೀಪರಾಷ್ಟ್ರ