ಅಮೆರಿಕಾ ಪಡೆ ನೆಲೆಸಿರುವ ಶಿಬಿರದ ಮೇಲೆ ರಾಕೆಟ್ ದಾಳಿ

ಅಮೆರಿಕಾ-ಇರಾನ್ ನಡುವೆ ಉದ್ವಿಗ್ನ ಸ್ಥಿತಿ ನಿರ್ಮಾಣವಾಗಿರುವ ಮಧ್ಯೆ ಬಾಗ್ದಾದ್ ಬಳಿಯ ತಾಜಿ ಸೇನಾ ನೆಲೆಯ ಮೇಲೆ ರಾಕೆಟ್ ದಾಳಿಯಾಗಿದೆ. ಇಲ್ಲಿ ಅಮೆರಿಕಾ ಸೇರಿದಂತೆ ವಿದೇಶಿ ಸೇನಾ ಪಡೆ ನೆಲೆಸಿದ್ದವು.

ಬಾಗ್ದಾದ್: ಇರಾಕ್ ರಾಜಧಾನಿ ಬಾಗ್ದಾದ್​ ಬಳಿಯ ಅಮೆರಿಕಾ ಪಡೆ ಹಾಗೂ ಇತರೆ ವಿದೇಶಿ ಸೇನಾ ಪಡೆಯ ತಾಜಿ ಸೇನಾ ಶಿಬಿರದ ಮೇಲೆ ಮಂಗಳವಾರ ರಾಕೆಟ್ ದಾಳಿಯಾಗಿದೆ. ಆದ್ರೆ ಯಾವುದೇ ಪ್ರಾಣ ಹಾನಿ ಸಂಭವಿಸಿಲ್ಲ ಎಂದು ವರದಿಯಾಗಿದೆ.

ಕಮಾಂಡರ್ ಖಾಸೀಮ್ ಸುಲೇಮಾನಿ ಹತ್ಯೆಯ ಬಳಿಕ ಅಮೆರಿಕಾ-ಇರಾನ್ ನಡುವೆ ಉದ್ವಿಗ್ನ ಸ್ಥಿತಿ ನಿರ್ಮಾಣವಾಗಿದೆ. ಈ ಮಧ್ಯೆ ಮಂಗಳವಾರ ಇಲ್ಲಿನ ಸೇನಾ ನೆಲೆಯ ಮೇಲೆ ಕತ್ಯುಶ ರಾಕೆಟ್ ದಾಳಿಯಾಗಿದೆ. ಇರಾನ್ ಬೆಂಬಲಿತ ಪಡೆಗಳೇ ಈ ದಾಳಿ ನಡೆಸಿವೆ ಎನ್ನಲಾಗುತ್ತಿದೆ. ಆದ್ರೆ ಯಾರೂ ಕೂಡ ದಾಳಿಯ ಹೊಣೆ ಹೊತ್ತುಕೊಂಡಿಲ್ಲ ಎಂದು ವರದಿಯಾಗಿದೆ.

ಎರಡು ರಾಕೆಟ್​ಗಳು ಅಪ್ಪಳಿಸಿವೆ ಎಂದು ಇರಾಕ್ ಸೇನಾ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.