ಟೆಹ್ರಾನ್:ಇರಾನ್ನ ಪರಮಾಣು ಯೋಜನೆಗಳ ಅತ್ಯಂತ ಉನ್ನತ ವಿಜ್ಞಾನಿ ಮೊಹ್ಸೆನ್ ಫಕ್ರಿಜಾಡೆ ಅವರನ್ನು ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ.
ಇರಾನ್ ರಾಜಧಾನಿ ಟೆಹ್ರನ್ ವಲಯದಲ್ಲಿ ಮೊಹ್ಸೆನ್ ಫಕ್ರಿಜಾಡೆ ಪ್ರಯಾಣ ಮಾಡ್ತಿದ್ದ ಕಾರಿನ ಮೇಲೆ ಗುಂಡಿನ ಮಳೆಗರೆದು ಉಗ್ರರು ಅವರನ್ನು ಕೊಲೆ ಮಾಡಿದ್ದಾರೆ. ಗುಂಡು ಹಾರಿಸಿದ ನಂತರ ಅವರನ್ನು ಆಸ್ಪತ್ರೆಗೆ ಸೇರಿಸಲಾಯಿತಾದರೂ ಚಿಕಿತ್ಸೆ ಫಲಕಾರಿಯಾಗದೇ ಮೊಹ್ಸೆನ್ ಫಕ್ರಿಜಾಡೆ ಕೊನೆಯುಸಿರೆಳೆದಿದ್ದಾರೆ.
ಈ ಕುರಿತು ಮಾಹಿತಿ ನೀಡಿರುವ ಇರಾನ್ ರಕ್ಷಣಾ ಸಚಿವಾಲಯ, ಭಯೋತ್ಪಾದಕ ದಾಳಿಯಲ್ಲಿ ಮೊಹ್ಸೆನ್ ಫಕ್ರಿಜಾಡೆ ಹತ್ಯೆಗೀಡಾಗಿದ್ದಾರೆ ಎಂದು ಸ್ಪಷ್ಟಪಡಿಸಿದೆ. ಇನ್ನು ನ್ಯೂಕ್ಲಿಯರ್ ವಿಜ್ಞಾನಿ ಮೊಹ್ಸೆನ್ ಫಕ್ರಿಜಾಡೆ ಅವರ ಹತ್ಯೆಯನ್ನು ಖಂಡಿಸಿರುವ ಇರಾನ್ ವಿದೇಶಾಂಗ ಸಚಿವ ಮೊಹಮ್ಮದ್ ಜವಾದ್ ಜರೀಫ್, ನಮ್ಮ ಪರಮಾಣು ವಿಜ್ಞಾನಿಯ ಕೊಲೆ ಅತ್ಯಂತ ಖಂಡನೀಯ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ದಾಳಿ ಹೊಣೆಯನ್ನು ಯಾರೂ ಹೊತ್ತುಕೊಂಡಿಲ್ಲವಾದರೂ, ಮೊಹಮ್ಮದ್ ಜವಾದ್ ಜರೀಫ್ ಇಸ್ರೇಲ್ ಕಡೆಗೆ ಬೆರಳು ತೋರಿಸಿ, ಈ ಹತ್ಯೆಯನ್ನು " ಸ್ಟೇಟ್ ಟೆರರ್" ಎಂದು ಕರೆದಿದ್ದಾರೆ. “ಭಯೋತ್ಪಾದಕರು ಇಂದು ಪ್ರಸಿದ್ಧ ಇರಾನಿನ ವಿಜ್ಞಾನಿಗಳನ್ನು ಕೊಲೆ ಮಾಡಿದ್ದಾರೆ. ಈ ಹೇಡಿತನ - ಇಸ್ರೇಲಿ ಪಾತ್ರದ ಗಂಭೀರ ಸೂಚನೆಗಳೊಂದಿಗೆ - ದುಷ್ಕರ್ಮಿಗಳ ಹತಾಶ ಯುದ್ಧವನ್ನು ತೋರಿಸುತ್ತದೆ ”ಎಂದು ಜರೀಫ್ ಟ್ವಿಟರ್‌ನಲ್ಲಿ ಬರೆದಿದ್ದಾರೆ.
ಈ ಕುರಿತು ಅಮೆರಿಕ ಹಾಲಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂಡ ಟ್ವೀಟ್ ಮಾಡಿದ್ದು, ಈ ಹತ್ಯೆಯನ್ನು "ಇರಾನ್ಗೆ ದೊಡ್ಡ ಮಾನಸಿಕ ಮತ್ತು ವೃತ್ತಿಪರ ಹೊಡೆತ" ಎಂದು ಕರೆದಿದ್ದಾರೆ.
