ಉಕ್ರೇನ್​-ರಷ್ಯಾ ಸಂಘರ್ಷ: 80 ನಾಗರಿಕರು ಉಳಿದುಕೊಂಡಿದ್ದ ಮಸೀದಿ ಮೇಲೆ ರಷ್ಯಾ ಬಾಂಬ್ ದಾಳಿ

Russia-Ukraine Conflict: ರಷ್ಯಾ ಮಿಲಿಟರಿ ದಾಳಿಗೆ ಉಕ್ರೇನ್​​ ಸಂಪೂರ್ಣವಾಗಿ ತತ್ತರಿಸಿ ಹೋಗಿದ್ದು, ಕೀವ್​, ಖಾರ್ಕಿವ್​, ಸುಮಿ ಸೇರಿದಂತೆ ಪ್ರಮುಖ ನಗರಗಳು ಬಹುತೇಕ ಧ್ವಂಸಗೊಂಡಿವೆ. ಇದೀಗ ಮರಿಯುಪೋಲ್ ಮೇಲೆ ಮಿಲಿಟರಿ ದಾಳಿ ನಡೆಸಿರುವ ರಷ್ಯಾ ಅಲ್ಲಿನ ಮಸೀದಿ ಮೇಲೆ ಬಾಂಬ್ ದಾಳಿ ನಡೆಸಿದೆ.

ಮರಿಯುಪೋಲ್​​(ಉಕ್ರೇನ್​):ಉಕ್ರೇನ್​​-ರಷ್ಯಾ ನಡುವಿನ ಸಂಘರ್ಷ ಮುಂದುವರೆದಿದ್ದು, ರಷ್ಯಾ ಮಿಲಿಟರಿ ಪಡೆಗಳು ನಡೆಸುತ್ತಿರುವ ಬಾಂಬ್​ ದಾಳಿಯಲ್ಲಿ ಸಾವಿರಾರು ಅಮಾಯಕರು ತಮ್ಮ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಇದೀಗ ಲಭ್ಯವಾಗಿರುವ ಮಾಹಿತಿ ಪ್ರಕಾರ ಉಕ್ರೇನ್​​ನ ಮರಿಯುಪೋಲ್​​ನ ಮಸೀದಿವೊಂದರ ಮೇಲೆ ಬಾಂಬ್ ದಾಳಿ ನಡೆಸಲಾಗಿದೆ.

ಸುಮಾರು 80 ಜನರು ಉಳಿದುಕೊಂಡಿದ್ದ ಮರಿಯುಪೋಲ್​​ನ ಮಸೀದಿ ಮೇಲೆ ರಷ್ಯಾ ಪಡೆಗಳು ಬಾಂಬ್ ದಾಳಿ ನಡೆಸಿವೆ ಎಂದು ಉಕ್ರೇನ್​ ಅಧಿಕಾರಿಗಳು ಟ್ವೀಟ್ ಮಾಡಿದ್ದಾರೆ.

ಈ ಮಸೀದಿಯಲ್ಲಿ ಟರ್ಕಿ ಸೇರಿದಂತೆ ವಿವಿಧ ದೇಶದ ಮಕ್ಕಳು ಸೇರಿದಂತೆ 80ಕ್ಕೂ ಹೆಚ್ಚು ಜನರು ಅಡಗಿಕೊಂಡಿದ್ದರರು. ದಾಳಿಯಿಂದಾಗಿ ಕೆಲವರು ತಮ್ಮ ಪ್ರಾಣ ಕಳೆದುಕೊಂಡಿರುವ ಶಂಕೆ ಇದೆ ಎಂದು ತಿಳಿದುಬಂದಿದೆ.