ಲಂಡನ್:ಕೊರೊನಾ ವೈರಸ್ ವಿರುದ್ಧದ ಹೋರಾಟದಲ್ಲಿ ಪರಿಣಾಮಕಾರಿ ಲಸಿಕೆ ಹುಡುಕುವಲ್ಲಿ ಇಂಗ್ಲೆಂಡ್ ಮುಂಚೂಣಿಯತ್ತ ಸಾಗಿದೆ. ಲಂಡನ್‌ನ ಇಂಪೀರಿಯಲ್ ಕಾಲೇಜಿನ ವಿಜ್ಞಾನಿಗಳು, ಜನತೆ ವೈರಸ್ ಹೊಡೆತದಿಂದ ಮುಕ್ತರಾಗಲು ತಯಾರಿಸಲಾದ ರೋಗನಿರೋಧಕ ಲಸಿಕೆಯನ್ನು ಈ ವಾರದಿಂದ ಪ್ರಾಯೋಗಿಕವಾಗಿ ನೀಡಲು ಪ್ರಾರಂಭಿಸಿದ್ದಾರೆ.
ಆರಂಭದಲ್ಲಿ ಆರೋಗ್ಯವಂತ ಸಾವಿರಾರು ಜನರ ಮೇಲೆ ಪ್ರಯೋಗ ನಡೆಸಲು ಬೇಕಾದ ಒಂದು ಡಸನ್ ವ್ಯಾಕ್ಸಿನ್ಗಳು ಪ್ರಾಯೋಗಿಕ ಹಂತಕ್ಕೆ ಬಂದಿದೆ. ಈ ವ್ಯಾಕ್ಸಿನ್ ಯಶಸ್ವಿಯಾಗುತ್ತದೆ ಎಂಬ ಖಾತರಿಯಿಲ್ಲ. ಆದರೂ ವರ್ಷಾಂತ್ಯದ ವೇಳೆಗೆ ಕೆಲವರು ರೋಗನಿರೋಧಕ ಶಕ್ತಿ ಹೆಚ್ಚಿಸಿಕೊಂಡು ಆರೋಗ್ಯವಂತರಾಗಬಹುದು ಎಂಬ ಭರವಸೆ ಹೆಚ್ಚಿದೆ.
ಈಗಾಗಲೇ ಕನಿಷ್ಠ 82 ಲಕ್ಷಕ್ಕಿಂತಲೂ ಹೆಚ್ಚು ಜನರಿಗೆ ಸೋಂಕು ತಗುಲಿದೆ. ವಿಶ್ವಾದ್ಯಂತ 4,46,000 ಕ್ಕಿಂತಲೂ ಹೆಚ್ಚು ಜನರನ್ನು ಕೊಂದ ಈ ವೈರಸ್ ಅನ್ನು ಪರಿಣಾಮಕಾರಿ ಲಸಿಕೆಯೊಂದಿಗೆ ಮಾತ್ರ ನಿಲ್ಲಿಸಬಹುದು ಎಂದು ಅನೇಕ ವಿಜ್ಞಾನಿಗಳು ಎಚ್ಚರಿಸಿದ್ದಾರೆ. ಹೀಗಾಗಿ ಲಸಿಕೆಯ ಪರಿಣಾಮಕಾರಿ ಅಭಿವೃದ್ಧಿಗೆ ವರ್ಷಗಳೇ ಬೇಕಾಗುತ್ತದೆ ಎಂದು ಹೇಳಲಾಗಿದೆ.
ಇಂಪೀರಿಯಲ್ ಕಾಲೇಜಿನಲ್ಲಿ ಅಭಿವೃದ್ಧಿಪಡಿಸಿದ ಕೋವಿಡ್-19 ಲಸಿಕೆಯ ಎರಡು ಡೋಸ್‌ಗಳಿಂದ ಸುಮಾರು 300 ಆರೋಗ್ಯವಂತ ಜನರಿಗೆ ರೋಗನಿರೋಧಕ ಶಕ್ತಿ ನೀಡಲಾಗುವುದು ಎಂದು ಬ್ರಿಟಿಷ್ ಸರ್ಕಾರ ತಿಳಿಸಿದೆ. ಈ ವ್ಯಾಕ್ಸಿನ್ ಅನ್ನು ಸರ್ಕಾರದ 41 ಮಿಲಿಯನ್ ಪೌಂಡ್‌ಗಳ (51 ಮಿಲಿಯನ್ ಯುಎಸ್ ಡಾಲರ್) ನೆರವಿನಿಂದ ತಯಾರಿಸಲಾಗಿದೆ.
