ಬ್ರಿಟನ್​ ರಾಜಮನೆತನಕ್ಕೆ ಹೆಣ್ಣು ಮಗುವಿನ ಆಗಮನ: 'ಲಿಲಿಬೆಟ್​'ಗೆ ಜನ್ಮ ನೀಡಿದ ಮೇಘನ್​ - ಹ್ಯಾರಿ

ಬ್ರಿಟನ್​ ಯುವರಾಣಿ ಮೇಘನ್​ ಮಾರ್ಕೆಲ್ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದು, ಅಜ್ಜಿ ಮತ್ತು ಮುತ್ತಜ್ಜಿಯ ಹೆಸರು ಸೇರಿಸಿ ಲಿಲಿಬೆಟ್ ಡಯಾನಾ ಎಂದು ಕಂದಮ್ಮನಿಗೆ ಹೆಸರಿಡಲಾಗಿದೆ.

ಲಂಡನ್​​: ಬ್ರಿಟನ್​ ಯುವರಾಣಿ ಮೇಘನ್​ ಮಾರ್ಕೆಲ್​ ಹಾಗೂ ಹ್ಯಾರಿ ದಂಪತಿ ಎರಡನೇ ಮಗುವಿಗೆ ಜನ್ಮ ನೀಡಿದ್ದು, ಬ್ರಿಟನ್​ ರಾಜಮನೆತನವು ತನ್ನ 11ನೇ ಮರಿಮೊಮ್ಮಗುವನ್ನು ಬರಮಾಡಿಕೊಂಡಿದೆ.

ಮಗುವಿಗೆ ಲಿಲ್ಲಿಬೆಟ್ ಡಯಾನಾ ಎಂದು ಹೆಸರಿಡಲಾಗಿದ್ದು, ಬ್ರಿಟನ್ ರಾಣಿ ಎರಡನೇ ಎಲಿಜಬೆತ್​​ ಅವರು ಮಗುವಿಗೆ ಹಾರೈಸಿ ದಂಪತಿಗೆ ಶುಭ ಕೋರಿದ್ದಾರೆ. ರಾಣಿ ಎರಡನೇ ಎಲಿಜಬೆತ್​​ ಅವರಿಗೆ ಪ್ರೀತಿಯಿಂದ 'ಲಿಲಿಬೆಟ್' ಎಂದು ಕರೆಯುತ್ತಾರೆ. ರಾಜಮನೆತನದ ಮತ್ತೊಬ್ಬ ಯುವರಾಣಿಯೂ ಆಗಿದ್ದ ಮಗುವಿನ ಅಜ್ಜಿಯ ಹೆಸರು ಡಯಾನಾ ಆಗಿದ್ದು, ಅವರು 1997ರಲ್ಲಿ ಮೃತಪಟ್ಟಿದ್ದರು. ಹೀಗಾಗಿ ಅಜ್ಜಿ ಮತ್ತು ಮುತ್ತಜ್ಜಿಯ ಹೆಸರು ಸೇರಿಸಿ ಲಿಲಿಬೆಟ್ ಡಯಾನಾ ಎಂದು ಮಗುವಿಗೆ ಹೆಸರಿಡಲಾಗಿದೆ.

ಮೇಘನ್​ - ಹ್ಯಾರಿ ದಂಪತಿ

ಮೇಘನ್​ - ಹ್ಯಾರಿ ದಂಪತಿಗೆ ಈಗಾಗಲೇ ಗಂಡು ಮಗುವಿದ್ದು, ಇದು ಎರಡನೇ ಮಗುವಾಗಿದೆ. ಮಾರ್ಚ್​ನಲ್ಲೇ ಇವರು ತಮ್ಮ 2ನೇ ಮಗುವಿನ ಲಿಂಗವನ್ನು ಬಹಿರಂಗಪಡಿಸಿದ್ದರು. ಲಿಲಿಬೆಟ್ 3.48 ಕೆಜಿ ತೂಕವಿದ್ದು, ತಾಯಿ-ಮಗು ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ಬಕಿಂಗ್ಹ್ಯಾಮ್ ಅರಮನೆ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.