ಲಂಡನ್ ಭಾರತೀಯ ದೂತವಾಸ ಕಚೇರಿ ಮೇಲೆ ಪಾಕ್ ಬೆಂಬಲಿಗರಿಂದ ಕಲ್ಲು ತೂರಾಟ

ಮಂಗಳವಾರದಂದು ಪಾಕಿಸ್ತಾನಿ ಬೆಂಬಲಿಗರು ಭಾರತೀಯ ಹೈಕಮಿಷನ್​ ಕಚೇರಿ ಹೊರಗಡೆ ಪ್ರತಿಭಟನೆ ನಡೆಸಿ ಕಲ್ಲು ತೂರಿದ್ದಾರೆ ಎಂದು ಲಂಡನ್​​ನ ಭಾರತೀಯ ಹೈಕಮೀಷನ್ ಟ್ವೀಟ್ ಮಾಡಿದೆ.

ಲಂಡನ್:ಭಾರತೀಯ ದೂತವಾಸ ಕಚೇರಿಯ ಭದ್ರತೆ ಬಗ್ಗೆ ದನಿ ಎತ್ತಿದ ಕೆಲ ದಿನದಲ್ಲೇ ಲಂಡನ್​​ನಲ್ಲಿರುವ ಭಾರತೀಯ ದೂತವಾಸದ ಕಚೇರಿ ಮೇಲೆ ಪಾಕಿಸ್ತಾನಿ ಬೆಂಬಲಿಗರು ಕಲ್ಲು ತೂರಾಟ ನಡೆಸಿದ್ದಾರೆ.

ಆಗಸ್ಟ್ 15ರಂದು ಲಂಡನ್​ನಲ್ಲಿರುವ ಭಾರತೀಯ ದೂತವಾಸ ಕಚೇರಿ ಹೊರಭಾಗದಲ್ಲಿ ಪಾಕ್​ ಬೆಂಬಲಿಗರು ಪ್ರತಿಭಟನೆ ನಡೆಸಿದ್ದರು. ಮಂಗಳವಾರದಂದು ಪಾಕಿಸ್ತಾನಿ ಬೆಂಬಲಿಗರು ಭಾರತೀಯ ಹೈಕಮಿಷನ್​ ಕಚೇರಿ ಹೊರಗಡೆ ಪ್ರತಿಭಟನೆ ನಡೆಸಿ ಕಲ್ಲು ತೂರಿದ್ದಾರೆ ಎಂದು ಲಂಡನ್​​ನ ಭಾರತೀಯ ಹೈಕಮಿಷನ್ ಟ್ವೀಟ್ ಮಾಡಿದೆ. ಕಚೇರಿಗೆ ಹಾನಿಯಾಗಿದೆ ಎಂದು ಫೋಟೋ ಸಹಿತ ಟ್ವೀಟ್ ಮಾಡಿ ಉಲ್ಲೇಖಿಸಿದೆ.

ಈ ಟ್ವೀಟ್​ಗೆ ಪ್ರತಿಕ್ರಿಯೆ ನೀಡಿರುವ ಲಂಡನ್ ಮೇಯರ್ ಸಾದಿಕ್ ಖಾನ್​, ಘಟನೆಯನ್ನು ಖಂಡಿಸಿದ್ದಾರೆ. ಇಂತಹ ನಡೆಯನ್ನು ಖಂಡಿತಾ ಒಪ್ಪಲು ಸಾಧ್ಯವಿಲ್ಲ ಎಂದು ಟ್ವೀಟ್ ಮಾಡಿದ್ದಾರೆ.

ಮೂಲಗಳ ಪ್ರಕಾರ ಪ್ರತಿಭಟನೆ ವೇಳೆ ಪಾಕ್ ಬೆಂಬಲಿಗರು ಮೊಟ್ಟೆ, ಶೂ ಹಾಗೂ ಕಲ್ಲು ತೂರಾಟ ನಡೆಸಿದ್ದಾರೆ. ಈ ವೇಳೆ ಕಚೇರಿಯ ಗಾಜು ಹಾನಿಗೊಂಡಿದೆ.