ಲಂಡನ್: ಕ್ಲಿನಿಕಲ್ ಪರೀಕ್ಷೆಯಲ್ಲಿ ಸಾಬೀತುಪಡಿಸುವ ಮೊದಲೇ ಈ ವರ್ಷದ ಸೆಪ್ಟೆಂಬರ್ ವೇಳೆಗೆ ಒಂದು ಮಿಲಿಯನ್ನಷ್ಟು ಸಂಭಾವ್ಯ ಕೋವಿಡ್-19 ಲಸಿಕೆ ಲಭ್ಯವಾಗಲಿದೆ ಎಂದು ಆಕ್ಸ್ಫರ್ಡ್ ವಿಶ್ವವಿದ್ಯಾಲಯದ ಸಂಶೋಧಕರು ತಿಳಿಸಿದ್ದಾರೆ.
ಲಸಿಕೆ ಅಭಿವೃದ್ಧಿ ಕಾರ್ಯದ ಪ್ರಮುಖ ಸಂಶೋಧಕರಾದ ಪ್ರೊಫೆಸರ್ ಸಾರಾ ಗಿಲ್ಬರ್ಟ್, 'ChAdOx1 COVID-19' ಎಂದು ಕರೆಯಲ್ಪಡುವ ಲಸಿಕೆ ಕೊರೊನಾ ವೈರಸ್ ವಿರುದ್ಧ ಕೆಲಸ ಮಾಡಬಹುದೆಂದು ನಾನು ಮತ್ತು ನಮ್ಮ ತಂಡ ವಿಶ್ವಾಸ ಹೊಂದಿದ್ದೇವೆ ಎಂದು ಹೇಳಿದ್ದಾರೆ ಅಂತ ಮಾಧ್ಯಮಗಳು ವರದಿ ಮಾಡಿವೆ.
ಕ್ಲಿನಿಕಲ್ ಪ್ರಯೋಗ ಹಂತವು ಪ್ರಾರಂಭವಾಗುವುದಕ್ಕೆ ಮುಂಚೆಯೇ ಒಂದು ಮಿಲಿಯನ್ನಷ್ಟು 'ChAdOx1' ಎಂಬ ಲಸಿಕೆಯನ್ನು ಈಗಾಗಲೇ ತಯಾರಿಸಲಾಗುತ್ತಿದೆ. ಈ ಲಸಿಕೆಯು ಕೊರೊನಾ ವೈರಸ್ನಿಂದ ರಕ್ಷಿಸುತ್ತದೆಯೇ ಎಂದು ಪತ್ತೆ ಮಾಡುವುದಕ್ಕಾಗಿ 500 ಮಂದಿ ಆರೋಗ್ಯವಂತ ಸ್ವಯಂ ಸೇವಕರಿಗಾಗಿ ಆಕ್ಸ್ಫರ್ಡ್ ವಿಶ್ವವಿದ್ಯಾಲಯ ಹುಡುಕಾಟ ನಡೆಸಿತ್ತು.
ಸುಮಾರು 510ಕ್ಕೂ ಹೆಚ್ಚು ಸ್ವಯಂ ಸೇವರಿಗೆ ಈ ಲಸಿಕೆ ನೀಡಿ ಪರೀಕ್ಷೆ ನಡೆಸಲಾಗಿದ್ದು, ಉತ್ತಮ ಫಲಿತಾಂಶ ದೊರೆತಿದೆ ಎಂದು ಹೇಳಲಾಗಿದೆ. ಈ ಪ್ರಯೋಗವನ್ನು ಇಂಗ್ಲೆಂಡ್ನ ರೆಗ್ಯೂಲೇಟರ್ಗಳು ಅನುಮೋದಿಸಿದ್ದಾರೆ. ಲಸಿಕೆಯನ್ನು ಸಿದ್ಧಪಡಿಸಲು ಸಂಶೋಧಕರು ಸಾಧ್ಯವಾದಷ್ಟು ಬೇಗ ಕೆಲಸ ಮಾಡುತ್ತಿದ್ದಾರೆ.
ಆಕ್ಸ್ಫರ್ಡ್ ತಂಡವು 2014ರಲ್ಲಿ ಆಫ್ರಿಕಾದಲ್ಲಿ ಕಾಣಿಸಿಕೊಂಡಿದ್ದ ಎಬೋಲಾಗೆ ಲಸಿಕೆ ಕಂಡುಹಿಡಿದ ಅಸಾಧಾರಣ ಅನುಭವ ಹೊಂದಿದೆ. ಇದು ಅದಕ್ಕಿಂತಲೂ ದೊಡ್ಡ ಸವಾಲಾಗಿದೆ. ಕೋವಿಡ್-19 ವಿರುದ್ಧ ವ್ಯಾಕ್ಸಿನೇಷನ್ ಕಾರ್ಯಸಾಧ್ಯತೆಯನ್ನು ನಿರ್ಣಯಿಸಲು ಮುಂಬರುವ ಪ್ರಯೋಗವು ನಿರ್ಣಾಯಕವಾಗಿರುತ್ತದೆ ಎಂದು ಆಕ್ಸ್ಫರ್ಡ್ ವಿಶ್ವವಿದ್ಯಾಲಯದ ಜೆನ್ನರ್ ಸಂಸ್ಥೆಯ ನಿರ್ದೇಶಕ ಪ್ರೊಫೆಸರ್ ಆಡ್ರಿಯನ್ ಹಿಲ್ ಹೇಳಿದ್ದಾರೆ.