ವಾಯುದಾಳಿಯ ಮೂಲಕ ಜಿಹಾದಿ ಉಗ್ರನ ಹತ್ಯೆ: ಇಸ್ರೇಲ್- ಗಾಜಾ ನಡುವೆ ಪರಿಸ್ಥಿತಿ ಉದ್ವಿಗ್ನ

ಮಂಗಳವಾರ ಈ ಬಗ್ಗೆ ಟ್ವೀಟ್​ ಮಾಡಿರುವ ಇಸ್ರೇಲ್​ ರಕ್ಷಣಾ ಪಡೆ, ಇಂದು ಮುಂಜಾನೆ ನಾವು ಇಸ್ಲಾಮಿಕ್​ ಜಿಹಾದಿ ಕಮಾಂಡರ್​ನನ್ನು ಗಾಜಾದಲ್ಲಿ ಹತ್ಯೆಗೈದಿದ್ದೇವೆ. ಇದಕ್ಕಾಗಿಯೇ ನೀವು ಯಾಕೆ ಜಾಗೃತರಾಗಿರಬೇಕು ಎಂದು ಉಗ್ರರಿಗೆ ಎಚ್ಚರಿಕೆ ನೀಡಿದೆ.

ಜೆರುಸಲೆಮ್ ​(ಇಸ್ರೇಲ್​):ಇಸ್ರೇಲ್ ಪಡೆಗಳು ಗಾಜಾದಲ್ಲಿ ನಡೆಸಿದ ಏರ್‌ಸ್ಟ್ರೈಕ್​ನಲ್ಲಿ ಪ್ಯಾಲೆಸ್ತೀನ್​ನ ಇಸ್ಲಾಮಿಕ್ ಜಿಹಾದಿ ಸಂಘಟನೆಯ ಪ್ರಮುಖ ಕಮಾಂಡರ್ ಹತ್ಯೆಯಾಗಿದ್ದಾನೆ. ಈ ಘಟನೆಯ ನಂತರ ಇಸ್ರೇಲ್ ಮತ್ತು ಪ್ಯಾಲೆಸ್ತೀನ್‌ನ ಗಾಜಾ ನಡುವೆ ಪರಿಸ್ಥಿತಿ ಉದ್ವಿಗ್ನಗೊಂಡಿದೆ.

ಈತನೊಂದಿಗೆ ಇತರ 10 ಮಂದಿ ಉಗ್ರರನ್ನೂ ಹತ್ಯೆ ಮಾಡಲಾಗಿದೆ ಎಂದು ಪ್ಯಾಲೆಸ್ತೀನ್​ ಸರ್ಕಾರ ಮಾಹಿತಿ ನೀಡಿದೆ. ಇನ್ನೊಂದೆಡೆ ಇಸ್ರೇಲ್​ ನಡೆಸಿದ ಏರ್‌ಸ್ಟ್ರೈಕ್​ನಲ್ಲಿ ಇಸ್ಲಾಮಿಕ್​ ಜಿಹಾದಿ ನಾಯಕ ಅಕ್ರಮ್​-ಅಲ್​-ಅಜೌರಿ ಮಗ ಸೇರಿದಂತೆ ಕನಿಷ್ಟ ಇಬ್ಬರು ಹತರಾಗಿದ್ದಾರೆ ಎಂದು ಸಿರಿಯಾ ಹೇಳಿದೆ.

ಈ ಬೆಳವಣಿಗೆ ಇಸ್ರೇಲ್ ಮತ್ತು ಗಾಜಾ ಉಗ್ರರ ನಡುವೆ ಉದ್ವಿಗ್ನ ಪರಿಸ್ಥಿತಿ ಉಂಟುಮಾಡಿದೆ. ಗಾಜಾ ನಗರದ ಶಜೈಯಾದಲ್ಲಿರುವ ಮನೆಗಳ ಮೇಲೆ ರಾತ್ರೋ ರಾತ್ರಿ ನಡೆಸಿದ ಏರ್‌​ಸ್ಟ್ರೈಕ್​ನಲ್ಲಿ ಬಹ ಅಬು ಅಲ್-ಅಟಾ ಹತ್ಯೆಯಾಗಿದ್ದಾನೆ. ಆತನ ಪತ್ನಿ ಅಸ್ಮಾ ಅಬು ಅಲ್-ಅಟಾ ಮತ್ತು ಇಸ್ಲಾಮಿಕ್ ಜಿಹಾದ್​ನ ಸಶಸ್ತ್ರ ವಿಭಾಗದ ಇತರ ನಾಲ್ವರು ಉಗ್ರರೂ ಕೂಡಾ ಕೊಲ್ಲಲ್ಪಟ್ಟಿದ್ದಾರೆ. ಇನ್ನು ಇಸ್ರೇಲ್​ ದಾಳಿಯಿಂದಾಗಿ ಸುಮಾರು 45 ಜನ ಗಾಯಗೊಂಡಿದ್ದಾರೆ ಎಂದು ಪ್ಯಾಲೆಸ್ತೀನ್​ ಆರೋಗ್ಯ ಸಚಿವಾಲಯದ ಮೂಲಗಳು ತಿಳಿಸಿವೆ.

ಈ ಬಗ್ಗೆ ಸಮರ್ಥನೆ ನೀಡಿರುವ ಇಸ್ರೇಲ್​ ರಕ್ಷಣಾ ಪಡೆ(ಐಡಿಎಫ್​), ಇಸ್ರೇಲ್​ ನಾಗರಿಕರು ಹಾಗೂ ಸೈನಿಕರ ಮೇಲೆ ಅಬು ಅಲ್-ಅಟಾ ಉಗ್ರ ದಾಳಿ ನಡೆಸಲು ಯತ್ನಿಸುತ್ತಿದ್ದ ಎಂದು ಹೇಳಿದೆ.

ಇನ್ನೊಂದೆಡೆ ದಾಳಿಗೆ ಪ್ರತೀಕಾರ ತೀರಿಸಲು ಮುಂದಾಗಿರುವ ಪ್ಯಾಲೇಸ್ತೀನ್, ಇಸ್ರೇಲ್‌ ಮೇಲೆ ರಾಕೆಟ್ ದಾಳಿ ನಡೆಸಿದ್ದು ಹಲವರು ಗಾಯಗೊಂಡಿದ್ದು, ಸಾಕಷ್ಟು ಮನೆಗಳಿಗೆ ಹಾನಿಯಾಗಿದೆ. ಈ ಬಗ್ಗೆ ಇಸ್ರೇಲ್‌ ಫೋಟೋ ಸಮೇತ ಟ್ವೀಟ್‌ ಮಾಡಿ ಮಾಹಿತಿ ಒದಗಿಸಿದೆ.