ಕೋಟ್ಯಂತರ ರೂ. ನೀಡಿ ಬೆಳಗ್ಗೆ 'ಫೆರಾರಿ' ಕಾರು ಖರೀದಿಸಿದ.. ಸಂಜೆ ಭೀಕರ ಅಪಘಾತದಲ್ಲಿ ಪ್ರಾಣಬಿಟ್ಟ ಉದ್ಯಮಿ!

ಉದ್ಯಮಿಯೋರ್ವ ತನ್ನ ಪತ್ನಿ ಜೊತೆ ಫೆರಾರಿ ಕಾರಿನಲ್ಲಿ ಪ್ರಯಾಣ ಬೆಳೆಸುತ್ತಿದ್ದ ವೇಳೆ ನಿಯಂತ್ರಣ ಕಳೆದುಕೊಂಡು ಮರಕ್ಕೆ ಡಿಕ್ಕಿ ಹೊಡೆದಿರುವ ಪರಿಣಾಮ ಹೊತ್ತಿ ಉರಿದಿದೆ..

ಅಥೆನ್ಸ್​​( ಗ್ರೀಸ್​) :ಕೋಟ್ಯಂತರ ರೂಪಾಯಿ ನೀಡಿ ಬೆಳಗ್ಗೆಯಷ್ಟೇ ಉದ್ಯಮಿಯೋರ್ವ ಫೆರಾರಿ 488 ಕಾರು ಖರೀದಿ ಮಾಡಿದ್ದು, ಅದರಲ್ಲಿ ಪ್ರಯಾಣ ಬೆಳೆಸುತ್ತಿದ್ದ ವೇಳೆ ಭೀಕರ ಅಪಘಾತಕ್ಕೊಳಗಾಗಿ ಪ್ರಾಣ ಕಳೆದುಕೊಂಡಿದ್ದಾರೆ. ದುರ್ಘಟನೆ ವೇಳೆ ಕಾರು ಕೂಡ ಹೊತ್ತಿ ಉರಿದಿದೆ. ಗ್ರೀಸ್​​ನ ರಾಜಧಾನಿ ಅಥೆನ್ಸ್​​ನ ವೌಲಾದಲ್ಲಿ ಈ ಘಟನೆ ನಡೆದಿದೆ.

ಅಪಘಾತದ ಸ್ಥಳದಲ್ಲೇ ಹೊತ್ತಿ ಉರಿದ ಕಾರು

ಉದ್ಯಮಿ ಟ್ಜೋರ್ಟ್​ಜಿಸ್​ ಮೊನೊಯಿಯೊಸ್​​(45) ಅಪಘಾತದ ವೇಳೆ ಸಾವನ್ನಪ್ಪಿದ್ದಾರೆ. ರೆಸಾರ್ಟ್​ ದ್ವೀಪವಾದ ಮೈಕೋನೋಸ್​​ನಲ್ಲಿ ಬಟ್ಟೆ ಅಂಗಡಿ ಹೊಂದಿರುವ ಇವರು, ಇಂದು ಬೆಳಗ್ಗೆ 3 ಕೋಟಿ ರೂಪಯಿಗೂ ಅಧಿಕ ಮೌಲ್ಯದ ಸ್ಪೋರ್ಟ್ಸ್ ಕಾರು ಫೆರಾರಿ ಖರೀದಿ ಮಾಡಿದ್ದರು.

ಸಂಜೆ ವೇಳೆ ಹೆಂಡತಿ ಜೊತೆ ಅದರಲ್ಲಿ ಪ್ರಯಾಣ ಬೆಳೆಸಿದ್ದು, ಈ ವೇಳೆ ಕಾರು ನಿಯಂತ್ರಣ ಕಳೆದುಕೊಂಡು ರಸ್ತೆ ಪಕ್ಕದ ಮರಕ್ಕೆ ಗುದ್ದಿದೆ. ಪರಿಣಾಮ ಉದ್ಯಮಿ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಕಾರು ಕೂಡ ಬೆಂಕಿಗಾಹುತಿಯಾಗಿದೆ. ಕಾರಿನಲ್ಲಿದ್ದ ಉದ್ಯಮಿ ಪತ್ನಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

2003ರಲ್ಲಿ ಟ್ಜೋರ್ಟ್​ಜಿಸ್​ ಮೊನೊಯಿಯೊಸ್ ರಿಯಾಲಿಟಿ ಶೋ ದಿ ವಾಲ್​​ನ ಗ್ರೀಕ್​ ಆವೃತ್ತಿಯಲ್ಲಿ ಕಾಣಿಸಿಕೊಂಡಿದ್ದರು. ಘಟನೆಯಲ್ಲಿ ಗಾಯಗೊಂಡಿರುವ ಉದ್ಯಮಿ ಪತ್ನಿಯನ್ನ ಇದೀಗ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ.