ಬ್ರೆಜಿಲ್​ನಲ್ಲಿ ಕೊರೊನಾಗೆ ಒಂದೇ ದಿನ 2,216 ಮಂದಿ ಬಲಿ.. ಶೇ.80ರಷ್ಟು ಐಸಿಯು ಸೋಂಕಿತರಿಂದ ಭರ್ತಿ

ಕೋವಿಡ್​ ಮೃತರ ಸಂಖ್ಯೆಯಲ್ಲಿ ವಿಶ್ವದಲ್ಲೇ ಎರಡನೇ ಹಾಗೂ ಕೇಸ್​ಗಳ ಸಂಖ್ಯೆಯಲ್ಲಿ ಮೂರನೇ ಸ್ಥಾನದಲ್ಲಿರುವ ಬ್ರೆಜಿಲ್​ನಲ್ಲಿ ​ವೈರಸ್​ ಆರ್ಭಟಿಸುತ್ತಲೇ ಇದೆ.

ಬ್ರೆಸಿಲಿಯಾ:ಬ್ರೆಜಿಲ್​ನಲ್ಲಿ ಕೋವಿಡ್​ ಅಬ್ಬರ ಮುಂದುವರೆದಿದ್ದು, ಕಳೆದ 24 ಗಂಟೆಗಳಲ್ಲಿ 85,149 ಹೊಸ ಪ್ರಕರಣಗಳು ಹಾಗೂ 2,216 ಸಾವು ವರದಿಯಾಗಿದೆ ಎಂದು ಅಲ್ಲಿನ ಆರೋಗ್ಯ ಸಚಿವಾಲಯ ತಿಳಿಸಿದೆ. ಇದೀಗ ರಾಷ್ಟ್ರದ ಒಟ್ಟು ಸೋಂಕಿತರ ಸಂಖ್ಯೆ 1,72,96,118 ಹಾಗೂ ಸಾವಿನ ಸಂಖ್ಯೆ 4,84,235ಕ್ಕೆ ಏರಿಕೆಯಾಗಿದೆ.

ಬ್ರೆಜಿಲ್​ನ ಆಸ್ಪತ್ರೆಗಳ 80ರಷ್ಟು ತೀವ್ರ ನಿಗಾ ಘಟಕಗಳು (ಐಸಿಯು) ಕೊರೊನಾ ರೋಗಿಗಳಿಂದ ತುಂಬಿ ಹೋಗಿದೆ. ಅದರಲ್ಲಿಯೂ ಮ್ಯಾಟೊ ಗ್ರೊಸೊ- ಡೊ- ಸುಲ್ ಮತ್ತು ಪರಾನಾ ಸೇರಿದಂತೆ ಕೆಲವು ರಾಜ್ಯಗಳಲ್ಲಿ ಶೇ.95ರಷ್ಟು ಐಸಿಯು ಭರ್ತಿಯಾಗಿದ್ದು, ವೈದ್ಯಕೀಯ ವಲಯ ಸಂಕಷ್ಟದಲ್ಲಿ ಸಿಲುಕಿದೆ.

ಇದನ್ನೂ ಓದಿ:ದೇಶದಲ್ಲಿ ನಿನ್ನೆ ಪತ್ತೆಯಾಗಿದ್ದು 84 ಸಾವಿರ ಕೋವಿಡ್​ ಕೇಸ್​... ಆದ್ರೆ ಬಲಿಯಾದದ್ದು 4 ಸಾವಿರ ಜನ!

ದೇಶದ ಜನಸಂಖ್ಯೆಯ ಶೇ.11.11 ರಷ್ಟು ಅಂದರೆ, ಸುಮಾರು 23.5 ಮಿಲಿಯನ್ ಜನರು ಕೋವಿಡ್​ ಲಸಿಕೆಯ ಎರಡೂ ಡೋಸ್​ಗಳನ್ನು ಪಡೆದಿದ್ದು, ಜನಸಂಖ್ಯೆಯ ಶೇ.24.9 ರಷ್ಟು ಅಂದರೆ ಸುಮಾರು 52.7 ಮಿಲಿಯನ್ ಜನರಿಗೆ ಮೊದಲ ಡೋಸ್​ ನೀಡಲಾಗಿದೆ.

ಕೋವಿಡ್​ ಮೃತರ ಸಂಖ್ಯೆಯಲ್ಲಿ ಅಮೆರಿಕ ಬಳಿಕ ವಿಶ್ವದಲ್ಲೇ ಎರಡನೇ ಸ್ಥಾನದಲ್ಲಿ ಹಾಗೂ ಕೇಸ್​ಗಳ ಸಂಖ್ಯೆಯಲ್ಲಿ ಅಮೆರಿಕ, ಭಾರತದ ನಂತರ ಮೂರನೇ ಸ್ಥಾನದಲ್ಲಿ ಬ್ರೆಜಿಲ್​ ಇದೆ.