ಬ್ರೆಜಿಲ್​​ನ ಒಂದು ರಾಜ್ಯದಲ್ಲಿ 19 ಬಗೆಯ ಕೊರೊನಾ ರೂಪಾಂತರಗಳು ಪತ್ತೆ

ಬ್ರೆಜಿಲ್​​ನ ಒಟ್ಟು ಕೋವಿಡ್​ ಸಾವು-ನೋವಿನ ಪ್ರಮಾಣದಲ್ಲಿ ಸಿಂಹಪಾಲು ಹೊಂದಿರುವ ಸಾವೊ ಪಾಲೊ ರಾಜ್ಯದಲ್ಲಿ 19 ಬಗೆಯ ಕೋವಿಡ್​-19 ರೂಪಾಂತರಗಳು ಬೆಳಕಿಗೆ ಬಂದಿವೆ.

ರಿಯೋ ಡಿ ಜನೈರೊ: ಬ್ರೆಜಿಲ್​​ನ ಸಾವೊ ಪಾಲೊ ಎಂಬ ರಾಜ್ಯದಲ್ಲಿ ಒಂದಲ್ಲ, ಎರಡಲ್ಲ ಬರೋಬ್ಬರಿ 19 ಬಗೆಯ ಕೋವಿಡ್​-19 ರೂಪಾಂತರಗಳು ಪತ್ತೆಯಾಗಿವೆ ಎಂದು ಅಲ್ಲಿನ ಜೈವಿಕ ಸಂಶೋಧನಾ ಕೇಂದ್ರವಾದ ಇನ್ಸ್ಟಿಟ್ಯೂಟೊ ಬುಟಾಂಟನ್ ಮಾಹಿತಿ ನೀಡಿದೆ. ಈ ರಾಜ್ಯದ ಒಟ್ಟು ಕೊರೊನಾ ಪ್ರಕರಣಗಳ ಪೈಕಿ ಶೇ. 89.9 ರಷ್ಟು ಕೇಸ್​ಗಳು P.1 (ಅಮೇಜಾನಿಯನ್​) ತಳಿ​ ಆಗಿವೆ.

ಕೋವಿಡ್​ ಪ್ರಕರಣಗಳ ಪೈಕಿ ಪ್ರಪಂಚದಲ್ಲೇ ಮೂರನೇ ಸ್ಥಾನ ಹಾಗೂ ಮೃತರ ಸಂಖ್ಯೆಯಲ್ಲಿ ಎರಡನೇ ಸ್ಥಾನದಲ್ಲಿರುವ ಬ್ರೆಜಿಲ್​​ನಲ್ಲಿ ಈವರೆಗೆ 1.75 ಕೋಟಿ ಜನರಿಗೆ ವೈರಸ್​ ಅಂಟಿದ್ದರೆ, 4.91 ಲಕ್ಷ ಮಂದಿ ಅಸು ನೀಗಿದ್ದಾರೆ. ದಿನನಿತ್ಯ ಲಕ್ಷ ಸನಿಹ ಸೋಂಕಿತರು ಪತ್ತೆಯಾಗುತ್ತಿದ್ದಾರೆ. ಎರಡು ಸಾವಿರಕ್ಕೂ ಹೆಚ್ಚು ಜನರು ಸಾವನ್ನಪ್ಪುತ್ತಿದ್ದಾರೆ. ಇದರಲ್ಲಿ ಸಾವೊ ಪಾಲೊ ರಾಜ್ಯದ್ದು ಪ್ರಮುಖ ಪಾಲಿದೆ.

ಇದನ್ನೂ ಓದಿ: ಕೊರೊನಾ ಮಾರ್ಗಸೂಚಿ ಉಲ್ಲಂಘಿಸಿದ ಬ್ರೆಜಿಲ್ ಅಧ್ಯಕ್ಷರಿಗೂ ಬಿತ್ತು ದಂಡ

46 ಮಿಲಿಯನ್​ ಜನಸಂಖ್ಯೆ ಹೊಂದಿರುವ ಸಾವೊ ಪಾಲೊದಲ್ಲಿ 34.9 ಲಕ್ಷ ಸೋಂಕಿತರಿದ್ದಾರೆ. ಈಗಾಗಲೇ 1.19 ಲಕ್ಷ ಜನರು ವೈರಸ್​ಗೆ ಬಲಿಯಾಗಿದ್ದಾರೆ. ಒಟ್ಟು ಕೇಸ್​ಗಳ ಪೈಕಿ ಪೈಕಿ ಶೇ. 89.9 ರಷ್ಟು P.1 (ಅಮೇಜಾನಿಯನ್​) ರೂಪಾಂತರ ಹಾಗೂ ಶೇ.4.2 ರಷ್ಟು B.1.1.7 (ಯುಕೆ) ವೇರಿಯಂಟ್​ ಆಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಬ್ರೆಜಿಲ್​​ನಲ್ಲಿ 23 ಮಿಲಿಯನ್​​ಗೂ ಹೆಚ್ಚು ಜನರು ಕೋವಿಡ್​ ಲಸಿಕೆಯ ಎರಡೂ ಡೋಸ್​ಗಳನ್ನು ಪಡೆದಿದ್ದಾರೆ. 52 ಮಿಲಿಯನ್​​ಗೂ ಹೆಚ್ಚು ಮಂದಿ ಮೊದಲ ಡೋಸ್​ ಹಾಕಿಸಿಕೊಂಡಿದ್ದಾರೆ.