ಕೇಬಲ್​ ಕಾರ್​ ದುರಂತ: ಸುಂದರ ಲೋಕ ನೋಡುತ್ತಲೇ ಇಹಲೋಕ ತ್ಯಜಿಸಿದ 14 ಜನ!

ಕೇಬಲ್​ ಕಾರ್​ನಲ್ಲಿ ಪಯಣಿಸುತ್ತಾ ಸುಂದರ ಲೋಕವನ್ನು ಆನಂದಿಸುತ್ತಿದ್ದ 14 ಮಂದಿ ದುರ್ಘಟನೆಯಲ್ಲಿ ಇಹಲೋಕ ತ್ಯಜಿಸಿರುವ ಘಟನೆ ಇಟಲಿಯಲ್ಲಿ ನಡೆದಿದೆ.

ರೋಮ್: ಅತ್ಯಂತ ಸುಂದರವಾದ ಸರೋವರಗಳು, ಪರ್ವತಗಳ ನಾಡು ಇಟಲಿ. ಆಕರ್ಷಕ ಪ್ರವಾಸಿ ತಾಣಗಳನ್ನು ಹೊಂದಿರುವ ಉತ್ತರ ಇಟಲಿಗೆ ಲಕ್ಷಾಂತರ ಜನ ಪ್ರವಾಸಿಗರು ಭೇಟಿ ನೀಡಿ ಸಂಭ್ರಮಿಸುತ್ತಾರೆ. ಇಲ್ಲಿರುವ ಕೇಬಲ್​ ಕಾರುಗಳ ಮೂಲಕ ಸುಂದರ ತಾಣವನ್ನು ಸವಿಯುವುದು ಒಂದು ವಿಶೇಷ ಅನುಭವ. ಆದ್ರೆ ನಿನ್ನೆ ಇಲ್ಲಿನ ಪ್ರವಾಸಿ ತಾಣವೊಂದರಲ್ಲಿ ಕೇಬಲ್​ ಕಾರೊಂದು ಅಪಘಾತಕ್ಕೀಡಾಗಿ ಸುಮಾರು 14 ಜನ ದಾರುಣವಾಗಿ ಅಸುನೀಗಿದ್ದಾರೆ.

ಭಾನುವಾರದಂದು ಪ್ರವಾಸಿಗರನ್ನು ಕರೆದೊಯ್ಯುವಾಗ ಇಳಿಜಾರಿನಲ್ಲಿ ಕೇಬಲ್ ಕಾರು ಮೇಲಿಂದ ನೆಲಕ್ಕೆ ಅಪ್ಪಳಿಸಿದೆ. ಪರಿಣಾಮ, ಅಪಾರ ಪ್ರಮಾಣದ ಸಾವು-ನೋವು ಸಂಭವಿಸಿತು.

ಮೃತಪಟ್ಟವರಲ್ಲಿ ಆರು ಜನ ಇಸ್ರೇಲ್​ ಪ್ರಜೆಗಳು ಮತ್ತು ಇಟಲಿಯ ನಾಲ್ಕು ಕುಟುಂಬಗಳಿವೆ. ಕಾರು ಚಲಿಸುತ್ತಿದ್ದಾಗ ಕೇಬಲ್ ಕಟ್​ ಆಗಿ ಎರಡ್ಮೂರು ಬಾರಿ ಮರಕ್ಕೆ ಹೊಡೆದಿತ್ತು ಎಂದು ಅಲ್ಲಿನ ಅಧಿಕಾರಿಗಳು ಹೇಳುತ್ತಾರೆ.

ಇಟಲಿ ಸರ್ಕಾರವು ದುರಂತದ ತನಿಖೆಗಾಗಿ ವಿಶೇಷ ತನಿಖಾ ಆಯೋಗ ರಚಿಸಿದೆ.