ಜಪಾನ್​ನಲ್ಲಿ ಭಾರೀ ಹಿಮಪಾತ: 13 ಮಂದಿ ಸಾವು, 250 ಜನರಿಗೆ ಗಾಯ

ಜಪಾನ್​ನಲ್ಲಿ ದಾಖಲೆಯ ಹಿಮಪಾತವಾಗಿದ್ದು, 13 ಜನ ಮೃತಪಟ್ಟಿದ್ದಾರೆ. ಅಲ್ಲದೇ 250 ಮಂದಿ ಗಾಯಗೊಂಡಿದ್ದಾರೆ. ಫುಕುಯಿ ಪ್ರಾಂತ್ಯದಲ್ಲಿ 60ರಿಂದ 80 ವರ್ಷದ ಮೂವರು ಸಾವಿಗೀಡಾಗಿದ್ದು, ಹಿಮಪಾತಕ್ಕೆ ಸಂಬಂಧಿಸಿದ ಅಪಘಾತಗಳಲ್ಲಿ 47 ಜನರು ಗಾಯಗೊಂಡಿದ್ದಾರೆ ಎಂದು ಅಲ್ಲಿನ ಕ್ಸಿನ್ಹುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಟೋಕಿಯೊ:ಜಪಾನ್​ನ ಸಮುದ್ರ ತೀರದಲ್ಲಿ ದಾಖಲೆಯ ಹಿಮಪಾತವಾಗಿದ್ದು, ಕನಿಷ್ಠ 13 ಜನರು ಮೃತಪಟ್ಟಿದ್ದಾರೆ. ಅಲ್ಲದೇ ಸುಮಾರು 250 ಜನರು ಗಾಯಗೊಂಡಿದ್ದಾರೆ ಎಂದು ಅಗ್ನಿಶಾಮಕ ಮತ್ತು ವಿಪತ್ತು ನಿರ್ವಹಣಾ ಏಜೆನ್ಸಿಯ ಇತ್ತೀಚಿನ ವರದಿಯಲ್ಲಿ ತಿಳಿಸಲಾಗಿದೆ.

ಫುಕುಯಿ ಪ್ರಾಂತ್ಯದಲ್ಲಿ 60ರಿಂದ 80 ವರ್ಷದ ಮೂವರು ಸಾವಿಗೀಡಾಗಿದ್ದು, ಹಿಮಪಾತಕ್ಕೆ ಸಂಬಂಧಿಸಿದ ಅಪಘಾತಗಳಲ್ಲಿ 47 ಜನರು ಗಾಯಗೊಂಡಿದ್ದಾರೆ ಎಂದು ಅಲ್ಲಿನ ಕ್ಸಿನ್ಹುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಹಿಮವನ್ನು ತೆಗೆದುಹಾಕಲು ಪ್ರಯತ್ನಿಸಿದ ಪರಿಣಾಮ ನಿಗಾಟಾ ಪ್ರಾಂತ್ಯದಲ್ಲಿ ನಾಲ್ಕು ಸಾವುಗಳು ಸಂಭವಿಸಿವೆ ಎಂದು ಸಂಸ್ಥೆ ತಿಳಿಸಿದೆ.

ಜಪಾನ್‌ನಲ್ಲಿ ಉಂಟಾದ ಹಿಮಪಾತಕ್ಕೆ ಫುಕುಯಿಯ ಹೊಕುರಿಕು ಎಕ್ಸ್‌ಪ್ರೆಸ್ ‌ವೇಯಲ್ಲಿ ಸುಮಾರು 1,200ಕ್ಕೂ ಹೆಚ್ಚು ವಾಹನಗಳು ಸಿಕ್ಕಿಕೊಂಡಿದ್ದವು.

ಈ ನಡುವೆ ಟೊಯಾಮಾ ಪ್ರಾಂತ್ಯದ ಟೋಕೈ-ಹೊಕುರಿಕು ಎಕ್ಸ್‌ಪ್ರೆಸ್ ಹೆದ್ದಾರಿಯಲ್ಲಿ ಉಂಟಾದ ಭಾರಿ ಹಿಮಪಾತದಿಂದ 200ಕ್ಕೂ ಹೆಚ್ಚು ವಾಹನಗಳು ಸಿಕ್ಕಿಕೊಂಡಿದ್ದವು. ಅಲ್ಲದೇ 250ಕ್ಕೂ ಹೆಚ್ಚು ಜನರು ನಿಗಾಟಾ ಪ್ರಾಂತ್ಯದ ರಾಷ್ಟ್ರೀಯ ಮಾರ್ಗ 8ರಲ್ಲಿ ಸಿಲುಕಿಕೊಂಡಿದ್ದರು.

ಮುಂದಿನ ದಿನಗಳಲ್ಲಿ ದೇಶದ ಪೆಸಿಫಿಕ್ ಭಾಗದಲ್ಲಿ ಭಾರೀ ಹಿಮಪಾತ ಆಗಲಿದೆ ಎಂದು ಇಲ್ಲಿನ ಹವಾಮಾನ ಸಂಸ್ಥೆ ಮುನ್ಸೂಚನೆ ನೀಡಿದೆ.

ಕರಾವಳಿಯಲ್ಲಿ ಕಡಿಮೆ ಒತ್ತಡ ಇರುವ ಕಾರಣ ಪೆಸಿಫಿಕ್ ಭಾಗದಲ್ಲಿ ಹಿಮಪಾತವು ಮಂಗಳವಾರದವರೆಗೆ ಹಿಮಪಾತ ಮುಂದುವರಿಯಲಿದೆ ಎಂದು ಜಪಾನ್‌ನ ಹವಾಮಾನ ಸಂಸ್ಥೆ (ಜೆಎಂಎ) ಹೇಳಿದೆ ಎಂದು ಜಪಾನ್‌ನ ಸಾರ್ವಜನಿಕ ಪ್ರಸಾರ ಎನ್‌ಎಚ್‌ಕೆ ವರದಿ ಮಾಡಿದೆ.