ಪಾಕ್ ಕಿರಿಕ್: ಸಾರ್ಕ್​ ಸದಸ್ಯ ರಾಷ್ಟ್ರಗಳ ವಿದೇಶಾಂಗ ಸಚಿವರ ಸಭೆ ರದ್ದು!

ನೇಪಾಳದಲ್ಲಿ ನಡೆಯುತ್ತದೆ ಎನ್ನಲಾಗಿದ್ದ, ಸಾರ್ಕ್​ನ ವಿದೇಶಾಂಗ ಮಂತ್ರಿಗಳ ಸಭೆ ರದ್ದಾಗಿದೆ. ಪಾಕಿಸ್ತಾನದ ಕಿರಿಕ್ ಸಾರ್ಕ್​ನ ಸಭೆ ರದ್ದಾಗಲು ಕಾರಣ ಎಂದು ಮೇಲ್ನೋಟಕ್ಕೆ ಗೊತ್ತಾಗುವಂತಿದೆ.

ನವದೆಹಲಿ:ಸದಸ್ಯ ರಾಷ್ಟ್ರಗಳ ಸಹಮತದ ಕೊರತೆಯಿಂದಾಗಿ ಸಾರ್ಕ್ (​SAARC-South Asian Association for Regional Cooperation) ರಾಷ್ಟ್ರಗಳ ವಿದೇಶಾಂಗ ಸಚಿವರ ಸಭೆಯನ್ನು ರದ್ದು ಮಾಡಲಾಗಿದೆ.

ಅಫ್ಘಾನಿಸ್ತಾನ, ಬಾಂಗ್ಲಾದೇಶ, ಭೂತಾನ್, ಭಾರತ, ಮಾಲ್ಡೀವ್ಸ್, ನೇಪಾಳ, ಪಾಕಿಸ್ತಾನ ಮತ್ತು ಶ್ರೀಲಂಕಾ ಈ ಸಾರ್ಕ್​ನ ಸಂಘಟನೆಯ ಸದಸ್ಯ ರಾಷ್ಟ್ರಗಳಾಗಿದ್ದು, ಎಲ್ಲ ರಾಷ್ಟ್ರಗಳ ಒಪ್ಪಿಗೆಯ ಕೊರತೆಯಿಂದಾಗಿ ಸಭೆಯನ್ನು ರದ್ದು ಮಾಡಲಾಗಿದೆ ಎಂದು ಸಾರ್ಕ್​ನ ಅಧಿಕಾರಿಯೊಬ್ಬರು ಎಎನ್​ಐಗೆ ಮಾಹಿತಿ ನೀಡಿದ್ದಾರೆ.

ಇದಕ್ಕೂ ಮೊದಲು ನೇಪಾಳದಲ್ಲಿ ಸಾರ್ಕ್ ರಾಷ್ಟ್ರಗಳ ವಿದೇಶಾಂಗ ಸಚಿವರ ಸಭೆ ನಡೆಸಲಾಗುತ್ತದೆ ಎಂದು ಹೇಳಲಾಗುತ್ತಿತ್ತು. ಆದರೆ, ಈ ಬಗ್ಗೆ ನಿಖರವಾದ ಮಾಹಿತಿ ಇರಲಿಲ್ಲ. ಈಗ ಬೇರೆಯದೇ ಬೆಳವಣಿಗೆಯಲ್ಲಿ ಸಾರ್ಕ್​​ನ ಈ ಸಭೆ ರದ್ದಾಗಿದೆ.

ಸಮಸ್ಯೆ ಏನು?

ಈ ಬಾರಿಯ ಅಫ್ಘಾನಿಸ್ತಾನ ಸಾರ್ಕ್​ನ ಸಮಸ್ಯೆ ಎಂದು ಹೇಳಲಾಗುತ್ತಿದೆ. ಈಗ ಅಲ್ಲಿ ಅಸ್ಥಿತ್ವಕ್ಕೆ ಬಂದಿರುವ ತಾಲಿಬಾನ್​ ಸರ್ಕಾರವನ್ನು ಒಂದು ರಾಷ್ಟ್ರವನ್ನಾಗಿ ಪರಿಗಣಿಸಬೇಕೆ? ಅಥವಾ ಬೇಡವೇ? ಎಂಬ ಬಗ್ಗೆ ಇನ್ನೂ ನಿರ್ಧಾರವಾಗಿಲ್ಲ. ಚೀನಾ, ಪಾಕ್ ಬಿಟ್ಟರೆ ಇನ್ಯಾವುದೇ ರಾಷ್ಟ್ರ ತಾಲಿಬಾನ್ ಸರ್ಕಾರವನ್ನು ಅಫ್ಘಾನಿಸ್ತಾನ ಸರ್ಕಾರ ಎಂದು ಒಪ್ಪಿಕೊಳ್ಳುತ್ತಿಲ್ಲ.

ಅಫ್ಘಾನಿಸ್ತಾನವನ್ನು ಈಗ ಸಾರ್ಕ್​ನಲ್ಲಿ ಪ್ರತಿನಿಧಿಸಲು ಅವಕಾಶ ನೀಡಬೇಕೆಂದು ಪಾಕಿಸ್ತಾನ ಒತ್ತಾಯಿಸುತ್ತಿದೆ. ಆದರೆ, ಉಳಿದ ರಾಷ್ಟ್ರಗಳು ಪಾಕ್​ ನಿಲುವನ್ನು ಖಂಡಿಸಿವೆ. ಇದೇ ಕಾರಣದಿಂದಾಗಿ ಈಗ ನಡೆಯಬೇಕಿದ್ದ ಸಾರ್ಕ್​ನ ವಿದೇಶಾಂಗ ಇಲಾಖೆಗಳ ಮುಖ್ಯಸ್ಥರ ಸಭೆ ರದ್ದಾಗಿದೆ ಎನ್ನಲಾಗಿದೆ.

ಇದನ್ನೂ ಓದಿ:ತಾಲಿಬಾನ್​​ನಿಂದ ವಿಶ್ವಸಂಸ್ಥೆಗೆ ರಾಯಭಾರಿ ನೇಮಕ