ಭಾರತದ ರಫೇಲ್ ಎದುರಿಸಲು 'ಮೇಡ್ ಇನ್ ಚೀನಾ' ಫೈಟರ್​ ಜೆಟ್ ಖರೀದಿಸಿದ ಪಾಕ್​​

ಭಾರತದ ರಫೇಲ್​ ಯುದ್ಧ ವಿಮಾನ ಎದುರಿಸುವ ಉದ್ದೇಶದಿಂದಲೇ ಪಾಕಿಸ್ತಾನ ಇದೀಗ ಚೀನಾದಲ್ಲಿ ಅಭಿವೃದ್ಧಿಗೊಂಡಿರುವ J-10C ಫೈಟರ್​ ಜೆಟ್ ಖರೀದಿ ಮಾಡಿದೆ.

ಇಸ್ಲಾಮಾಬಾದ್​(ಪಾಕಿಸ್ತಾನ): ಭಾರತದ ಬಲಿಷ್ಠ ರಫೇಲ್ ಯುದ್ಧ ವಿಮಾನ ಎದುರಿಸಲು ಪಾಕ್​ ಇದೀಗ ಚೀನಾ ತಯಾರಿಸಿರುವ J-10C ಫೈಟರ್​ ಜೆಟ್ ಖರೀದಿ ಮಾಡಿದ್ದು, ಇಂದು ಅಧಿಕೃತವಾಗಿ ತನ್ನ ವಾಯುಪಡೆಗೆ ಸೇರ್ಪಡೆ ಮಾಡಿಕೊಂಡಿದೆ.

ಕಳೆದ ಡಿಸೆಂಬರ್ ತಿಂಗಳಲ್ಲಿ ಪಾಕಿಸ್ತಾನದ ಆಂತರಿಕ ಸಚಿವ ಶೇಖ್ ರಶೀದ್​ ಅಹ್ಮದ್​ ಅವರು ಚೀನಾದ 25 J-10C ಫೈಟರ್ ಜೆಟ್ ಖರೀದಿಗೆ ಸಹಿ ಹಾಕಿದ್ದರು. ಇದೀಗ ಎಲ್ಲ ಪೈಟರ್​ ಜೆಟ್​​ಗಳು ಪಾಕಿಸ್ತಾನದ ವಾಯುಪಡೆ ಸೇರಿಕೊಂಡಿದ್ದು, ಪಾಕ್​ ಪ್ರಧಾನಿ ಇಮ್ರಾನ್ ಖಾನ್ ಖುದ್ದಾಗಿ ಈ ಸಮಾರಂಭದಲ್ಲಿ ಭಾಗಿಯಾಗಿದ್ದರು. ಫೈಟರ್ ಜೆಟ್​​ಗಳನ್ನ ವಾಯುಸೇನೆಗೆ ವಿಲೀನಗೊಳಿಸಿದ ನಂತರ ಮಾತನಾಡಿದ ಇಮ್ರಾನ್ ಖಾನ್​, ಈ ಪ್ರದೇಶದಲ್ಲಿ ಭೀತಿ ಹುಟ್ಟಿಸುವ ಕೆಲಸ ಮಾಡಲಾಗ್ತಿದ್ದು, ಅದಕ್ಕೆ ತಕ್ಕ ಉತ್ತರ ನೀಡಲು ಇದೀಗ ಈ ಫೈಟರ್ ಜೆಟ್​ ಖರೀದಿ ಮಾಡಲಾಗಿದೆ. ಇದು ನಮ್ಮ ರಕ್ಷಣಾ ವ್ಯವಸ್ಥೆಗೆ ದೊಡ್ಡ ಬಲ ಎಂದಿದ್ದಾರೆ.

ಆಧುನಿಕ ಜೆಟ್​ ತಯಾರು ಮಾಡಲು ಹಲವು ವರ್ಷಗಳ ಕಾಲ ತೆಗೆದುಕೊಳ್ಳುವ ಈ ಸಮಯದಲ್ಲಿ ಚೀನಾ ಕೇವಲ 8 ತಿಂಗಳಲ್ಲಿ ನಮಗೆ ಈ ಫೈಟರ್ ಜೆಟ್​​ ಒದಗಿಸಿದ್ದು, ಅದಕ್ಕೆ ಧನ್ಯವಾದಗಳು ತಿಳಿಸಿದ್ದಾರೆ.ಇದೇ ವೇಳೆ ಭಾರತದ ಹೆಸರು ಉಲ್ಲೇಖ ಮಾಡದೇ ವಾಗ್ದಾಳಿ ನಡೆಸಿದ ಇಮ್ರಾನ್ ಖಾನ್​, ಯಾವುದೇ ದೇಶ ಪಾಕಿಸ್ತಾನದ ಮೇಲೆ ಆಕ್ರಮಣ ಮಾಡುವ ಮೊದಲು ಎರಡು ಸಲ ಯೋಚನೆ ಮಾಡಬೇಕು. ನಮ್ಮ ಸಶಸ್ತ್ರ ಪಡೆಗಳು ಯಾವುದೇ ರೀತಿಯ ಬೆದರಿಕೆ ಎದುರಿಸಲು ಸುಸಜ್ಜಿತವಾಗಿದ್ದು, ಅದಕ್ಕಾಗಿ ತರಬೇತಿ ಪಡೆದುಕೊಂಡಿವೆ ಎಂದರು.