ಅಮೆರಿಕಕ್ಕೆ ಸೆಡ್ಡು ಹೊಡೆದ ಕಿಮ್​.. ರೈಲಿನಿಂದ ಬ್ಯಾಲಿಸ್ಟಿಕ್ ಕ್ಷಿಪಣಿ ಉಡಾಯಿಸಿದ ಉತ್ತರ ಕೊರಿಯಾ!

ಉತ್ತರ ಕೊರಿಯಾ ರೈಲು ಮೇಲಿಂದಲೇ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಯಶಸ್ವಿಯಾಗಿ ಉಡಾಯಿಸಿದೆ. ಈ ಮೂಲಕ ಅಮೆರಿಕಕ್ಕೆ ಉತ್ತರಕೊರಿಯಾ ಸೆಡ್ಡು ಹೊಡೆದಿದೆ.

ಸಿಯೋಲ್​​: ಉತ್ತರ ಕೊರಿಯಾ ರೈಲಿನ ಮೇಲಿಂದ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಯಶಸ್ವಿಯಾಗಿ ಉಡಾಯಿಸಿದೆ. ಬೈಡನ್ ಆಡಳಿತ (ಅಮೆರಿಕ​) ವಿಧಿಸಿದ ಹೊಸ ನಿರ್ಬಂಧಗಳ ವಿರುದ್ಧ ಸೆಟೆದು ನಿಂತಿರುವ ಕಿಮ್​​​​​​​​​​​​​ ಸತತವಾಗಿ ಬಾಲಿಸ್ಟಿಕ್​ ಕ್ಷಿಪಣಿಗಳ ಪರೀಕ್ಷಾರ್ಥ ಪ್ರಯೋಗಗಳನ್ನು ಮುಂದುವರೆಸಿದ್ದಾರೆ.

ಉತ್ತರ ಕೊರಿಯಾದ ಹಿಂದಿನ ಪರೀಕ್ಷೆಗಳ ಮೇಲೆ ಹೊಸ ನಿರ್ಬಂಧಗಳನ್ನು ಹೇರಿದ್ದಕ್ಕಾಗಿ ಪಯೋಂಗ್ಯಾಂಗ್‌ನ ವಿದೇಶಾಂಗ ಸಚಿವಾಲಯ ಅಮೆರಿಕದ ವಿರುದ್ಧ ಹರಿಹಾಯ್ದಿತ್ತು. ಅಮೆರಿಕದ ಕ್ರಮ ಖಂಡಿಸುವ ಹೇಳಿಕೆ ನೀಡಿದ ಮರು ದಿನವೇ ಕೊರಿಯಾ ರೈಲಿನಿಂದಲೇ ಬಾಲಿಸ್ಟಿಕ್​​ ಕ್ಷಿಪಣಿ ಉಡ್ಡಯನ ಮಾಡಿ ಪರೀಕ್ಷೆ ನಡೆಸಿದೆ.

ಇತ್ತೀಚಿನ ತಿಂಗಳುಗಳಲ್ಲಿ ಉತ್ತರ ಕೊರಿಯಾವು ಸಾಂಕ್ರಾಮಿಕ - ಸಂಬಂಧಿತ ಗಡಿ ಮುಚ್ಚುವಿಕೆ ಮತ್ತು ಅಮೆರಿಕದೊಂದಿಗಿನ ಪರಮಾಣು ರಾಜತಾಂತ್ರಿಕತೆಯ ಸ್ಥಗಿತದ ಮಧ್ಯೆ ಈ ಪ್ರದೇಶದಲ್ಲಿ ವಿರೋಧಿಗಳ ಕ್ಷಿಪಣಿ ದಾಳಿಯನ್ನು ಹತ್ತಿಕ್ಕಲು ಕ್ಷಿಪಣಿ ಪ್ರತಿ ರಕ್ಷಣಾ ವ್ಯವಸ್ಥೆಯನ್ನು ವಿನ್ಯಾಸಗೊಳಿಸಲು ಕೊರಿಯಾ ಮುಂದಾಗಿದ್ದು, ಬಾಲಿಸ್ಟಿಕ್​​ ಕ್ಷಿಪಣಿ ಪರೀಕ್ಷೆಗಳನ್ನು ಹೆಚ್ಚಿಸುತ್ತಿದೆ.

ಉತ್ತರ ಕೊರಿಯಾ ನೆರೆಹೊರೆಯವರಿಗೆ ಬೆದರಿಕೆ ಹಾಕುವ ಹಾಗೂ ಒತ್ತಡ ತಂತ್ರ ಅನುಸರಿಸುವ ಕ್ರಮವಾಗಿ ಇಂತಹ ಪರೀಕ್ಷೆಗೆ ಮುಂದಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ:ಬ್ಯಾಲಿಸ್ಟಿಕ್ ಕ್ಷಿಪಣಿ ಉಡಾಯಿಸಿದ ಉತ್ತರ ಕೊರಿಯಾ?