ಸದನದಲ್ಲೇ ಎಂಪಿ ಮಗುವಿಗೆ ಹಾಲು ಕುಡಿಸಿದ ಸ್ಪೀಕರ್... ಫಿದಾ ಆದ ನೆಟ್ಟಿಗರು!

ಆ ಸದನದಲ್ಲಿ ಚರ್ಚೆ ಮಾತ್ರವಲ್ಲ ಮಗುವಿನ ತುಂಟಾಟವೂ ನಡೀತು. ಅಳುತ್ತಿರುವ ಮಗುವಿಗೆ ಸ್ಪೀಕರ್​ ಹಾಲು ಕುಡಿಸಿ ಸಮಾಧಾನವೂ ಪಡಿಸಿದರು. ಸ್ಪೀಕರ್​ ಕಾರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ ನೆಟ್ಟಿಗರು ಫಿದಾ ಸಹಾ ಆಗಿದ್ದಾರೆ.

ನ್ಯೂಜಿಲೆಂಡ್​: ಸಾಧಾರಣವಾಗಿ ಅಧಿವೇಶನದ ವೇಳೆ ಸದ್ಯಸರ ವಾಗ್ವಾದ, ಪ್ರತಿಪಕ್ಷಗಳ ಆರೋಪಗಳು, ಅಧಿಕಾರ ಪಕ್ಷದ ವಿವರಣೆಗಳು ಕೇಳಿ ಬರುತ್ತವೆ. ಆದ್ರೆ ನ್ಯೂಜಿಲೆಂಡ್​ ಸಂಸತ್​ ಭವನದಲ್ಲಿ ಆಸಕ್ತಿಕರ ಘಟನೆಯೊಂದು ನಡೆದಿದೆ.

ಹೌದು, ನ್ಯೂಜಿಲೆಂಡ್​ ಸಂಸತ್​ ಭವನದಲ್ಲಿ ನಡೆಯುತ್ತಿದ್ದ ಅಧಿವೇಶನದಲ್ಲಿ ವಾದ-ವಿವಾದಗಳ ನಡುವೆ ಮಗುವಿನ ಅಳುತ್ತಿರುವ ಶಬ್ದವೂ ಕೇಳಿ ಬಂತು. ಸಂಸದ ತಮಟಿ ಕಾಫಿ ಅಧಿವೇಶನಕ್ಕೆ ತನ್ನ ಒಂದು ತಿಂಗಳ ಮಗುವಿನೊಂದಿಗೆ ಆಗಮಿಸಿದ್ದರು. ಚರ್ಚೆ ನಡೆಯುತ್ತಿದ್ದ ವೇಳೆ ಮಗು ಅಳುತ್ತಿದೆ. ಇದನ್ನು ಗಮನಿಸಿದ ಸ್ಪೀಕರ್​ ಮಗುವನ್ನು ತನ್ನ ಬಳಿ ಎತ್ತಿಕೊಂಡು ಬಾಟಲಿ ಮೂಲಕ ಹಾಲು ಕುಡಿಸಿದರು. ಬಳಿಕ ಮಗುವಿನ ಜೊತೆ ಐದು ನಿಮಿಷಗಳ ಕಾಲ ಕಳೆದರು. ಮಗುವಿನ ತುಂಟ ನಗುವಿಗೆ ಸ್ಪೀಕರ್​ ಟ್ರೆವರ್ ಮಲ್ಲಾರ್ಡ್ ಮನಸೋತರು.

ಇನ್ನು ಸ್ಪೀಕರ್​ ಟ್ರೆವರ್ ಮಲ್ಲಾರ್ಡ್ ಬಾಟಲಿ ಮೂಲಕ ಮಗುವಿಗೆ ಹಾಲು ಕುಡಿಸುತ್ತಿರುವ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ಸಖತ್​ ವೈರಲ್​ ಆಗುತ್ತಿವೆ. ಸ್ಪೀಕರ್​ ಕಾರ್ಯಕ್ಕೆ ನೆಟ್ಟಿಗರು ಫಿದಾ ಆಗಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

2017ರಲ್ಲಿ ಆಸ್ಟ್ರೇಲಿಯಾ ಸಂಸತ್​ನಲ್ಲೂ ಇದೇ ರೀತಿಯ ಘಟನೆ ನಡೆದಿತ್ತು. ಆಸ್ಟ್ರೇಲಿಯಾ ಸಂಸತ್​ ಸದಸ್ಯೆ ಲರಿಸ್ಸಾ ವಾಟರ್ಸ್​ ತನ್ನ ಹಸುಗೂಸನ್ನು ಎತ್ತಿಕೊಂಡು ಅಧಿವೇಶನಕ್ಕೆ ಆಗಮಿಸಿ, ಸದನದಲ್ಲೇ ಮಗುವಿಗೆ ಹಾಲುಣಿಸಿ ಸುದ್ದಿ ಆಗಿದ್ದರು.