ಭಾರತದ ಮುಂದೆ ಮಂಡಿಯೂರಿತಾ ಚೀನಾ: ಸಂಜೆಯೊಳಗೆ ಮಸೂದ್​ ಅಜರ್​ ಜಾಗತಿಕ ಉಗ್ರನೆಂದು ಘೋಷಣೆ ಸಾಧ್ಯತೆ..?!!

ಭಾರತಕ್ಕೆ ಬೆಂಬಲವಾಗಿ ಅಮೆರಿಕ, ಬ್ರಿಟನ್ ಹಾಗೂ ಫ್ರಾನ್ಸ್​ ಚೀನಾದ ಮೇಲೆ ರಾಜತಾಂತ್ರಿಕ ಒತ್ತಡ ಹೇರುತ್ತಿದ್ದಾರೆ. ಒಂದು ವೇಳೆ ಚೀನಾ ತನ್ನ ನಿಲುವು ಹಿಂಪಡೆಯದೆ ಇದ್ದಲ್ಲಿ ವಿಶ್ವ ಸಂಸ್ಥೆಯ ಮುಂದೆ ಪ್ರಸ್ತಾಪಿಸುವ ಬೆದರಿಕೆ ಹಾಕಿವೆ. ಸದ್ಯದ ಎಲ್ಲ ಬೆಳವಣಿಗೆಗಳು ಚೀನಾದ ವಿರುದ್ಧವಾಗಿದ್ದು, ಅಜರ್ ವಿರುದ್ಧ ಕ್ರಮತೆಗದುಕೊಳ್ಳಬೇಕಾದ ಇಕ್ಕಟ್ಟಿನಲ್ಲಿದೆ.

ನ್ಯೂಯಾರ್ಕ್​/ಬೀಜಿಂಗ್​​:ಪುಲ್ವಾಮಾ ದಾಳಿಯ ಹಿಂದಿನ ಮಾಸ್ಟರ್ ಮೈಂಡ್ ಜೆಇಎಂ ಮುಖ್ಯಸ್ಥ ಮಸೂದ್ ಅಜರ್​ನನ್ನು ಜಾಗತಿಕ ಉಗ್ರನೆಂದು ಘೋಷಿಸಲು ವಿಶ್ವ ಸಂಸ್ಥೆಯಲ್ಲಿ ಇದುವರೆಗೂ ಅಡ್ಡಗಾಲು ಹಾಕುತ್ತಿದ್ದ ಚೀನಾ ಕೊನೆಗೂ ಭಾರತದ ಎದುರು ಮಂಡಿಯೂರುವ ಸ್ಥಿತಿಗೆ ಬಂದಿದೆ.

ಮಸೂದ್ ಅಜರ್​ನನ್ನು ನಿಷೇಧ ಹೇರುವ ಕುರಿತು ತನ್ನ ಸ್ಪಷ್ಟ ನಿಲುವು ತಿಳಿಸಲು ವಿಶ್ವ ಸಂಸ್ಥೆ ಚೀನಾಗೆ ಮೇ 1ರ ಬೆಳಗ್ಗೆ 9 ಗಂಟೆಯವರೆಗೂ ಅಂತಿಮ ಗಡುವು ನೀಡಿದೆ. ಜೊತೆಗೆ ಸೂಕ್ತ ಎಚ್ಚರಿಕೆ ಸಹ ರವಾನಿಸಿದೆ ಎಂದು ಅಮೆರಿಕದ ಸ್ಥಳೀಯ ಮಾಧ್ಯಮವೊಂದು ವರದಿ ಮಾಡಿದೆ.

ಇಂದು ವಿಶ್ವ ಸಂಸ್ಥೆಯ ಸಭೆ ನಡೆಯುತ್ತಿದ್ದು, ಸಂಜೆಯ ವೇಳೆಗೆ ಜೈಷ್ ಎ ಮೊಹಮ್ಮದ್ (ಜೆಇಎಂ) ಉಗ್ರ ಸಂಘಟನೆಯ ಮುಖ್ಯಸ್ಥ ಮಸೂದ್ ಅಜರ್ ನಿಷೇಧಿಸುವ ಚೀನಾದ ಅಂತಿಮ ತೀರ್ಮಾನ ಹೊರ ಬೀಳುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ.

ವಿಶ್ವ ಸಂಸ್ಥೆಯ 1,267 ಭದ್ರತಾ ಸಮಿತಿಯ ಸಭೆ ಏಪ್ರಿಲ್​ 23ರಂದು ನಡೆಸಿದ್ದು, ಮಸೂದ್​ ಅಜರ್​ನನ್ನು ಜಾಗತಿಕ ಭಯೋತ್ಪಾದಕ ಎಂದು ಘೋಷಣೆ ಮಾಡುವ ಬಗ್ಗೆ ಚರ್ಚಿಸಿತ್ತು. ಈ ವೇಳೆ ಚೀನಾ ಹಾಗೂ ಅಮೆರಿಕ ವಿಶ್ವ ಸಂಸ್ಥೆಯ ನಿಲುವಿಗೆ ಪರಸ್ಪರ ವಿರೋಧ ತಳೆದಿದ್ದವು ಎಂದು ರಾಯಭಾರಿಯೊಬ್ಬರು ಹೇಳಿದ್ದಾರೆ.

ಅಂತಿಮ ತೀರ್ಮಾನ ತೆಗೆದುಕೊಳ್ಳುವ ಮೇ ತಿಂಗಳ ಮಧ್ಯದವರೆಗೂ ಕಾಲಾವಕಾಶ ನೀಡುವಂತೆ ಚೀನಾ ಕೋರಿತ್ತು. ಅಜರ್​ನನ್ನು ಕಪ್ಪು ಪಟ್ಟಿಗೆ ಸೇರಿಸಲು ಏಪ್ರಿಲ್ 23ಕ್ಕಿಂತ ಹೆಚ್ಚಿನ ದಿನ ತೆಗೆದುಕೊಳ್ಳುವ ಚೀನಾ ನಿರ್ಧಾರಕ್ಕೆ ಅಮೆರಿಕ ಆಕ್ಷೇಪ ವ್ಯಕ್ತಪಡಿಸಿತು.

ಚೀನಾದಲ್ಲಿ ರಾಜತಾಂತ್ರಿಕ ನಡೆ

ಕಳೆದ ವಾರ ಬೀಜಿಂಗ್​ನಲ್ಲಿ ಭಾರತದ ವಿದೇಶಾಂಗ ಕಾರ್ಯದರ್ಶಿ ವಿಜಯ್ ಗೋಖಲೆ ಅವರು, ಚೀನಾ ಸರ್ಕಾರದ ಅಧಿಕಾರಿಗಳನ್ನು ಭೇಟಿ ಮಾಡಿ ಫೆಬ್ರವರಿ 14ರ ಪುಲ್ವಾಮ ದಾಳಿಯಲ್ಲಿ ಅಜರ್ ಕೈವಾಡ ಇರುವ ಸಾಕ್ಷ್ಯಾದಾರ ದಾಖಲೆಗಳನ್ನು ನೀಡಿದರು. 'ಇದಕ್ಕೆಲ್ಲ ಜೈಷ್ ಎ ಮೊಹಮ್ಮದ್ (ಜೆಇಎಂ) ಉಗ್ರ ಸಂಘಟನೆಯ ಮುಖ್ಯಸ್ಥನೇ ಜವಾಬ್ದಾರ' ಎಂದು ಹೇಳಿದ್ದರು.

ಭಾರತಕ್ಕೆ 4 ವಿಟೋ ರಾಷ್ಟ್ರಗಳ ಬಲ

ಭಾರತಕ್ಕೆ ಬಂಬಲವಾಗಿ ಅಮೆರಿಕ, ಬ್ರಿಟನ್ ಹಾಗೂ ಫ್ರಾನ್ಸ್​ ಚೀನಾದ ಮೇಲೆ ರಾಜತಾಂತ್ರಿಕ ಒತ್ತಡ ಹೇರುತ್ತಿದ್ದಾರೆ. ಒಂದು ವೇಳೆ ಚೀನಾ ತನ್ನ ನಿಲುವು ಹಿಂಪಡೆಯದೇ ಇದ್ದಲ್ಲಿ ವಿಶ್ವ ಸಂಸ್ಥೆಯ ಮುಂದೆ ಪ್ರಸ್ತಾಪಿಸುವ ಬೆದರಿಕೆ ಹಾಕಿವೆ. ಸದ್ಯದ ಎಲ್ಲ ಬೆಳವಣಿಗೆಗಳು ಚೀನಾದ ವಿರುದ್ಧವಾಗಿದ್ದು, ಅಜರ್ ವಿರುದ್ಧ ಕ್ರಮ ತೆಗದುಕೊಳ್ಳಬೇಕಾದ ಇಕ್ಕಟ್ಟಿನಲ್ಲಿದೆ.

ಪೀಸ್​ ಟಿವಿ ಮೇಲೆ ನಿಷೇಧ

ಇದರ ಬೆನ್ನಲ್ಲೇ, ಪ್ರಚೋದನಕಾರಿ ಹೇಳಿಕೆಯ ಮೂಲಕ ಯುವಕರಲ್ಲಿ ದ್ವೇಷದ ಭಾವನೆಗಳನ್ನು ತುಂಬಲಾಗುತ್ತಿದೆ ಎಂಬ ಆಪಾದನೆ ಮೇಲೆ ಪಾಕ್​ನ ಪೀಸ್​ ಟಿವಿ ಮೇಲೆ ನಿಷೇಧ ಹೇರಲಾಗಿದೆ. ಈ ನಿಷೇಧ ನೆರೆಯ ಬಾಂಗ್ಲಾದಲ್ಲಿಯೂ ಈ ನಿಷೇದ ಜಾರಿಯಲ್ಲಿದೆ.

ಬ್ರಿಟಿಷ್ ಹೈ ಕಮಿಷನರ್ ಡಾಮಿನಿಕ್ ಅಸ್ಕ್ವಿತ್ ಅವರು ಭಾರತದ 'ಆಶಾವಾದ'ದ ಪ್ರಸ್ತಾಪಕ್ಕೆ ಶೀಘ್ರದಲ್ಲೇ ಸಕರಾತ್ಮಕ ಫಲಿತಾಂಶ ಹೊರ ಬರಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಪಾಕ್​ನ ವಿದೇಶಾಂಗ ಸಚಿವಾಲಯದ ವಕ್ತಾರ ಮೊಹಮ್ಮದ್​ ಫೈಜಲ್ ಅವರು ಸಂದರ್ಶನಯೊಂದರಲ್ಲಿ​, ಪಾಕಿಸ್ತಾನ ಈ ಪಟ್ಟಿಯ ಬಗ್ಗೆ ಚರ್ಚಿಸಲು ಸಿದ್ಧವಿದೆ. ಆದರೆ, ಪುಲ್ವಾಮಾ ದಾಳಿಯಲ್ಲಿ ಅಜರ್ ಕೈವಾಡ ಇರುವ ಸಾಕ್ಷ್ಯಾದಾರಗಳನ್ನ ಮಾತ್ರ ತಳ್ಳಿ ಹಾಕಿದೆ.