ಕೌಲಲಾಂಪುರ್ :ಗಡಿ ಪಾರಿಗೆ ಆದೇಶಿಸಲಾಗಿದ್ದ ಸುಮಾರು 1,200 ಮಂದಿ ಮಯನ್ಮಾರ್ ಪ್ರಜೆಗಳಿಗೆ ಮಲೇಷಿಯಾ ಕೋರ್ಟ್ ಮಂಗಳವಾರ ತಾತ್ಕಾಲಿಕ ರಿಲೀಫ್ ನೀಡಿದೆ.
ಆಲ್ ಜಜೀರಾ ವರದಿ ಹೇಳುವಂತೆ ಈ ಮಯನ್ಮಾರ್ನಲ್ಲಿ ಮಿಲಿಟರಿ ದಂಗೆ ನಡೆಯುತ್ತಿರುವ ಕಾರಣದಿಂದ ಈಗ ಗಡಿಪಾರಾಗಲಿರುವ ಜನರ ಜೀವಕ್ಕೆ ಕುತ್ತುಂಟಾಗುವ ಸಾಧ್ಯತೆ ಇರುತ್ತದೆ. ಇದರಿಂದಾಗಿ ಮಲೇಷಿಯಾ ಕೋರ್ಟ್ ಈ ಆದೇಶ ನೀಡಿದೆ.
ಮಾನವ ಹಕ್ಕುಗಳ ಸಂಸ್ಥೆಗಳಾದ ಅಮ್ನೆಸ್ಟಿ ಇಂಟರ್ ನ್ಯಾಷನಲ್ ಮತ್ತು ಅಸಿಲಮ್ ಅಕ್ಸೆಸ್ ಸಂಸ್ಥೆಗಳು ಮಲೇಷಿಯಾ ಸರ್ಕಾರಕ್ಕೆ ಪತ್ರ ಬರೆದು, ಮಯನ್ಮಾರ್ನಲ್ಲಿ ಸೇನಾ ದಂಗೆಯ ವೇಳೆ ಇವರನ್ನು ಆ ದೇಶಕ್ಕೆ ಬಿಡುವುದು ಸರಿಯಲ್ಲ ಎಂದು ಹೇಳಿದ್ದವು.
ಇದನ್ನೂ ಓದಿ:ಕುಡಿದ ನಶೆಯಲ್ಲಿ ಏಳು ತಿಂಗಳ ಮಗುವಿನ ಕೊಲೆ ಮಾಡಿದ ಪಾಪಿ ತಂದೆ!
ಈ ಸಂಸ್ಥೆಗಳ ಮನವಿಗೆ ಸ್ಪಂದಿಸಿದ ಮಲೇಷಿಯಾ ಕೋರ್ಟ್, ಅಲ್ಲಿನ ಸರ್ಕಾರದ ನಿರ್ಧಾರಕ್ಕೆ ತಡೆಯಾಜ್ಞೆ ತಂದಿದೆ. ನಾಳೆಗೆ ವಿಚಾರಣೆ ಮತ್ತೆ ಕೈಗೆತ್ತಿಕೊಳ್ಳಲಿದೆ ಎಂದು ಉನ್ನತ ಮೂಲಗಳು ತಿಳಿಸಿವೆ.
ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಅಮ್ನೆಸ್ಟಿ ಇಂಟರ್ ನ್ಯಾಷನಲ್ ಮಲೇಷಿಯಾದ ಕಾರ್ಯಕಾರಿ ನಿರ್ದೇಶಕ ಕಟ್ರಿನಾ ಜೊರೆನ್ ಮಿಲಿಯಾಮೌ, ಕೋರ್ಟ್ ಆದೇಶವನ್ನು ಸರ್ಕಾರ ಪಾಲಿಸಬೇಕು. 1200 ಮಂದಿಯಲ್ಲಿ ಒಬ್ಬನೇ ಒಬ್ಬನನ್ನು ಗಡಿಪಾರು ಮಾಡಬಾರದು ಎಂದಿದ್ದಾರೆ.
1200 ಮಂದಿಯಲ್ಲಿರುವ ಮಕ್ಕಳನ್ನು ರಕ್ಷಣೆ ಮಾಡುವುದು ಮಲೇಷಿಯಾ ಸರ್ಕಾರದ ಜವಾಬ್ದಾರಿಯಾಗಿದೆ. ಮಲೇಷಿಯಾದ ಕಾನೂನಿನಲ್ಲಿರುವ ಮಕ್ಕಳ ಹಕ್ಕುಗಳ ರಕ್ಷಣೆಯಲ್ಲಿ ಇದನ್ನು ಉಲ್ಲೇಖಿಸಲಾಗಿದೆ ಎಂದು ಅಸಿಲಮ್ ಅಕ್ಸೆಸ್ನ ಕಾರ್ಯಕಾರಿ ನಿರ್ದೇಶಕ ಥಾಮ್ ಹುವೈ ಯಿಂಗ್ ಅಭಿಪ್ರಾಯಪಟ್ಟಿದ್ದಾರೆ.
