ಉಗ್ರರಿಗೆ ಆಶ್ರಯ, ಸಾಲದ ಸುಳಿಯಲ್ಲಿ ಒದ್ದಾಟ... ಸಾಲ ಮಾಡುವುದರಲ್ಲೂ ಪಾಕ್​ ಹೊಸ ದಾಖಲೆ!

ಭಯೋತ್ಪಾದಕರಿಗೆ ಆಶ್ರಯ ನೀಡುತ್ತಲೇ ಬಂದಿರುವ ನೆರೆಯ ರಾಷ್ಟ್ರ ಪಾಕ್​, ಸಾಲದ ಸುಳಿಯಲ್ಲಿ ಸಿಲುಕಿ ಒದ್ದಾಡುತ್ತಿದೆ. ಇದೀಗ ಅದರಲ್ಲೂ ಹೊಸ ದಾಖಲೆ ನಿರ್ಮಾಣ ಮಾಡಿದೆ.

ಇಸ್ಲಾಮಾಬಾದ್​:ಕಳೆದ ಕೆಲ ವರ್ಷಗಳಿಂದ ಸಾಲದ ಸುಳಿಯಲ್ಲಿ ಸಿಲುಕಿ ಒದ್ದಾಟ ನಡೆಸುತ್ತಿರುವ ನೆರೆಯ ರಾಷ್ಟ್ರ ಪಾಕ್​ ಇದೀಗ ಬೇರೆ ರಾಷ್ಟ್ರಗಳಿಂದ ಸಾಲ ಪಡೆದುಕೊಳ್ಳುವುದರಲ್ಲೂ ಹೊಸ ದಾಖಲೆ ನಿರ್ಮಾಣ ಮಾಡಿದೆ.

ಪಾಕಿಸ್ತಾನದಲ್ಲಿ ಆಡಳಿತ ನಡೆಸುತ್ತಿರುವ ಇಮ್ರಾನ್​ ಖಾನ್​ ನೇತೃತ್ವದ ಸರ್ಕಾರ 2,804 ಶತಕೋಟಿ ರೂ. ವಿದೇಶಿ ಮೂಲಗಳಿಂದ ಹಾಗೂ 4,705 ಶತಕೋಟಿ ದೇಶೀಯ ಮೂಲಗಳಿಂದ ಸಾಲ ಪಡೆದುಕೊಂಡಿದೆ. ಅಧಿಕಾರಕ್ಕೆ ಬಂದ ಒಂದೇ ವರ್ಷದಲ್ಲಿ ಇಮ್ರಾನ್​ ಖಾನ್​ ಸರ್ಕಾರ 7509 ಶತಕೋಟಿ ರೂ.(ಪಾಕಿಸ್ತಾನ ಕರೆನ್ಸಿ) ಸಾಲ ಪಡೆದಿದ್ದಾರೆ ಎಂದು ತಿಳಿದು ಬಂದಿದೆ.

ಈ ಹಿಂದಿನ ಯಾವುದೇ ಸರ್ಕಾರ ಇಷ್ಟೊಂದು ಕಡಿಮೆ ಅವಧಿಯಲ್ಲಿ ಇಷ್ಟೊಂದು ಮೊತ್ತದ ಸಾಲ ಪಡೆದಿರುವ ಉದಾಹರಣೆ ಇಲ್ಲ. ಆದರೆ ಈ ವಿಷಯದಲ್ಲಿ ಇಮ್ರಾನ್​ ಖಾನ್​ ಹೊಸ ದಾಖಲೆ ನಿರ್ಮಾಣ ಮಾಡಿದ್ದಾರೆ. ಸದ್ಯ ಪಾಕಿಸ್ತಾನದ ಒಟ್ಟು ಸಾಲದ ಮೊತ್ತ 32,240 ಶತಕೋಟಿ ರೂ.ಗಳಾಗಿದೆ. ಕಳೆದ ಆಗಸ್ಟ್​ ತಿಂಗಳಲ್ಲಿ ಇದರ ಸಾಲದ ಮೊತ್ತ 24,732 ಶತಕೋಟಿ ರೂ. ಆಗಿತ್ತು.

ಕಳೆದ ಕೆಲ ವರ್ಷಗಳಿಂದ ತೀವ್ರ ಆರ್ಥಿಕ ಸಂಕಷ್ಟಕ್ಕೊಳಗಾಗಿರುವ ಪಾಕ್​, ಹಣಕಾಸಿನ ತೊಂದರೆ ಅನುಭವಿಸುತ್ತಿದೆ. ಹೀಗಾಗಿ ಸಾಲದ ಸುಳಿಗೆ ಸಿಲುಕಿ ಪಾಕ್​ ಒದ್ದಾಡುತ್ತಿದೆ ಎಂದು ತಿಳಿದು ಬಂದಿದೆ.