ನ್ಯೂಯಾರ್ಕ್​ ತಲುಪಿದ ಹೈಡ್ರೋಕ್ಸಿಕ್ಲೋರೋಕ್ವಿನ್​... ದೊಡ್ಡಣ್ಣನಿಗೆ ಆಶಾಕಿರಣವಾಯ್ತು ಭಾರತದ ನೆರವು

ಇಡೀ ವಿಶ್ವದಲ್ಲೇ ಅತಿ ಹೆಚ್ಚು ಅಮೆರಿಕರಿಗೆ ಕೊರೊನಾ ಸೋಂಕು ತಗಲಿದ್ದು, ಇದರಿಂದ ವಿಶ್ವದ ದೊಡ್ಡಣ್ಣ ಬೆಚ್ಚಿ ಬಿದ್ದಿದ್ದಾನೆ. ಇದರ ಮಧ್ಯೆ ಭಾರತದಿಂದ ಔಷಧಿ ನ್ಯೂಯಾರ್ಕ್ ತಲುಪಿದೆ.

ನ್ಯೂಯಾರ್ಕ್​:ಅಮೆರಿಕದಲ್ಲಿ ಕೊರೊನ ಸೋಂಕಿಗೆ ಇಲ್ಲಿಯವರೆಗೆ ಬರೋಬ್ಬರಿ 20 ಸಾವಿರ ಜನರು ಪ್ರಾಣ ಕಳೆದುಕೊಂಡಿದ್ದಾರೆ.

ಚೀನಾದಲ್ಲಿ ಹುಟ್ಟಿಕೊಂಡ ಈ ಮಹಾಮಾರಿ 195ಕ್ಕೂ ಹೆಚ್ಚು ದೇಶಗಳಲ್ಲಿ ಲಗ್ಗೆ ಹಾಕಿದ್ದು, ಅಮೆರಿಕದಲ್ಲಿ ಮಾತ್ರ ಅತಿ ವೇಗವಾಗಿ ವೈರಸ್​ ಹರಡುತ್ತಿದೆ. ಇಲ್ಲಿಯವರೆಗಿನ ಮಾಹಿತಿ ಪ್ರಕಾರ 20 ಸಾವಿರ ಮಂದಿ ಮರಣ ಹೊಂದಿದ್ದು, 1600 ಮಂದಿ ಗುಣಮುಖರಾಗಿದ್ದಾರೆ. ಉಳಿದಂತೆ 5,04,780ಕ್ಕೂ ಹೆಚ್ಚು ಜನರು ಸೋಂಕಿನಿಂದ ಬಳಲುತ್ತಿದ್ದು, ಹೆಚ್ಚಿನ ಸಾವು ಸಂಭವಿಸುವ ಸಾಧ್ಯತೆ ದಟ್ಟವಾಗಿದೆ.

ಈ ಮಹಾಮಾರಿಗೆ ನ್ಯೂಯಾರ್ಕ್​ ನಗರದಲ್ಲೇ ಹೆಚ್ಚು ಸೋಂಕಿತರು ಬಲಿಯಾಗಿದ್ದು, ಇದೀಗ 1,59,937 ಜನರು ಸೋಂಕಿನಿಂದ ಬಳಲುತ್ತಿದ್ದಾರೆ. ಉಳಿದಂತೆ ಕ್ಯಾಲಿಫೋರ್ನಿಯಾ, ಮಿಚಿಗನ್​ ಸಿಟಿಯಲ್ಲೂ ಸೋಂಕಿತರ ಸಂಖ್ಯೆ ಹೆಚ್ಚುತ್ತಿದೆ.

ನ್ಯೂಯಾರ್ಕ್​ ತಲುಪಿದ ಹೈಡ್ರೋಕ್ಸಿಕ್ಲೋರೋಕ್ವಿನ್​!

ಕಳೆದ ಕೆಲ ದಿನಗಳ ಹಿಂದೆ ಅಮೆರಿಕಕ್ಕೆ ಕೊರೊನಾ ರಾಮಬಾಣ ಹೈಡ್ರೋಕ್ಸಿಕ್ಲೋರೋಕ್ವಿನ್ ಕಳುಹಿಸಿಕೊಂಡಲು ಮುಂದಾಗಿದ್ದ ಭಾರತ ಅದನ್ನ ರವಾನೆ ಮಾಡಿದ್ದು, ನ್ಯೂಯಾರ್ಕ್​ ಏರ್​ಪೋರ್ಟ್​ ತಲುಪಿದೆ. ಔಷಧಿ ತಲುಪಿರುವ ಬಗ್ಗೆ ಅಮೆರಿಕದಲ್ಲಿರುವ ಭಾರತೀಯ ರಾಯಭಾರಿ ಕಚೇರಿ ಟ್ವೀಟ್​ ಮಾಡಿ ಮಾಹಿತಿ ನೀಡಿದೆ.

ಉಳಿದಂತೆ ಇಟಲಿಯಲ್ಲಿ ಒಟ್ಟು ಕೊರೊನಾ ರೋಗಿಗಳ ಸಂಖ್ಯೆ 135,586, ಸಾವಿನ ಸಂಖ್ಯೆ 17,127. ಸ್ಪೇನ್‌ನಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 141,942, ಸಾವಿನ ಸಂಖ್ಯೆ 14,045. ಈ ಮೂರು ದೇಶಗಳಲ್ಲಿ ಸಾವಿನ ಸಂಖ್ಯೆ ಈಗಾಗಲೇ 15 ಸಾವಿರ ಗಡಿ ದಾಟಿ ಮುನ್ನುಗುತ್ತಿದೆ.