ಹೈದರಾಬಾದ್:ಅಫ್ಘಾನಿಸ್ತಾನದ ಮಾಜಿ ಅಧ್ಯಕ್ಷ ಅಶ್ರಫ್ ಘನಿ ಅವರ ಸಹೋದರ ಹಷ್ಮತ್ ಘನಿ ತಾಲಿಬಾನ್ ನಾಯಕರೊಂದಿಗೆ ಮಾತುಕತೆ ನಡೆಸಿದ್ದಾರೆ ಎನ್ನಲಾದ ವಿಡಿಯೋ ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ವಿಡಿಯೋ ಹರಿದಾಡುತ್ತಿದ್ದಂತೆ ಹಷ್ಮತ್ ಟ್ವೀಟೊಂದನ್ನು ಮಾಡಿದ್ದಾರೆ.
ಕುಚೀಸ್ ಗ್ರ್ಯಾಂಡ್ ಕೌನ್ಸಿಲ್ನ ಮುಖ್ಯಸ್ಥ ಮತ್ತು ಕಾಬೂಲ್ ಮೂಲದ ದಿ ಘನಿ ಗ್ರೂಪ್ನ ಅಧ್ಯಕ್ಷ ಹಷ್ಮತ್ ಘನಿ ಟ್ವೀಟ್ ಮಾಡಿದ್ದು, "ನಮ್ಮ ಜನಸಂಖ್ಯೆಯ ಅರ್ಧದಷ್ಟು ಜನರು ದಿನನಿತ್ಯದ ವೇತನವನ್ನು ಅವಲಂಬಿಸಿದ್ದಾರೆ. ಅಗತ್ಯವಿದ್ದಾಗ ಅವರ ಹಣವನ್ನು ತಡೆಯುವುದು ಅನಾಹುತಗಳಿಗೆ ಕಾರಣವಾಗಬಹುದು" ಎಂದು ಹೇಳಿದ್ದಾರೆ.
ಅಷ್ಟೇ ಅಲ್ಲದೆ, ಇನ್ನೊಂದು ಟ್ವೀಟ್ನಲ್ಲಿ "ತಾಲಿಬಾನ್ ಭದ್ರತೆಯನ್ನು ತರುವಲ್ಲಿ ಸಮರ್ಥರಾಗಿದ್ದಾರೆ. ಜೊತೆಗೆ ಕ್ರಿಯಾತ್ಮಕ ಸರ್ಕಾರವನ್ನು ನಡೆಸಲು ವಿದ್ಯಾವಂತ ಜನರ ಅಗತ್ಯತೆ ಇದೆ" ಎಂದು ಅವರು ಹೇಳಿದ್ದಾರೆ.
ತಾಲಿಬಾನ್ ನಾಯಕ ಖಲೀಲ್-ಉರ್-ರೆಹಮಾನ್ ಮತ್ತು ಧಾರ್ಮಿಕ ವಿದ್ವಾಂಸ ಮುಫ್ತಿ ಮಹಮೂದ್ ಜಾಕಿರ್ ಜೊತೆ ಹಷ್ಮತ್ ಘನಿ ಇರುವ ವಿಡಿಯೋ ವೈರಲ್ ಆಗಿತ್ತು.
ತಾಲಿಬಾನ್ ಕಾಬೂಲನ್ನು ವಶಪಡಿಸಿಕೊಂಡ ತಕ್ಷಣ, ಅಶ್ರಫ್ ಘನಿ ಅಫ್ಘಾನಿಸ್ತಾನದಿಂದ ಪಲಾಯನ ಮಾಡಿದ್ದರು. ಆ ಬಳಿಕ ಯುಎಇಯಲ್ಲಿ ಆಶ್ರಯ ಪಡೆದಿರುವ ಘನಿ, ಅಫ್ಘಾನಿಸ್ತಾನಕ್ಕೆ ಮರಳಲು ತಾಲಿಬಾನ್ಗಳ ಜೊತೆ ಮಾತುಕತೆ ನಡೆಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
