ಮೂರೇ ಮೂರು ಲಕ್ಷಣರಹಿತ ಕೋವಿಡ್​ ಕೇಸ್​ ಪತ್ತೆ: 12 ಲಕ್ಷ ಜನರಿದ್ದ ನಗರ ಲಾಕ್‌ಡೌನ್‌!

ಕೇವಲ ಮೂರೇ ಮೂರು ಕೋವಿಡ್​ ಕೇಸ್​ ಪತ್ತೆಯಾಗಿದ್ದಕ್ಕೆ 1.2(12 ಲಕ್ಷ) ಮಿಲಿಯನ್ ಜನಸಂಖ್ಯೆವುಳ್ಳ ಚೀನಾದ ಯುಝೌ ನಗರದಲ್ಲಿ ಲಾಕ್​ಡೌನ್​ ಘೋಷಣೆ ಮಾಡಲಾಗಿದೆ.

ಬೀಜಿಂಗ್​: ಚೀನಾದ ಹೆನಾನ್ ಪ್ರಾಂತ್ಯದ ಯುಝೌ ನಗರದಲ್ಲಿ ಸೋಮವಾರ ಕೇವಲ ಮೂರೇ ಮೂರು ಕೋವಿಡ್​ ಸೋಂಕಿತರು ಪತ್ತೆಯಾಗಿದ್ದಕ್ಕೆ ಇಡೀ ನಗರದ ಮೇಲೆ ಲಾಕ್​ಡೌನ್​ ಹೇರಲಾಗಿದೆ. ಅಲ್ಲದೇ, ಈ ಮೂವರು ಸೋಂಕಿತರಿಗೆ ರೋಗ ಲಕ್ಷಣಗಳೇ ಇಲ್ಲ. ಆದರೂ ಅಧಿಕಾರಿಗಳು ಕಠಿಣ ನಿರ್ಬಂಧ ಜಾರಿಗೊಳಿಸಿದ್ದಾರೆ.

ಯುಝೌ ನಗರದಲ್ಲಿ 1.2 ಮಿಲಿಯನ್ ಜನರು ವಾಸವಾಗಿದ್ದು, ಈಗ ಅವರೆಲ್ಲರೂ ತಮ್ಮ ಮನೆಯಲ್ಲಿಯೇ ಬಂಧಿಯಾಗಬೇಕಿದೆ. ಈಗಾಗಲೇ ಚೀನಾದ ಅತಿದೊಡ್ಡ ನಗರಗಳಲ್ಲಿ ಒಂದಾದ ಕ್ಸಿಯಾನ್‌ನ​ಲ್ಲಿ ಲಾಕ್​ಡೌನ್ ಘೋಷಿಸಲಾಗಿದ್ದು, ಅಲ್ಲಿನ ಎಲ್ಲಾ ನಿವಾಸಿಗಳಿಗೆ ಅಂದರೆ 13 ಮಿಲಿಯನ್​ ಜನರಿಗೆ ಮನೆಯಿಂದ ಹೊರಗೆ ಬರದಂತೆ ಸೂಚಿಸಿದ್ದಾರೆ.

ಮುಂದಿನ ತಿಂಗಳು ಮುಂಬರುವ ಚಳಿಗಾಲದ ಒಲಿಂಪಿಕ್ಸ್‌ಗೆ ಮುಂಚಿತವಾಗಿ ಬೀಜಿಂಗ್ ತನ್ನ ಶೂನ್ಯ-ಕೋವಿಡ್ ತಂತ್ರವನ್ನು ಹಿಡಿದಿಟ್ಟುಕೊಂಡಿದೆ. ಹೀಗಾಗಿ, ಅಲ್ಲೇ ಕೊರೊನಾ ಹೊಸ ಪ್ರಕರಣಗಳು ಕಂಡು ಬಂದರೂ ಸ್ಥಳೀಯ ಅಧಿಕಾರಿಗಳು ನಿರ್ಬಂಧಗಳನ್ನು ಹೇರುತ್ತಿದ್ದಾರೆ ಹಾಗೂ ಕಟ್ಟುನಿಟ್ಟಿನ ಕ್ರಮಗಳನ್ನು ಇನ್ನಷ್ಟು ಬಿಗಿಗೊಳಿಸಲು ಸಜ್ಜಾಗಿದ್ದಾರೆ.

ಇದನ್ನೂ ಓದಿ: ಚೀನಾದಲ್ಲಿ ಭೂಕುಸಿತ- 5 ಮಂದಿ ಸಾವು, 9 ಮಂದಿ ಕಣ್ಮರೆ.. 720 ಸಿಬ್ಬಂದಿಯಿಂದ ಶೋಧಕಾರ್ಯ

ಈ ಎರಡೂ ನಗರಗಳಲ್ಲಿ ತುರ್ತು ವಾಹನಗಳನ್ನು ಹೊರತುಪಡಿಸಿ ಸಾರ್ವಜನಿಕ ಹಾಗೂ ಖಾಸಗಿ ಸಾರಿಗೆಯನ್ನು ಸ್ಥಗಿತಗೊಳಿಸಲಾಗಿದೆ. ಎಲ್ಲಾ ಅಂಗಡಿ-ಮುಂಗಟ್ಟುಗಳನ್ನು ಮುಚ್ಚಲಾಗಿದೆ. ಅಗತ್ಯ ವಸ್ತು ಪೂರೈಕೆಗೆ ಮಾತ್ರ ಅವಕಾಶ ನೀಡಲಾಗಿದೆ.

ಕಳೆದ 24 ಗಂಟೆಗಳಲ್ಲಿ ಚೀನಾದಲ್ಲಿ 175 ಹೊಸ ಕೋವಿಡ್ ಪ್ರಕರಣಗಳು ಪತ್ತೆಯಾಗಿದೆ. ಪ್ರಪಂಚದ ಬೇರೆಡೆಗೆ ಹೋಲಿಸಿದರೆ ಚೀನಾದಲ್ಲಿ ಪತ್ತೆಯಾಗುತ್ತಿರುವ ಕೇಸ್​ಗಳ ಸಂಖ್ಯೆ ಕಡಿಮೆಯಾದರೂ ಕೂಡ 2020ರ ಮಾರ್ಚ್​ ಬಳಿಕ ಈ ದೇಶದಲ್ಲಿ ಕಳೆದ ಕೆಲ ವಾರಗಳಿಂದ ವರದಿಯಾಗುತ್ತಿರುವ ಸೋಂಕಿತರ ಸಂಖ್ಯೆ ಗರಿಷ್ಠ ಮಟ್ಟವನ್ನು ತಲುಪಿದೆ.