ಯೋಧರನ್ನು ಹೊತ್ತೊಯ್ಯುತ್ತಿದ್ದ ಸೇನಾ ವಿಮಾನ ಪತನ : 17 ಸಾವು, 40 ಮಂದಿ ರಕ್ಷಣೆ

ಫಿಲಿಪೈನ್ಸ್​ನ ಸುಲು ಪ್ರಾಂತ್ಯದ ಪರ್ವತ ಪ್ರದೇಶವಾದ ಪಟಿಕುಲ್‌ನ ಹಳ್ಳಿಯೊಂದರಲ್ಲಿ ವಾಯುಪಡೆಯ ವಿಮಾನ ಅಪಘಾತಕ್ಕೀಡಾದೆ. ಸದ್ಯ 40 ಯೋಧರನ್ನು ರಕ್ಷಿಸಲಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ..

ಮನಿಲಾ :ಫಿಲಿಪೈನ್ಸ್ ವಾಯುಪಡೆಯ ಸಿ -130 ವಿಮಾನವು ದಕ್ಷಿಣ ಪ್ರಾಂತ್ಯದಲ್ಲಿ ಅಪಘಾತಕ್ಕೀಡಾಗಿದೆ. 17 ಯೋಧರು ಸಾವನ್ನಪ್ಪಿದ್ದು, ಸುಮಾರು 40 ಮಂದಿಯನ್ನು ರಕ್ಷಿಸಲಾಗಿದೆ. ಇನ್ನು, ಈ ವಿಮಾನದಲ್ಲಿ 92 ಮಂದಿ ಸೈನಿಕರು ಇದ್ದರು ಎಂಬ ಮಾಹಿತಿ ಲಭ್ಯವಾಗಿದೆ.

ಸುಲು ಪ್ರಾಂತ್ಯದ ಪರ್ವತ ಪ್ರದೇಶವಾದ ಪಟಿಕುಲ್‌ನ ಹಳ್ಳಿಯೊಂದರಲ್ಲಿ ವಿಮಾನ ಅಪಘಾತಕ್ಕೀಡಾದೆ. ವಿಮಾನವು ದಕ್ಷಿಣ ಕಾಗಾಯನ್ ಡಿ ಓರೊ ನಗರದಿಂದ ಸೈನಿಕರನ್ನು ಹೊತ್ತು ಸಾಗುತ್ತಿತ್ತು. ಈ ಸೇನಾ ಪಡೆ, ಮುಸ್ಲಿಂ ಪ್ರಾಂತ್ಯವಾದ ಸುಲು ಪ್ರದೇಶದಲ್ಲಿ ಅಬು ಸಯ್ಯಫ್ ಸಂಘಟನೆಯ ಉಗ್ರರನ್ನು ಸದೆಬಡೆಯುವ ಕಾರ್ಯಾಚರಣೆಯಲ್ಲಿ ತೊಡಗಿತ್ತು ಎನ್ನಲಾಗಿದೆ.

ಇನ್ನು, ಪೈಲೆಟ್​ ವಿಮಾನವನ್ನು ನಿಯಂತ್ರಿಸಲು ಹರಸಾಹಸ ಪಟ್ಟರೂ, ಪ್ರಯೋಜನವಾಗಿಲ್ಲ. ಸದ್ಯ 40 ಜನರನ್ನು ಆಸ್ಪತ್ರೆಗೆ ರವಾನಿಸಲಾಗಿದ್ದು, ಉಳಿದವರಿಗಾಗಿ ಶೋಧ ನಡೆಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.