ಕೊರೊನಾಗೆ ಔಷಧಿ ಎಂದು ಸಾರಾಯಿ ಕುಡಿದು ಸತ್ತರು..

ಕೊರೊನಾ ವೈರಸ್​ ಅನ್ನು ಅಲ್ಕೊಹಾಲ್​ ಕುಡಿಯುವುದರ ಮೂಲಕ ದೂರವಿಡಬಹುದು ಎಂಬ ನಂಬಿಕೆಯಿಂದ ಕಳ್ಳಭಟ್ಟಿ ಸಾರಾಯಿ ಕುಡಿದು 480 ಜನ ಮೃತಪಟ್ಟ ಘಟನೆ ಇರಾನ್​ ದೇಶದಲ್ಲಿ ನಡೆದಿದೆ. ಇರಾನ್​ನಲ್ಲಿ ಮದ್ಯ ಸೇವನೆ ಅಪರಾಧವಾಗಿರುವುದರಿಂದ ಕಳ್ಳಭಟ್ಟಿ ತಯಾರಿಕೆ ಹಾಗೂ ವ್ಯಾಪಾರ ಜೋರಾಗಿ ನಡೆಯುತ್ತಿದೆ. ಆದರೆ ಕೊರೊನಾ ವೈರಸ್​ಗಿಂತ ಹೆಚ್ಚು ಜನ ಕಳ್ಳಭಟ್ಟಿಗೆ ಬಲಿಯಾಗಿರುವುದು ವಿಪರ್ಯಾಸ.

ಟೆಹರಾನ್ :ಮಿಥೈಲ್​ ಅಲ್ಕೋಹಾಲ್ ಕುಡಿದು 480ಕ್ಕೂ ಹೆಚ್ಚು ಜನ ಸತ್ತು, 2,850 ಜನ ಅಸ್ವಸ್ಥರಾಗಿರುವ ಘಟನೆ ಇರಾನ್​ ದೇಶದಲ್ಲಿ ನಡೆದಿದೆ. ಕಟ್ಟರ್ ಇಸ್ಲಾಮಿಕ್ ದೇಶವಾಗಿರುವ ಇರಾನ್​ನಲ್ಲಿ ಮದ್ಯ ಸೇವನೆ ಅಪರಾಧ. ಆದರೆ, ಮದ್ಯ ಸೇವಿಸುವುದರಿಂದ ಕೊರೊನಾ ವೈರಸ್​ ಸೋಂಕು ತಗಲುವುದಿಲ್ಲ ಎಂದು ಸೋಶಿಯಲ್​ ಮೀಡಿಯಾಗಳಲ್ಲಿನ ವೈರಲ್​ ಸಂದೇಶಗಳನ್ನು ನೋಡಿದ ಜನ ಅಲ್ಕೋಹಾಲ್‌ನ ಹುಡುಕಿ ಕುಡಿಯುತ್ತಿದ್ದಾರೆ.

ಸಾರಾಯಿ ನಿಷೇಧವಿರುವುದರಿಂದಾಗಿ ಇರಾನ್​ನಲ್ಲಿ ಎಲ್ಲರೂಕಳ್ಳಭಟ್ಟಿ ಮೊರೆ ಹೋಗಿದ್ದಾರೆ.ಹೀಗೆ ಕುಡಿದ ಕಳ್ಳಭಟ್ಟಿಯು ಈಥೈಲ್​ ಅಲ್ಕೋಹಾಲ್ ಆಗಿರದೆ ಮಿಥೈಲ್ ಅಲ್ಕೋಹಾಲ್ (ವಿಷಕಾರಿ) ಆಗಿದ್ದರಿಂದ ದೇಶಾದ್ಯಂತ ಭಾರಿ ಪ್ರಮಾಣದಲ್ಲಿ ಸಾವು ಸಂಭವಿಸಿವೆ. ಒಂದು ಕಡೆ ಕೊರೊನಾ ವೈರಸ್​ ಪೀಡಿತರಿಗೆ ಚಿಕಿತ್ಸೆ ನೀಡುವಲ್ಲಿ ನಿರತರಾದ ವೈದ್ಯರಿಗೆ ಈಗ ಅಲ್ಕೋಹಾಲ್​ನಿಂದ ಅಸ್ವಸ್ಥರಾದವರಿಗೆ ಚಿಕಿತ್ಸೆ ನೀಡುವುದು ಸವಾಲಾಗಿದೆ.

ಬ್ರಿಟಿಷ್​ ಸ್ಕೂಲ್​ ಟೀಚರ್ ಒಬ್ಬರು ವಿಸ್ಕಿ ಹಾಗೂ ಜೇನು ಬೆರೆಸಿ ಕುಡಿದಿದ್ದರಿಂದ ಅವರ ಕೊರೊನಾ ವೈರಸ್​ ಸೋಂಕು ಮಾಯವಾಯಿತು ಎಂಬ ಸೋಶಿಯಲ್​ ಮೀಡಿಯಾ ವೈರಲ್​ ಸಂದೇಶವೇ ಇದಕ್ಕೆಲ್ಲ ಕಾರಣ ಎನ್ನಲಾಗಿದೆ.