ಅಮೆರಿಕ ಕಚೇರಿ ಗುರಿಯಾಗಿಸಿ ರಾಕೆಟ್​ ದಾಳಿ... ಇರಾನ್‌ ಮೇಲೆ ದೊಡ್ಡಣ್ಣನ ಆರೋಪ

ಇರಾಕ್​ ರಾಜಧಾನಿ ಬಾಗ್ದಾದ್​ನಲ್ಲಿರುವ ಅಮೆರಿಕ ರಾಯಭಾರ ಕಾರ್ಯಾಲಯ ಗುರಿಯಾಗಿಸಿ ಮೂರು ರಾಕೆಟ್‌ಗಳನ್ನು ಹಾರಿಸಲಾಗಿದೆ.

ಬಾಗ್ದಾದ್(ಇರಾಕ್)​:ಅಮೆರಿಕ ಮತ್ತು ಇರಾನ್ ನಡುವಿನ ಸಂಬಂಧ ಸದ್ಯ ಬೂದಿ ಮುಚ್ಚಿದ ಕೆಂಡದಂತಿದೆ. ಇರಾನ್ ಸೇನಾ ಕಮಾಂಡರ್‌ ಸೊಲೇಮನಿಯನ್ನು ಅಮೆರಿಕ ವೈಮಾನಿಕ ದಾಳಿಯಲ್ಲಿ ಹತ್ಯೆಗೈದ ಬಳಿಕ ಉಭಯ ರಾಷ್ಟ್ರಗಳ ನಡುವೆ ದಾಳಿ, ಪ್ರತಿದಾಳಿ ನಡೆಯುತ್ತಲೇ ಇವೆ. ಈ ಸಂಘರ್ಷದ ಮುಂದಿನ ಭಾಗವಾಗಿ ಬಾಗ್ದಾದ್​ನಲ್ಲಿರುವ ಅಮೆರಿಕ ರಾಯಭಾರ ಕಚೇರಿ ಬಳಿ ರಾಕೆಟ್​ ದಾಳಿ ನಡೆದಿದೆ.

ಇರಾನ್‌ ಸೇನಾ ಕಮಾಂಡರ್‌ ಸುಲೇಮಾನಿಯನ್ನು ಹತ್ಯೆ ಮಾಡಿದ್ದ ಅಮೆರಿಕಗೆ ಇರಾನ್‌ ತಿರುಗೇಟು ನೀಡುತ್ತಲೇ ಇದೆ. ಈಗ ಬಾಗ್ದಾದ್​ನಲ್ಲಿ ಅತೀ ಹೆಚ್ಚು ಭದ್ರತೆ ಇರುವ ಗ್ರೀನ್​ ಜೋನ್​ನಲ್ಲಿರುವ ರಾಯಭಾರ ಕಚೇರಿ ಗುರಿಯಾಗಿಸಿ ದಾಳಿ ನಡೆದಿವೆ.

ಇದು ವಿಶ್ವಮಟ್ಟದಲ್ಲೇ ಭಾರಿ ಆತಂಕಕ್ಕೆ ಕಾರಣವಾಗಿದ್ದು, ಇರಾನ್​ ಬೆಂಬಲಿತ ಪ್ಯಾರಾ ಮಿಲಿಟರಿ ಪಡೆ ಈ ದಾಳಿ ನಡೆಸಿದೆ ಎಂದು ಅಮೆರಿಕ ಆರೋಪಿಸಿದೆ. ಆದ್ರೆ, ಈ ದಾಳಿಯ ಹೊಣೆಯನ್ನು ಇನ್ನೂ ಯಾರೂ ಹೊತ್ತುಕೊಂಡಿಲ್ಲ.