ಉಗ್ರರ ಅಡಗುದಾಣಗಳ ಮೇಲೆ ಏರ್​ಸ್ಟ್ರೈಕ್; 23 ಭಯೋತ್ಪಾದಕರ ಸಾವು

ಕಂದಹಾರ್​ ಜಿಲ್ಲೆಯಲ್ಲಿ ಅಲ್ಲಿನ ಭದ್ರತಾ ಪಡೆಗಳು ನಡೆಸಿದ ಪ್ರತ್ಯೇಕ ವಾಯು ದಾಳಿಯಲ್ಲಿ 23 ಕ್ಕೂ ಹೆಚ್ಚು ತಾನಿಬಾನಿ ಉಗ್ರರು ಸಾವಿಗೀಡಾಗಿದ್ದಾರೆ.

ಕಾಬುಲ್: ಅಫ್ಘಾನಿಸ್ತಾನದ ಕಂದಹಾರ್, ಘಜ್ನಿ ಮತ್ತು ಬದ್ಘೀಸ್​ ಪ್ರದೇಶಗಳಲ್ಲಿನ ತಾಲಿಬಾನ್‌ ಉಗ್ರರ ಅಡಗುದಾಣಗಳ ಮೇಲೆ ಅಫ್ಘಾನಿಸ್ತಾನದ ಭದ್ರತಾ ಪಡೆಯ ಸೈನಿಕರು ವಾಯು ದಾಳಿ ನಡೆಸಿ 23 ಭಯೋತ್ಪಾದಕರನ್ನು ಬಲಿ ಪಡೆದಿದ್ದಾರೆ.

ಕಂದಹಾರ್​ ಜಿಲ್ಲೆಯಲ್ಲಿನ ವಾಯು ದಾಳಿಯಿಂದ ಸುಮಾರು 10 ಉಗ್ರರು ಮೃತಪಟ್ಟಿದ್ದು, ಇಬ್ಬರು ಗಾಯಗೊಂಡಿದ್ದಾರೆ. ಘಜ್ನಿ ವ್ಯಾಪ್ತಿಯ ಅಂದರ್​ ಜಿಲ್ಲೆಯ ದಾಳಿಯಲ್ಲಿ 3 ಭಯೋತ್ಪಾದಕರು ಸಾವನ್ನಪ್ಪಿದ್ದಾರೆ. ಬದ್ಘೀಸ್​ ವ್ಯಾಪ್ತಿಯ ಮುರ್ಘಬಾದ್ ಜಿಲ್ಲೆಯಲ್ಲಿ 10 ತಾಲಿಬಾನ್ ಉಗ್ರರನ್ನು ಹೊಡೆದುರುಳಿಸಲಾಗಿದೆ ಎಂದು ಇಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.

ತಾಲಿಬಾನ್​ ಸೇರಿದಂತೆ ಇತರೆ ಭಯೋತ್ಪಾದನ ಕೃತ್ಯಗಳಿಂದ ಅಫ್ಘಾನ್ ಕಳೆದ ಕೆಲವು ವರ್ಷಗಳಿಂದ ರಾಜಕೀಯ ಅಸ್ಥಿರತೆ, ಸಾಮಾಜಿಕ ಅಸಮಾನತೆ ಹಾಗೂ ಭದ್ರತೆಗೆ ಸಂಬಂಧಿಸಿದ ಗಂಭೀರ ಸಮಸ್ಯೆಗಳನ್ನು ಎದುರಿಸುತ್ತಿದೆ.